പരിശുദ്ധ ഖുർആൻ/തക്‌വീർ
| പരിശുദ്ധ ഖുർആൻ അദ്ധ്യായങ്ങൾ |
|
1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 | 49 | 50 | 51 | 52 | 53 | 54 | 55 | 56 | 57 | 58 | 59 | 60 | 61 | 62 | 63 | 64 | 65 | 66 | 67 | 68 | 69 | 70 | 71 | 72 | 73 | 74 | 75 | 76 | 77 | 78 | 79 | 80 | 81 | 82 | 83 | 84 | 85 | 86 | 87 | 88 | 89 | 90 | 91 | 92 | 93 | 94 | 95 | 96 | 97 | 98 | 99 | 100 | 101 | 102 | 103 | 104 | 105 | 106 | 107 | 108 | 109 | 110 | 111 | 112 | 113 | 114 |
1 സൂര്യൻ ചുറ്റിപ്പൊതിയപ്പെടുമ്പോൾ,
2 നക്ഷത്രങ്ങൾ ഉതിർന്നു വീഴുമ്പോൾ,
3 പർവ്വതങ്ങൾ സഞ്ചരിപ്പിക്കപ്പെടുമ്പോൾ,
4 പൂർണ്ണഗർഭിണികളായ ഒട്ടകങ്ങൾ അവഗണിക്കപ്പെടുമ്പോൾ,
5 വന്യമൃഗങ്ങൾ ഒരുമിച്ചുകൂട്ടപ്പെടുമ്പോൾ,
6 സമുദ്രങ്ങൾ ആളിക്കത്തിക്കപ്പെടുമ്പോൾ,
7 ആത്മാവുകൾ കൂട്ടിയിണക്കപ്പെടുമ്പോൾ,
8 ( ജീവനോടെ ) കുഴിച്ചു മൂടപ്പെട്ട പെൺകുട്ടിയോടു ചോദിക്കപ്പെടുമ്പോൾ,
9 താൻ എന്തൊരു കുറ്റത്തിനാണ്‌ കൊല്ലപ്പെട്ടത്‌ എന്ന്‌.
10 ( കർമ്മങ്ങൾ രേഖപ്പെടുത്തിയ ) ഏടുകൾ തുറന്നുവെക്കപ്പെടുമ്പോൾ.
11 ഉപരിലോകം മറ നീക്കികാണിക്കപ്പെടുമ്പോൾ
12 ജ്വലിക്കുന്ന നരകാഗ്നി ആളിക്കത്തിക്കപ്പെടുമ്പോൾ.
13 സ്വർഗം അടുത്തു കൊണ്ടുവരപ്പെടുമ്പോൾ.
14 ഓരോ വ്യക്തിയും താൻ തയ്യാറാക്കിക്കൊണ്ടു വന്നിട്ടുള്ളത്‌ എന്തെന്ന്‌ അറിയുന്നതാണ്‌.
15 പിൻവാങ്ങിപ്പോകുന്നവയെ ( നക്ഷത്രങ്ങളെ ) ക്കൊണ്ട്‌ ഞാൻ സത്യം ചെയ്തു പറയുന്നു.
16 സഞ്ചരിച്ചുകൊണ്ടിരിക്കുന്നവയും അപ്രത്യക്ഷമായിക്കൊണ്ടിരിക്കുന്നവയും
17 രാത്രി നീങ്ങുമ്പോൾ അതു കൊണ്ടും,
18 പ്രഭാതം വിടർന്ന്‌ വരുമ്പോൾ അതു കൊണ്ടും ( ഞാൻ സത്യം ചെയ്തു പറയുന്നു. )
19 തീർച്ചയായും ഇത്‌ ( ഖുർആൻ ) മാന്യനായ ഒരു ദൂതൻറെ വാക്കാകുന്നു.
20 ശക്തിയുള്ളവനും, സിംഹാസനസ്ഥനായ അല്ലാഹുവിങ്കൽ സ്ഥാനമുള്ളവനുമായ ( ദൂതൻറെ )
21 അവിടെ അനുസരിക്കപ്പെടുന്നവനും വിശ്വസ്തനുമായ ( ദൂതൻറെ )
22 നിങ്ങളുടെ കൂട്ടുകാരൻ ( പ്രവാചകൻ ) ഒരു ഭ്രാന്തനല്ല തന്നെ,
23 തീർച്ചയായും അദ്ദേഹത്തെ ( ജിബ്‌രീൽ എന്ന ദൂതനെ ) പ്രത്യക്ഷമായ മണ്ഡലത്തിൽ വെച്ച്‌ അദ്ദേഹം കണ്ടിട്ടുണ്ട്‌.
24 അദ്ദേഹം അദൃശ്യവാർത്തയുടെ കാര്യത്തിൽ പിശുക്ക്‌ കാണിക്കുന്നവനുമല്ല.
25 ഇത്‌ ( ഖുർആൻ ) ശപിക്കപ്പെട്ട ഒരു പിശാചിൻറെ വാക്കുമല്ല.
26 അപ്പോൾ എങ്ങോട്ടാണ്‌ നിങ്ങൾ പോകുന്നത്‌?
27 ഇത്‌ ലോകർക്ക്‌ വേണ്ടിയുള്ള ഒരു ഉൽബോധനമല്ലാതെ മറ്റൊന്നുമല്ല.
28 അതായത്‌ നിങ്ങളുടെ കൂട്ടത്തിൽ നിന്ന് നേരെ നിലകൊള്ളാൻ ഉദ്ദേശിച്ചവർക്ക്‌ വേണ്ടി.
29 ലോകരക്ഷിതാവായ അല്ലാഹു ഉദ്ദേശിക്കുന്നുവെങ്കിലല്ലാതെ നിങ്ങൾ ഉദ്ദേശിക്കുകയില്ല.