ശ്രീമദ് ഭാഗവതം (മൂലം) / ദശമഃ സ്കന്ധഃ (ഉത്തരാർദ്ധഃ) (സ്കന്ധം 10 ഉത്തരാർദ്ധം) / അദ്ധ്യായം 67
← സ്കന്ധം 10 ഉത്തരാർദ്ധം : അദ്ധ്യായം 66 | സ്കന്ധം 10 ഉത്തരാർദ്ധം : അദ്ധ്യായം 68 → |
ശ്രീമദ് ഭാഗവതം (മൂലം) / ദശമഃ സ്കന്ധഃ (പൂർവ്വാർദ്ധഃ) (സ്കന്ധം 10 ഉത്തരാർദ്ധം) / അദ്ധ്യായം 67[തിരുത്തുക]
രാജോവാച
ഭുയോഽഹം ശ്രോതുമിച്ഛാമി രാമസ്യാദ്ഭുതകർമ്മണഃ ।
അനന്തസ്യാപ്രമേയസ്യ യദന്യത്കൃതവാൻ പ്രഭുഃ ॥ 1 ॥
ശ്രീശുക ഉവാച
നരകസ്യ സഖാ കശ്ചിദ് ദ്വിവിദോ നാമ വാനരഃ ।
സുഗ്രീവസചിവഃ സോഽഥ ഭ്രാതാ മൈന്ദസ്യ വീര്യവാൻ ॥ 2 ॥
സഖ്യുഃ സോഽപചിതിം കുർവ്വൻ വാനരോ രാഷ്ട്രവിപ്ലവം ।
പുരഗ്രാമാകരാൻ ഘോഷാനദഹദ് വഹ്നിമുത്സൃജൻ ॥ 3 ॥
ക്വചിത് സ ശൈലാനുത്പാട്യ തൈർദ്ദേശാൻ സമചൂർണ്ണയത് ।
ആനർത്താൻ സുതരാമേവ യത്രാസ്തേ മിത്രഹാ ഹരിഃ ॥ 4 ॥
ക്വചിത് സമുദ്രമധ്യസ്ഥോ ദോർഭ്യാമുത്ക്ഷിപ്യ തജ്ജലം ।
ദേശാൻ നാഗായുതപ്രാണോ വേലാകൂലാനമജ്ജയത് ॥ 5 ॥
ആശ്രമാൻ ഋഷിമുഖ്യാനാം കൃത്വാ ഭഗ്നവനസ്പതീൻ ।
അദൂഷയച്ഛകൃൻമൂത്രൈരഗ്നീൻ വൈതാനികാൻ ഖലഃ ॥ 6 ॥
പുരുഷാൻ യോഷിതോ ദൃപ്തഃ ക്ഷ്മാഭൃദ് ദ്രോണീഗുഹാസു സഃ ।
നിക്ഷിപ്യ ചാപ്യധാച്ഛൈലൈഃ പേശസ്കാരീവ കീടകം ॥ 7 ॥
ഏവം ദേശാൻ വിപ്രകുർവ്വൻ ദൂഷയംശ്ച കുലസ്ത്രിയഃ ।
ശ്രുത്വാ സുലളിതം ഗീതം ഗിരിം രൈവതകം യയൌ ॥ 8 ॥
തത്രാപശ്യദ്യദുപതിം രാമം പുഷ്കരമാലിനം ।
സുദർശനീയസർവാംഗം ലലനായൂഥമധ്യഗം ॥ 9 ॥
ഗായന്തം വാരുണീം പീത്വാ മദവിഹ്വലലോചനം ।
വിഭ്രാജമാനം വപുഷാ പ്രഭിന്നമിവ വാരണം ॥ 10 ॥
ദുഷ്ടഃ ശാഖാമൃഗഃ ശാഖാമാരൂഢഃ കമ്പയൻ ദ്രുമാൻ ।
ചക്രേ കിലകിലാശബ്ദമാത്മാനം സംപ്രദർശയൻ ॥ 11 ॥
തസ്യ ധാർഷ്ട്യം കപേർവ്വീക്ഷ്യ തരുണ്യോ ജാതിചാപലാഃ ।
ഹാസ്യപ്രിയാ വിജഹസുർബ്ബലദേവപരിഗ്രഹാഃ ॥ 12 ॥
താ ഹേലയാമാസ കപിർഭ്രൂക്ഷേപൈഃ സമ്മുഖാദിഭിഃ ।
ദർശയൻ സ്വഗുദം താസാം രാമസ്യ ച നിരീക്ഷതഃ ॥ 13 ॥
തം ഗ്രാവ്ണാ പ്രാഹരത്ക്രുദ്ധോ ബലഃ പ്രഹരതാം വരഃ ।
സ വഞ്ചയിത്വാ ഗ്രാവാണം മദിരാകലശം കപിഃ ॥ 14 ॥
ഗൃഹീത്വാ ഹേലയാമാസ ധൂർത്തസ്തം കോപയൻ ഹസൻ ।
നിർഭിദ്യ കലശം ദുഷ്ടോ വാസാംസ്യാസ്ഫാലയദ്ബലം ॥ 15 ॥
കദർത്ഥീകൃത്യ ബലവാൻ വിപ്രചക്രേ മദോദ്ധതഃ ।
തം തസ്യാവിനയം ദൃഷ്ട്വാ ദേശാംശ്ച തദുപദ്രുതാൻ ॥ 16 ॥
ക്രുദ്ധോ മുസലമാദത്ത ഹലം ചാരിജിഘാംസയാ ।
ദ്വിവിദോഽപി മഹാവീര്യഃ സാലമുദ്യമ്യ പാണിനാ ॥ 17 ॥
അഭ്യേത്യ തരസാ തേന ബലം മൂർദ്ധന്യതാഡയത് ।
തം തു സങ്കർഷണോ മൂർദ്ധ്നി പതന്തമചലോ യഥാ ॥ 18 ॥
പ്രതിജഗ്രാഹ ബലവാൻ സുനന്ദേനാഹനച്ച തം ।
മുസലാഹതമസ്തിഷ്കോ വിരേജേ രക്തധാരയാ ॥ 19 ॥
ഗിരിർ യഥാ ഗൈരികയാ പ്രഹാരം നാനുചിന്തയൻ ।
പുനരന്യം സമുത്ക്ഷിപ്യ കൃത്വാ നിഷ്പത്രമോജസാ ॥ 20 ॥
തേനാഹനത് സുസംക്രുദ്ധസ്തം ബലഃ ശതധാച്ഛിനത് ।
തതോഽന്യേന രുഷാ ജഘ്നേ തം ചാപി ശതധാച്ഛിനത് ॥ 21 ॥
ഏവം യുധ്യൻ ഭഗവതാ ഭഗ്നേ ഭഗ്നേ പുനഃ പുനഃ ।
ആകൃഷ്യ സർവ്വതോ വൃക്ഷാൻ നിർവൃക്ഷമകരോദ് വനം ॥ 22 ॥
തതോഽമുഞ്ചച്ഛിലാവർഷം ബലസ്യോപര്യമർഷിതഃ ।
തത് സർവം ചൂർണ്ണയാമാസ ലീലയാ മുസലായുധഃ ॥ 23 ॥
സ ബാഹൂ താലസങ്കാശൌ മുഷ്ടീകൃത്യ കപീശ്വരഃ ।
ആസാദ്യ രോഹിണീപുത്രം താഭ്യാം വക്ഷസ്യരൂരുജത് ॥ 24 ॥
യാദവേന്ദ്രോഽപി തം ദോർഭ്യാം ത്യക്ത്വാ മുസലലാംഗലേ ।
ജത്രാവഭ്യർദ്ദയത്ക്രുദ്ധഃ സോഽപതദ് രുധിരം വമൻ ॥ 25 ॥
ചകമ്പേ തേന പതതാ സടങ്കഃ സവനസ്പതിഃ ।
പർവ്വതഃ കുരുശാർദ്ദൂല വായുനാ നൌരിവാംഭസി ॥ 26 ॥
ജയശബ്ദോ നമഃ ശബ്ദഃ സാധു സാധ്വിതി ചാംബരേ ।
സുരസിദ്ധമുനീന്ദ്രാണാമാസീത്കുസുമവർഷിണാം ॥ 27 ॥
ഏവം നിഹത്യ ദ്വിവിദം ജഗദ് വ്യതികരാവഹം ।
സംസ്തൂയമാനോ ഭഗവാൻ ജനൈഃ സ്വപുരമാവിശത് ॥ 28 ॥