ശ്രീമദ് ഭാഗവതം (മൂലം) / ദശമഃ സ്കന്ധഃ (ഉത്തരാർദ്ധഃ) (സ്കന്ധം 10 ഉത്തരാർദ്ധം) / അദ്ധ്യായം 65

← സ്കന്ധം 10 ഉത്തരാർദ്ധം : അദ്ധ്യായം 64

സ്കന്ധം 10 ഉത്തരാർദ്ധം : അദ്ധ്യായം 66 →

ശ്രീമദ് ഭാഗവതം (മൂലം) / ദശമഃ സ്കന്ധഃ (പൂർവ്വാർദ്ധഃ) (സ്കന്ധം 10 ഉത്തരാർദ്ധം) / അദ്ധ്യായം 65

ശ്രീശുക ഉവാച

ബലഭദ്രഃ കുരുശ്രേഷ്ഠ ഭഗവാൻ രഥമാസ്ഥിതഃ ।
സുഹൃദ്ദിദൃക്ഷുരുത്കണ്ഠഃ പ്രയയൌ നന്ദഗോകുലം ॥ 1 ॥

പരിഷ്വക്തശ്ചിരോത്കണ്ഠൈർഗ്ഗോപൈർഗ്ഗോപീഭിരേവ ച ।
രാമോഽഭിവാദ്യ പിതരാവാശീർഭിരഭിനന്ദിതഃ ॥ 2 ॥

ചിരം നഃ പാഹി ദാശാർഹ സാനുജോ ജഗദീശ്വരഃ ।
ഇത്യാരോപ്യാങ്കമാലിങ്ഗ്യ നേത്രൈഃ സിഷിചതുർജ്ജലൈഃ ॥ 3 ॥

ഗോപവൃദ്ധാംശ്ച വിധിവദ്യവിഷ്ഠൈരഭിവന്ദിതഃ ।
യഥാവയോ യഥാസഖ്യം യഥാസംബന്ധമാത്മനഃ ॥ 4 ॥

സമുപേത്യാഥ ഗോപാലാൻ ഹാസ്യഹസ്തഗ്രഹാദിഭിഃ ।
വിശ്രാന്തം സുഖമാസീനം പപ്രച്ഛുഃ പര്യുപാഗതാഃ ॥ 5 ॥

പൃഷ്ടാശ്ചാനാമയം സ്വേഷു പ്രേമഗദ്ഗദയാ ഗിരാ ।
കൃഷ്ണേ കമലപത്രാക്ഷേ സന്ന്യസ്താഖിലരാധസഃ ॥ 6 ॥

കച്ചിന്നോ ബാന്ധവാ രാമ സർവ്വേ കുശലമാസതേ ।
കച്ചിത് സ്മരഥ നോ രാമ യൂയം ദാരസുതാന്വിതാഃ ॥ 7 ॥

ദിഷ്ട്യാ കംസോ ഹതഃ പാപോ ദിഷ്ട്യാ മുക്താഃ സുഹൃജ്ജനാഃ ।
നിഹത്യ നിർജ്ജിത്യ രിപൂൻ ദിഷ്ട്യാ ദുർഗ്ഗം സമാശ്രിതാഃ ॥ 8 ॥

ഗോപ്യോ ഹസന്ത്യഃ പപ്രച്ഛൂ രാമസന്ദർശനാദൃതാഃ ।
കച്ചിദാസ്തേ സുഖം കൃഷ്ണഃ പുരസ്ത്രീജനവല്ലഭഃ ॥ 9 ॥

കച്ചിത് സ്മരതി വാ ബന്ധൂൻ പിതരം മാതരം ച സഃ ।
അപ്യസൌ മാതരം ദ്രഷ്ടും സകൃദപ്യാഗമിഷ്യതി ।
അപി വാ സ്മരതേഽസ്മാകമനുസേവാം മഹാഭുജഃ ॥ 10 ॥

മാതരം പിതരം ഭ്രാതൄൻ പതീൻ പുത്രാൻ സ്വസൄരപി ।
യദർത്ഥേ ജഹിമ ദാശാർഹ ദുസ്ത്യജാൻ സ്വജനാൻ പ്രഭോ ॥ 11 ॥

താ നഃ സദ്യഃ പരിത്യജ്യ ഗതഃ സഞ്ഛിന്നസൌഹൃദഃ ।
കഥം നു താദൃശം സ്ത്രീഭിർന്ന ശ്രദ്ധീയേത ഭാഷിതം ॥ 12 ॥

     കഥം നു ഗൃഹ്ണന്ത്യനവസ്ഥിതാത്മനോ
          വചഃ കൃതഘ്നസ്യ ബുധാഃ പുരസ്ത്രിയഃ ।
     ഗൃഹ്ണന്തി വൈ ചിത്രകഥസ്യ സുന്ദര-
          സ്മിതാവലോകോച്ഛ്വസിതസ്മരാതുരാഃ ॥ 13 ॥

കിം നസ്തത്കഥയാ ഗോപ്യഃ കഥാഃ കഥയതാപരാഃ ।
യാത്യസ്മാഭിർവ്വിനാ കാലോ യദി തസ്യ തഥൈവ നഃ ॥ 14 ॥

ഇതി പ്രഹസിതം ശൌരേർജ്ജൽപിതം ചാരു വീക്ഷിതം ।
ഗതിം പ്രേമപരിഷ്വംഗം സ്മരന്ത്യോ രുരുദുഃ സ്ത്രിയഃ ॥ 15 ॥

സങ്കർഷണസ്താഃ കൃഷ്ണസ്യ സന്ദേശൈർഹൃദയംഗമൈഃ ।
സാന്ത്വയാമാസ ഭഗവാൻ നാനാനുനയകോവിദഃ ॥ 16 ॥

ദ്വൌ മാസൌ തത്ര ചാവാത്സീൻമധും മാധവമേവ ച ।
രാമഃ ക്ഷപാസു ഭഗവാൻ ഗോപീനാം രതിമാവഹൻ ॥ 17 ॥

പൂർണ്ണചന്ദ്രകലാമൃഷ്ടേ കൌമുദീഗന്ധവായുനാ ।
യമുനോപവനേ രേമേ സേവിതേ സ്ത്രീഗണൈർവൃതഃ ॥ 18 ॥

വരുണപ്രേഷിതാ ദേവീ വാരുണീ വൃക്ഷകോടരാത് ।
പതന്തീ തദ്വനം സർവ്വം സ്വഗന്ധേനാധ്യവാസയത് ॥ 19 ॥

തം ഗന്ധം മധുധാരായാ വായുനോപഹൃതം ബലഃ ।
ആഘ്രായോപഗതസ്തത്ര ലലനാഭിഃ സമം പപൌ ॥ 20 ॥

ഉപഗീയമാനചരിതോ വനിതാഭിർഹലായുധഃ ।
വനേഷു വ്യചരത്ക്ഷീബോ മദവിഹ്വലലോചനഃ ॥ 21 ॥

സ്രഗ്വ്യേകകുണ്ഡലോ മത്തോ വൈജയന്ത്യാ ച മാലയാ ।
ബിഭ്രത് സ്മിതമുഖാംഭോജം സ്വേദപ്രാലേയഭൂഷിതം ॥ 22 ॥

സ ആജുഹാവ യമുനാം ജലക്രീഡാർത്ഥമീശ്വരഃ ।
നിജം വാക്യമനാദൃത്യ മത്ത ഇത്യാപഗാം ബലഃ ।
അനാഗതാം ഹലാഗ്രേണ കുപിതോ വിചകർഷ ഹ ॥ 23 ॥

പാപേ ത്വം മാമവജ്ഞായ യന്നായാസി മയാഽഽഹുതാ ।
നേഷ്യേ ത്വാം ലാംഗലാഗ്രേണ ശതധാ കാമചാരിണീം ॥ 24 ॥

ഏവം നിർഭർത്സിതാ ഭീതാ യമുനാ യദുനന്ദനം ।
ഉവാച ചകിതാ വാചം പതിതാ പാദയോർന്നൃപ ॥ 25 ॥

രാമ രാമ മഹാബാഹോ ന ജാനേ തവ വിക്രമം ।
യസ്യൈകാംശേന വിധൃതാ ജഗതീ ജഗതഃ പതേ ॥ 26 ॥

പരം ഭാവം ഭഗവതോ ഭഗവൻ മാമജാനതീം ।
മോക്തുമർഹസി വിശ്വാത്മൻ പ്രപന്നാം ഭക്തവത്സല ॥ 27 ॥

തതോ വ്യമുഞ്ചദ് യമുനാം യാചിതോ ഭഗവാൻ ബലഃ ।
വിജഗാഹ ജലം സ്ത്രീഭിഃ കരേണുഭിരിവേഭരാട് ॥ 28 ॥

കാമം വിഹൃത്യ സലിലാദുത്തീർണ്ണായാസിതാംബരേ ।
ഭൂഷണാനി മഹാർഹാണി ദദൌ കാന്തിഃ ശുഭാം സ്രജം ॥ 29 ॥

വസിത്വാ വാസസീ നീലേ മാലാമാമുച്യ കാഞ്ചനീം ।
രേജേ സ്വലങ്കൃതോ ലിപ്തോ മാഹേന്ദ്ര ഇവ വാരണഃ ॥ 30 ॥

അദ്യാപി ദൃശ്യതേ രാജൻ യമുനാഽഽകൃഷ്ട വർത്മനാ ।
ബലസ്യാനന്തവീര്യസ്യ വീര്യം സൂചയതീവ ഹി ॥ 31 ॥

ഏവം സർവ്വാ നിശാ യാതാ ഏകേവ രമതോ വ്രജേ ।
രാമസ്യാക്ഷിപ്തചിത്തസ്യ മാധുര്യൈർവ്രജയോഷിതാം ॥ 32 ॥