ഭാഷാഷ്ടപദി/സർഗം ഒന്ന്/1
| ←സർഗം ഒന്ന് | ഭാഷാഷ്ടപദി രചന: ഒന്നാം അഷ്ടപദി ഭാഷ |
രണ്ടാം അഷ്ടപദി ഭാഷ→ |
| ഭാഷാഷ്ടപദി |
|---|
|
നിരവധി ലയകടലിൽ തിരകളി ചെയ്തുഴലും
സുരമുനിമാർക്കു സുഖത്തെ വരുത്തിയ
മാധവ, ധൃതമത്സ്യശരീര,
ജയ ജഗദീശ, ഹരേ !
ചുമലിലീ മഹിയാകും ചുമടെടുത്തധികം
വിമലതയൊടു വിലസുന്ന വിഭോ, ഹേ,
മാധവ, ധൃത കൂർമ്മശരീര,
ജയജഗദീശ, ഹരേ!
തിങ്കളിലങ്കം പോലെ തിറവിയ ദംഷ്ട്രാഗ്രേ
ശങ്കവെടിഞ്ഞവനീതലമേന്തിയ
മാധവ,ധൃത കോലശരീര,
ജയജഗദീശ, ഹരേ!
ഹിരണ്യകശിപുദേഹം വിരവൊടു പിളർന്ന നഖം
ശരണ്യമായിട്ടു മമ ശമയതു മോഹം
മാധവ, ധൃതനരഹരിരൂപ,
ജയജഗദീശ, ഹരേ!
ബലിയൊടു മൂന്നുലകും നലമൊടു മേടിപ്പാൻ
വടിവൊടു വടുവായ് വന്ന വിഭോ, ഹേ,
മാധവ, ധൃതവാമനരൂപ,
ജയജഗദീശ, ഹരേ!
ക്ഷത്രിയരുടെ രുധിരം കൊണ്ടു കയം തീർത്തു
തത്ര മുഴുകിപ്പിതൃതർപ്പണം ചെയ്തൊരു
മാധവ, ധൃതഭാർഗവരൂപ,
ജയജഗദീശ, ഹരേ!
രാവണനുടെ കണ്ഠം പത്തുമറുത്തവനേ!
പാവനപംക്തിസ്യന്ദനനന്ദന,
മാധവ, ധൃതരാഘവരൂപ,
ജയജഗദീശ, ഹരേ!
ഖലദലനം ചെയ്‌വാൻ ഹലമെടുത്തതിതാപം
കലനം ചെയ്ത ബലായ നമസ്തേ!
മാധവ, ധൃതരാമശരീര,
ജയജഗദീശ, ഹരേ!
കർമ്മനിഷേധം ചെയ്‌വാൻ ധർമ്മം പറഞ്ഞവനേ.
നിർമ്മലനിഗമത്തെ നിന്ദിച്ച വിഷ്ണോ !
മാധവ, ധൃതബുദ്ധശരീര,
ജയജഗദീശ, ഹരേ!
മ്ലേച്ഛജനമിഹ ഹനനം ചെയ്‌വാനവതാരം
ചേർച്ചയോടെ ചെയ്തു വാളെടുപ്പവനേ,
മാധവ, ധൃതകൽക്കിശരീര,
ജയജഗദീശ, ഹരേ!
ശ്രീജയദേവന്റെ രചനയുടെ ഭാഷാം
കേൾക്ക ജനങ്ങളേ ഗതിവരുമാർക്കും
മാധവ, ധൃതദശവിധരൂപ,
ജയജഗദീശ, ഹരേ!
ശ്ലോകം
വേദാനുദ്ധരതേ ജഗന്തിവഹതേ ഭൂഗോളമുദ്വിഭ്രതേ
ദൈത്യം ദാരയതേ ബലിം ചലയതേ ക്ഷത്രക്ഷയം കുർവതേ!
പൌലസ്ത്യം ജയതേ ഹലം കലയതേ കാരുണ്യമാതന്വതേ
മ്ലേച്ഛാൻ മൂർച്ഛ യതേദശാകൃതികൃതേ കൃഷ്ണയ തുഭ്യം നമ:!!
പരിഭാഷ
വേദം വീണ്ടൂ, ധരിച്ചൂ ഭുവന, മഥഭുവം നീരിൽനിന്നുദ്ധരിച്ചൂ;
ഭേദിച്ചൂ ദൈത്യരാജം, ബലിമരുണദഹോ! ബാഹുജാൻ കൊന്നൊടുക്കി!
രക്ഷോരാജം വധിച്ചൂ, വരമുസലമെടുത്തു, ഭവാൻ ബുദ്ധനായി
രക്ഷാർത്ഥം കൽക്കിയാം പോലിനി ദശവപുഷം കൃഷ്ണ, വന്ദേ ഭവന്തം.