ശ്രീമദ് ഭാഗവതം (മൂലം) / ദശമഃ സ്കന്ധഃ (ഉത്തരാർദ്ധഃ) (സ്കന്ധം 10 ഉത്തരാർദ്ധം) / അദ്ധ്യായം 76
← സ്കന്ധം 10 ഉത്തരാർദ്ധം : അദ്ധ്യായം 75 | സ്കന്ധം 10 ഉത്തരാർദ്ധം : അദ്ധ്യായം 77 → |
ശ്രീമദ് ഭാഗവതം (മൂലം) / ദശമഃ സ്കന്ധഃ (പൂർവ്വാർദ്ധഃ) (സ്കന്ധം 10 ഉത്തരാർദ്ധം) / അദ്ധ്യായം 76[തിരുത്തുക]
ശ്രീശുക ഉവാച
അഥാന്യദപി കൃഷ്ണസ്യ ശൃണു കർമ്മാദ്ഭുതം നൃപ ।
ക്രീഡാനരശരീരസ്യ യഥാ സൌഭപതിർഹതഃ ॥ 1 ॥
ശിശുപാലസഖഃ ശാല്വോ രുക്മിണ്യുദ്വാഹ ആഗതഃ ।
യദുഭിർന്നിർജ്ജിതഃ സംഖ്യേ ജരാസന്ധാദയസ്തഥാ ॥ 2 ॥
ശാല്വഃ പ്രതിജ്ഞാമകരോച്ഛൃണ്വതാം സർവ്വഭൂഭുജാം ।
അയാദവീം ക്ഷ്മാം കരിഷ്യേ പൌരുഷം മമ പശ്യത ॥ 3 ॥
ഇതി മൂഢഃ പ്രതിജ്ഞായ ദേവം പശുപതിം പ്രഭും ।
ആരാധയാമാസ നൃപഃ പാംസുമുഷ്ടിം സകൃദ്ഗ്രസൻ ॥ 4 ॥
സംവത്സരാന്തേ ഭഗവാനാശുതോഷ ഉമാപതിഃ ।
വരേണ ച്ഛന്ദയാമാസ ശാല്വം ശരണമാഗതം ॥ 5 ॥
ദേവാസുരമനുഷ്യാണാം ഗന്ധർവ്വോരഗരക്ഷസാം ।
അഭേദ്യം കാമഗം വവ്രേ സ യാനം വൃഷ്ണിഭീഷണം ॥ 6 ॥
തഥേതി ഗിരിശാദിഷ്ടോ മയഃ പരപുരംജയഃ ।
പുരം നിർമ്മായ ശാല്വായ പ്രാദാത് സൗഭമയസ്മയം ॥ 7 ॥
സ ലബ്ധ്വാ കാമഗം യാനം തമോധാമ ദുരാസദം ।
യയൌ ദ്വാരവതീം ശാല്വോ വൈരം വൃഷ്ണികൃതം സ്മരൻ ॥ 8 ॥
നിരുധ്യ സേനയാ ശാല്വോ മഹത്യാ ഭരതർഷഭ ।
പുരീം ബഭഞ്ജോപവനാന്യുദ്യാനാനി ച സർവ്വശഃ ॥ 9 ॥
സ ഗോപുരാണി ദ്വാരാണി പ്രാസാദാട്ടാലതോളികാഃ ।
വിഹാരാൻ സ വിമാനാഗ്ര്യാന്നിപേതുഃ ശസ്ത്രവൃഷ്ടയഃ ॥ 10 ॥
ശിലാ ദ്രുമാശ്ചാശനയഃ സർപ്പാ ആസാരശർക്കരാഃ ।
പ്രചണ്ഡശ്ചക്രവാതോഽഭൂദ്രജസാഽഽച്ഛാദിതാ ദിശഃ ॥ 11 ॥
ഇത്യർദ്ദ്യമാനാ സൌഭേന കൃഷ്ണസ്യ നഗരീ ഭൃശം ।
നാഭ്യപദ്യത ശം രാജംസ്ത്രിപുരേണ യഥാ മഹീ ॥ 12 ॥
പ്രദ്യുമ്നോ ഭഗവാൻ വീക്ഷ്യ ബാധ്യമാനാ നിജാഃ പ്രജാഃ ।
മാ ഭൈഷ്ടേത്യഭ്യധാദ് വീരോ രഥാരൂഢോ മഹായശാഃ ॥ 13 ॥
സാത്യകിശ്ചാരുദേഷ്ണശ്ച സാംബോഽക്രൂരഃ സഹാനുജഃ ।
ഹാർദ്ദിക്യോ ഭാനുവിന്ദശ്ച ഗദശ്ച ശുകസാരണൌ ॥ 14 ॥
അപരേ ച മഹേഷ്വാസാ രഥയൂഥപയൂഥപാഃ ।
നിര്യയുർദ്ദംശിതാ ഗുപ്താ രഥേഭാശ്വപദാതിഭിഃ ॥ 15 ॥
തതഃ പ്രവവൃതേ യുദ്ധം ശാല്വാനാം യദുഭിഃ സഹ ।
യഥാസുരാണാം വിബുധൈസ്തുമുലം ലോമഹർഷണം ॥ 16 ॥
താശ്ച സൌഭപതേർമ്മായാ ദിവ്യാസ്ത്രൈ രുക്മിണീസുതഃ ।
ക്ഷണേന നാശയാമാസ നൈശം തമ ഇവോഷ്ണഗുഃ ॥ 17 ॥
വിവ്യാധ പഞ്ചവിംശത്യാ സ്വർണ്ണപുംഖൈരയോമുഖൈഃ ।
ശാല്വസ്യ ധ്വജിനീപാലം ശരൈഃ സന്നതപർവ്വഭിഃ ॥ 18 ॥
ശതേനാതാഡയച്ഛാല്വമേകൈകേനാസ്യ സൈനികാൻ ।
ദശഭിർദ്ദശഭിർന്നേതൄൻ വാഹനാനി ത്രിഭിസ്ത്രിഭിഃ ॥ 19 ॥
തദദ്ഭുതം മഹത്കർമ്മ പ്രദ്യുമ്നസ്യ മഹാത്മനഃ ।
ദൃഷ്ട്വാ തം പൂജയാമാസുഃ സർവ്വേ സ്വപരസൈനികാഃ ॥ 20 ॥
ബഹുരൂപൈകരൂപം തദ്ദൃശ്യതേ ന ച ദൃശ്യതേ ।
മായാമയം മയകൃതം ദുർവ്വിഭാവ്യം പരൈരഭൂത് ॥ 21 ॥
ക്വചിദ്ഭൂമൌ ക്വചിദ് വ്യോമ്നി ഗിരിമൂർദ്ധ്നി ജലേ ക്വചിത് ।
അലാതചക്രവദ്ഭ്രാമ്യത് സൗഭം തദ്ദുരവസ്ഥിതം ॥ 22 ॥
യത്ര യത്രോപലക്ഷ്യേത സസൌഭഃ സഹ സൈനികഃ ।
ശാല്വസ്തതസ്തതോഽമുഞ്ചഞ്ഛരാൻ സാത്വതയൂഥപാഃ ॥ 23 ॥
ശരൈരഗ്ന്യർക്കസംസ്പർശൈരാശീവിഷദുരാസദൈഃ ।
പീഡ്യമാനപുരാനീകഃ ശാല്വോഽമുഹ്യത്പരേരിതൈഃ ॥ 24 ॥
ശാല്വാനീകപശസ്ത്രൌഘൈർവൃഷ്ണിവീരാ ഭൃശാർദ്ദിതാഃ ।
ന തത്യജൂ രണം സ്വം സ്വം ലോകദ്വയജിഗീഷവഃ ॥ 25 ॥
ശാല്വാമാത്യോ ദ്യുമാൻ നാമ പ്രദ്യുമ്നം പ്രാക്പ്രപീഡിതഃ ।
ആസാദ്യ ഗദയാ മൌർവ്വ്യാ വ്യാഹത്യ വ്യനദദ്ബലീ ॥ 26 ॥
പ്രദ്യുമ്നം ഗദയാ ശീർണ്ണവക്ഷഃസ്ഥലമരിന്ദമം ।
അപോവാഹ രണാത് സൂതോ ധർമ്മവിദ് ദാരുകാത്മജഃ ॥ 27 ॥
ലബ്ധസംജ്ഞോ മുഹൂർത്തേന കാർഷ്ണിഃ സാരഥിമബ്രവീത് ।
അഹോ അസാധ്വിദം സൂത യദ് രണാൻമേഽപസർപ്പണം ॥ 28 ॥
ന യദൂനാം കുലേ ജാതഃ ശ്രൂയതേ രണവിച്യുതഃ ।
വിനാ മത്ക്ലീബചിത്തേന സൂതേന പ്രാപ്തകിൽബിഷാത് ॥ 29 ॥
കിം നു വക്ഷ്യേഽഭിസംഗമ്യ പിതരൌ രാമകേശവൌ ।
യുദ്ധാത് സമ്യഗപക്രാന്തഃ പൃഷ്ടസ്തത്രാത്മനഃ ക്ഷമം ॥ 30 ॥
വ്യക്തം മേ കഥയിഷ്യന്തി ഹസന്ത്യോ ഭ്രാതൃജാമയഃ ।
ക്ലൈബ്യം കഥം കഥം വീര തവാന്യൈഃ കഥ്യതാം മൃധേ ॥ 31 ॥
സാരഥിരുവാച
ധർമ്മം വിജാനതാഽഽയുഷ്മൻ കൃതമേതൻമയാ വിഭോ ।
സൂതഃ കൃച്ഛ്രഗതം രക്ഷേദ് രഥിനം സാരഥിം രഥീ ॥ 32 ॥
ഏതദ്വിദിത്വാ തു ഭവാൻ മയാപോവാഹിതോ രണാത് ।
ഉപസൃഷ്ടഃ പരേണേതി മൂർച്ഛിതോ ഗദയാ ഹതഃ ॥ 33 ॥