ഗീതഗോവിന്ദം/അഷ്ടപദി 22
| ←അഷ്ടപദി ഇരുപത്തൊന്ന് | ഗീതഗോവിന്ദം രചന: അഷ്ടപദി - ഇരുപത്തിരണ്ട് |
അഷ്ടപദി ഇരുപത്തിമൂന്ന്→ |
| ഗീതഗോവിന്ദം |
|---|
രാധാവദനവിലോകനവികസിതവിവിധവികാരവിഭങ്ഗം ।
ജലനിധിമിവ വിധുമൺഡലദർശനതരലിതതുങ്ഗതരങ്ഗം ॥
ഹരിമേകരസം ചിരമഭിലഷിതവിലാസം
സാ ദദാർശ ഗുരുഹർഷവശംവദവദനമനങ്ഗനിവാസം ॥ 1 ॥
ഹാരമമലതരതാരമുരസി ദധതം പരിരഭ്യ വിദൂരം ।
സ്ഫുടതരഫേനകദംബകരംബിതമിവ യമുനാജലപൂരം ॥ 2 ॥
ശ്യാമലമൃദുലകലേവരമണ്ഡലമധിഗതഗൗരദുകൂലം ।
നീലനലിനമിവ പീതപരാഗപതലഭരവലയിതമൂലം ॥ 3 ॥
തരലദൃഗഞ്ചലചലനമനോഹരവദനജനിതരതിരാഗം ।
സ്ഫുടകമലോദരഖേലിതഖഞ്ജനയുഗമിവ ശരദി തഡാഗം ॥ 4 ॥
വദനകമലപരിശീലനമിലിതമിഹിരസമകുണ്ഡലശോഭം ।
സ്മിതരുചിരുചിരസമുല്ലസിതാധരപല്ലവകൃതരതിലോഭം ॥ 5 ॥
ശശികിരണച്ഛുരിതോദരജലധരസുന്ദരസകുസുമകേശം ।
തിമിരോദിതവിധുമണ്ഡലനിർമലമലയജതിലകനിവേശം ॥ 6 ॥
വിപുലപുലകഭരദന്തുരിതം രതികേലികലാഭിരധീരം ।
മണിഗണകിരണസമൂഹസമുജ്ജ്വലഭൂഷണസുഭഗശരീരം ॥ 7 ॥
ശ്രീജയദേവഭണിതവിഭവദ്വിഗുണീകൃതഭൂഷണഭാരം ।
പ്രണമത ഹൃദി സുചിരം വിനിധായ ഹരിം സുകൃതോദയസാരം ॥ 8 ॥
അതിക്രമ്യാപാങ്ഗം ശ്രവണപഥപര്യന്തഗമന
പ്രയാസേനേവാക്ഷ്ണോസ്തരലതരതാരം പതിതയോഃ ।
ഇദാനീം രാധായാഃ പ്രിയതമസമാലോകസമയേ
പപാത സ്വേദാംഭഃ പ്രസര ഇവ ഹർഷാശ്രുനികരഃ ॥ 66 ॥
ഭവന്ത്യാസ്തല്പാന്തം കൃതകപടകണ്ഡൂതിപിഹിത
സ്മിതം യാതേ ഗേഹാദ്ബഹിരവഹിതാലീപരിജനേ ।
പ്രിയാസ്യം പശ്യന്ത്യാഃ സ്മരശരസമാകൂതസുഭഗം
സലജ്ജാ ലജ്ജാപി വ്യഗമദിവ ദൂരം മൃഗദൃശഃ ॥ 67 ॥
॥ ഇതി ശ്രീഗീതഗോവിന്ദേ രാധികാമിലനേ സാനന്ദദാമോദരോ നാമൈകാദശഃ സർഗഃ ॥