ശ്രീമദ് ഭാഗവതം (മൂലം) / ഏകാദശഃ സ്കന്ധഃ (സ്കന്ധം 11) / അദ്ധ്യായം 15

← സ്കന്ധം 11 : അദ്ധ്യായം 14

സ്കന്ധം 11 : അദ്ധ്യായം 16 →

ശ്രീമദ് ഭാഗവതം (മൂലം) / ഏകാദശഃ സ്കന്ധഃ (സ്കന്ധം 11) / അദ്ധ്യായം 15

ശ്രീഭഗവാനുവാച

ജിതേന്ദ്രിയസ്യ യുക്തസ്യ ജിതശ്വാസസ്യ യോഗിനഃ ।
മയി ധാരയതശ്ചേത ഉപതിഷ്ഠന്തി സിദ്ധയഃ ॥ 1 ॥

ഉദ്ധവ ഉവാച

കയാ ധാരണയാ കാ സ്വിത്കഥം വാ സിദ്ധിരച്യുത ।
കതി വാ സിദ്ധയോ ബ്രൂഹി യോഗിനാം സിദ്ധിദോ ഭവാൻ ॥ 2 ॥

ശ്രീഭഗവാനുവാച

സിദ്ധയോഽഷ്ടാദശ പ്രോക്താ ധാരണായോഗപാരഗൈഃ ।
താസാമഷ്ടൌ മത്പ്രധാനാ ദശൈവ ഗുണഹേതവഃ ॥ 3 ॥

അണിമാ മഹിമാ മൂർത്തേർല്ലഘിമാ പ്രാപ്തിരിന്ദ്രിയൈഃ ।
പ്രാകാമ്യം ശ്രുതദൃഷ്ടേഷു ശക്തിപ്രേരണമീശിതാ ॥ 4 ॥

ഗുണേഷ്വസംഗോ വശിതാ യത്കാമസ്തദവസ്യതി ।
ഏതാ മേ സിദ്ധയഃ സൗമ്യ അഷ്ടാവൌത്പത്തികാ മതാഃ ॥ 5 ॥

അനൂർമ്മിമത്ത്വം ദേഹേഽസ്മിൻ ദൂരശ്രവണദർശനം ।
മനോജവഃ കാമരൂപം പരകായപ്രവേശനം ॥ 6 ॥

സ്വച്ഛന്ദമൃത്യുർദ്ദേവാനാം സഹക്രീഡാനുദർശനം ।
യഥാസങ്കൽപസംസിദ്ധിരാജ്ഞാപ്രതിഹതാഗതിഃ ॥ 7 ॥

ത്രികാലജ്ഞത്വമദ്വന്ദ്വം പരചിത്താദ്യഭിജ്ഞതാ ।
അഗ്ന്യർക്കാംബുവിഷാദീനാം പ്രതിഷ്ടംഭോഽപരാജയഃ ॥ 8 ॥

ഏതാശ്ചോദ്ദേശതഃ പ്രോക്താ യോഗധാരണസിദ്ധയഃ ।
യയാ ധാരണയാ യാ സ്യാദ് യഥാ വാ സ്യാന്നിബോധ മേ ॥ 9 ॥

ഭൂതസൂക്ഷ്മാത്മനി മയി തൻമാത്രം ധാരയേൻമനഃ ।
അണിമാനമവാപ്നോതി തൻമാത്രോപാസകോ മമ ॥ 10 ॥

മഹത്യാത്മൻമയി പരേ യഥാസംസ്ഥം മനോ ദധത് ।
മഹിമാനമവാപ്നോതി ഭൂതാനാം ച പൃഥക് പൃഥക് ॥ 11 ॥

പരമാണുമയേ ചിത്തം ഭൂതാനാം മയി രഞ്ജയൻ ।
കാലസൂക്ഷ്മാർത്ഥതാം യോഗീ ലഘിമാനമവാപ്നുയാത് ॥ 12 ॥

ധാരയൻ മയ്യഹം തത്ത്വേ മനോ വൈകാരികേഽഖിലം ।
സർവ്വേന്ദ്രിയാണാമാത്മത്വം പ്രാപ്തിം പ്രാപ്നോതി മൻമനാഃ ॥ 13 ॥

മഹത്യാത്മനി യഃ സൂത്രേ ധാരയേൻമയി മാനസം ।
പ്രാകാമ്യം പാരമേഷ്ഠ്യം മേ വിന്ദതേഽവ്യക്തജൻമനഃ ॥ 14 ॥

വിഷ്ണൌ ത്ര്യധീശ്വരേ ചിത്തം ധാരയേത്കാലവിഗ്രഹേ ।
സ ഈശിത്വമവാപ്നോതി ക്ഷേത്രജ്ഞക്ഷേത്രചോദനാം ॥ 15 ॥

നാരായണേ തുരീയാഖ്യേ ഭഗവച്ഛബ്ദശബ്ദിതേ ।
മനോ മയ്യാദധദ് യോഗീ മദ്ധർമ്മാ വശിതാമിയാത് ॥ 16 ॥

നിർഗ്ഗുണേ ബ്രഹ്മണി മയി ധാരയൻ വിശദം മനഃ ।
പരമാനന്ദമാപ്നോതി യത്ര കാമോഽവസീയതേ ॥ 17 ॥

ശ്വേതദ്വീപപതൌ ചിത്തം ശുദ്ധേ ധർമ്മമയേ മയി ।
ധാരയഞ്ഛ്വേതതാം യാതി ഷഡൂർമ്മിരഹിതോ നരഃ ॥ 18 ॥

മയ്യാകാശാത്മനി പ്രാണേ മനസാ ഘോഷമുദ്വഹൻ ।
തത്രോപലബ്ധാ ഭൂതാനാം ഹംസോ വാചഃ ശൃണോത്യസൌ ॥ 19 ॥

ചക്ഷുസ്ത്വഷ്ടരി സംയോജ്യ ത്വഷ്ടാരമപി ചക്ഷുഷി ।
മാം തത്ര മനസാ ധ്യായൻ വിശ്വം പശ്യതി സൂക്ഷ്മദൃക് ॥ 20 ॥

മനോ മയി സുസംയോജ്യ ദേഹം തദനുവായുനാ ।
മദ്ധാരണാനുഭാവേന തത്രാത്മാ യത്ര വൈ മനഃ ॥ 21 ॥

യദാ മന ഉപാദായ യദ്യദ് രൂപം ബുഭൂഷതി ।
തത്തദ്ഭവേൻമനോരൂപം മദ്യോഗബലമാശ്രയഃ ॥ 22 ॥

പരകായം വിശൻ സിദ്ധ ആത്മാനം തത്ര ഭാവയേത് ।
പിണ്ഡം ഹിത്വാ വിശേത്പ്രാണോ വായുഭൂതഃ ഷഡങ്ഘ്രിവത് ॥ 23 ॥

പാർഷ്ണ്യാഽഽപീഡ്യ ഗുദം പ്രാണം ഹൃദുരഃകണ്ഠമൂർദ്ധസു ।
ആരോപ്യ ബ്രഹ്മരന്ധ്രേണ ബ്രഹ്മ നീത്വോത്സൃജേത്തനും ॥ 24 ॥

വിഹരിഷ്യൻ സുരാക്രീഡേ മത് സ്ഥം സത്ത്വം വിഭാവയേത് ।
വിമാനേനോപതിഷ്ഠന്തി സത്ത്വവൃത്തീഃ സുരസ്ത്രിയഃ ॥ 25 ॥

യഥാ സങ്കൽപയേദ്ബുദ്ധ്യാ യദാ വാ മത്പരഃ പുമാൻ ।
മയി സത്യേ മനോ യുഞ്ജംസ്തഥാ തത്സമുപാശ്നുതേ ॥ 26 ॥

യോ വൈ മദ്ഭാവമാപന്ന ഈശിതുർവ്വശിതുഃ പുമാൻ ।
കുതശ്ചിന്ന വിഹന്യേത തസ്യ ചാജ്ഞാ യഥാ മമ ॥ 27 ॥

മദ്ഭക്ത്യാ ശുദ്ധസത്ത്വസ്യ യോഗിനോ ധാരണാവിദഃ ।
തസ്യ ത്രൈകാലികീ ബുദ്ധിർജ്ജൻമമൃത്യൂപബൃംഹിതാ ॥ 28 ॥

അഗ്ന്യാദിഭിർന്ന ഹന്യേത മുനേർ യോഗമയം വപുഃ ।
മദ്യോഗശ്രാന്തചിത്തസ്യ യാദസാമുദകം യഥാ ॥ 29 ॥

മദ് വിഭൂതീരഭിധ്യായൻ ശ്രീവത്സാസ്ത്രവിഭൂഷിതാഃ ।
ധ്വജാതപത്രവ്യജനൈഃ സ ഭവേദപരാജിതഃ ॥ 30 ॥

ഉപാസകസ്യ മാമേവം യോഗധാരണയാ മുനേഃ ।
സിദ്ധയഃ പൂർവ്വകഥിതാ ഉപതിഷ്ഠന്ത്യശേഷതഃ ॥ 31 ॥

ജിതേന്ദ്രിയസ്യ ദാന്തസ്യ ജിതശ്വാസാത്മനോ മുനേഃ ।
മദ്ധാരണാം ധാരയതഃ കാ സാ സിദ്ധിഃ സുദുർല്ലഭാ ॥ 32 ॥

അന്തരായാൻ വദന്ത്യേതാ യുഞ്ജതോ യോഗമുത്തമം ।
മയാ സമ്പദ്യമാനസ്യ കാലക്ഷപണഹേതവഃ ॥ 33 ॥

ജൻമൌഷധിതപോമന്ത്രൈർ യാവതീരിഹ സിദ്ധയഃ ।
യോഗേനാപ്നോതി താഃ സർവ്വാ നാന്യൈർ യോഗഗതിം വ്രജേത് ॥ 34 ॥

സർവ്വാസാമപി സിദ്ധീനാം ഹേതുഃ പതിരഹം പ്രഭുഃ ।
അഹം യോഗസ്യ സാംഖ്യസ്യ ധർമ്മസ്യ ബ്രഹ്മവാദിനാം ॥ 35 ॥

അഹമാത്മാന്തരോ ബാഹ്യോഽനാവൃതഃ സർവ്വദേഹിനാം ।
യഥാ ഭൂതാനി ഭൂതേഷു ബഹിരന്തഃ സ്വയം തഥാ ॥ 36 ॥