ശ്രീമദ് ഭാഗവതം (മൂലം) / അഷ്ടമഃ സ്കന്ധഃ (സ്കന്ധം 8) / അദ്ധ്യായം 13

← സ്കന്ധം 8 : അദ്ധ്യായം 12

സ്കന്ധം 8 : അദ്ധ്യായം 14 →

ശ്രീമദ് ഭാഗവതം (മൂലം) / അഷ്ടമഃ സ്കന്ധഃ (സ്കന്ധം 8) / അദ്ധ്യായം 13

ശ്രീശുക ഉവാച

മനുർവ്വിവസ്വതഃ പുത്രഃ ശ്രാദ്ധദേവ ഇതി ശ്രുതഃ ।
സപ്തമോ വർത്തമാനോ യസ്തദപത്യാനി മേ ശൃണു ॥ 1 ॥

ഇക്ഷ്വാകുർന്നഭഗശ്ചൈവ ധൃഷ്ടഃ ശര്യാതിരേവ ച ।
നരിഷ്യന്തോഽഥ നാഭാഗഃ സപ്തമോ ദിഷ്ട ഉച്യതേ ॥ 2 ॥

കരൂഷശ്ച പൃഷധ്രശ്ച ദശമോ വസുമാൻ സ്മൃതഃ ।
മനോർവ്വൈവസ്വതസ്യൈതേ ദശപുത്രാഃ പരന്തപ ॥ 3 ॥

ആദിത്യാ വസവോ രുദ്രാ വിശ്വേദേവാ മരുദ്ഗണാഃ ।
അശ്വിനാവൃഭവോ രാജന്നിന്ദ്രസ്തേഷാം പുരന്ദരഃ ॥ 4 ॥

കശ്യപോഽത്രിർവ്വസിഷ്ഠശ്ച വിശ്വാമിത്രോഽഥ ഗൌതമഃ ।
ജമദഗ്നിർഭരദ്വാജ ഇതി സപ്തർഷയഃ സ്മൃതാഃ ॥ 5 ॥

അത്രാപി ഭഗവജ്ജൻമ കശ്യപാദദിതേരഭൂത് ।
ആദിത്യാനാമവരജോ വിഷ്ണുർവ്വാമനരൂപധൃക് ॥ 6 ॥

സംക്ഷേപതോ മയോക്താനി സപ്തമന്വന്തരാണി തേ ।
ഭവിഷ്യാണ്യഥ വക്ഷ്യാമി വിഷ്ണോഃ ശക്ത്യാന്വിതാനി ച ॥ 7 ॥

വിവസ്വതശ്ച ദ്വേ ജായേ വിശ്വകർമ്മസുതേ ഉഭേ ।
സംജ്ഞാ ഛായാ ച രാജേന്ദ്ര യേ പ്രാഗഭിഹിതേ തവ ॥ 8 ॥

തൃതീയാം വഡവാമേകേ താസാം സംജ്ഞാസുതാസ്ത്രയഃ ।
യമോ യമീ ശ്രാദ്ധദേവശ്ഛായായാശ്ച സുതാഞ്ഛൃണു ॥ 9 ॥

സാവർണ്ണിസ്തപതീ കന്യാ ഭാര്യാ സംവരണസ്യ യാ ।
ശനൈശ്ചരസ്തൃതീയോഽഭൂദശ്വിനൌ ബഡവാത്മജൌ ॥ 10 ॥

അഷ്ടമേഽന്തര ആയാതേ സാവർണ്ണിർഭവിതാ മനുഃ ।
നിർമ്മോകവിരജസ്കാദ്യാഃ സാവർണ്ണിതനയാ നൃപ ॥ 11 ॥

തത്ര ദേവാഃ സുതപസോ വിരജാ അമൃതപ്രഭാഃ ।
തേഷാം വിരോചനസുതോ ബലിരിന്ദ്രോ ഭവിഷ്യതി ॥ 12 ॥

ദത്ത്വേമാം യാചമാനായ വിഷ്ണവേ യഃ പദത്രയം ।
രാദ്ധമിന്ദ്രപദം ഹിത്വാ തതഃ സിദ്ധിമവാപ്സ്യതി ॥ 13 ॥

യോഽസൌ ഭഗവതാ ബദ്ധഃ പ്രീതേന സുതലേ പുനഃ ।
നിവേശിതോഽധികേ സ്വർഗ്ഗാദധുനാഽഽസ്തേ സ്വരാഡിവ ॥ 14 ॥

ഗാലവോ ദീപ്തിമാൻ രാമോ ദ്രോണപുത്രഃ കൃപസ്തഥാ ।
ഋഷ്യശൃംഗഃ പിതാസ്മാകം ഭഗവാൻ ബാദരായണഃ ॥ 15 ॥

ഇമേ സപ്തർഷയസ്തത്ര ഭവിഷ്യന്തി സ്വയോഗതഃ ।
ഇദാനീമാസതേ രാജൻ സ്വേ സ്വ ആശ്രമമണ്ഡലേ ॥ 16 ॥

ദേവഗുഹ്യാത്സരസ്വത്യാം സാർവ്വഭൌമ ഇതി പ്രഭുഃ ।
സ്ഥാനം പുരന്ദരാദ്ധൃത്വാ ബലയേ ദാസ്യതീശ്വരഃ ॥ 17 ॥

നവമോ ദക്ഷസാവർണ്ണിർമ്മനുർവ്വരുണസംഭവഃ ।
ഭൂതകേതുർദ്ദീപ്തകേതുരിത്യാദ്യാസ്തത്സുതാ നൃപ ॥ 18 ॥

പാരാ മരീചിഗർഭാദ്യാ ദേവാ ഇന്ദ്രോഽദ്ഭുതഃ സ്മൃതഃ ।
ദ്യുതിമത്പ്രമുഖാസ്തത്ര ഭവിഷ്യന്ത്യൃഷയസ്തതഃ ॥ 19 ॥

ആയുഷ്മതോഽമ്ബുധാരായാമൃഷഭോ ഭഗവത്കലാ ।
ഭവിതാ യേന സംരാദ്ധാം ത്രിലോകീം ഭോക്ഷ്യതേഽദ്ഭുതഃ ॥ 20 ॥

ദശമോ ബ്രഹ്മസാവർണ്ണിരുപശ്ലോകസുതോ മഹാൻ ।
തത്സുതാ ഭൂരിഷേണാദ്യാ ഹവിഷ്മത്പ്രമുഖാ ദ്വിജാഃ ॥ 21 ॥

ഹവിഷ്മാൻ സുകൃതിഃ സത്യോ ജയോ മൂർത്തിസ്തദാ ദ്വിജാഃ ।
സുവാസനവിരുദ്ധാദ്യാ ദേവാഃ ശംഭുഃ സുരേശ്വരഃ ॥ 22 ॥

വിഷ്വക്സേനോ വിഷൂച്യാം തു ശംഭോഃ സഖ്യം കരിഷ്യതി ।
ജാതഃ സ്വാംശേന ഭഗവാൻ ഗൃഹേ വിശ്വസൃജോ വിഭുഃ ॥ 23 ॥

മനുർവ്വൈ ധർമ്മസാവർണ്ണിരേകാദശമ ആത്മവാൻ ।
അനാഗതാസ്തത്സുതാശ്ച സത്യധർമ്മാദയോ ദശ ॥ 24 ॥

വിഹംഗമാഃ കാമഗമാ നിർവ്വാണരുചയഃ സുരാഃ ।
ഇന്ദ്രശ്ച വൈധൃതസ്തേഷാമൃഷയശ്ചാരുണാദയഃ ॥ 25 ॥

ആര്യകസ്യ സുതസ്തത്ര ധർമ്മസേതുരിതി സ്മൃതഃ ।
വൈധൃതായാം ഹരേരംശസ്ത്രിലോകീം ധാരയിഷ്യതി ॥ 26 ॥

ഭവിതാ രുദ്രസാവർണ്ണീ രാജൻ ദ്വാദശമോ മനുഃ ।
ദേവവാനുപദേവശ്ച ദേവശ്രേഷ്ഠാദയഃ സുതാഃ ॥ 27 ॥

ഋതധാമാ ച തത്രേന്ദ്രോ ദേവാശ്ച ഹരിതാദയഃ ।
ഋഷയശ്ച തപോമൂർത്തിസ്തപസ്വ്യാഗ്നീധ്രകാദയഃ ॥ 28 ॥

സ്വധാമാഖ്യോ ഹരേരംശഃ സാധയിഷ്യതി തൻമനോഃ ।
അന്തരം സത്യസഹസഃ സൂനൃതായാഃ സുതോ വിഭുഃ ॥ 29 ॥

മനുസ്ത്രയോദശോ ഭാവ്യോ ദേവസാവർണ്ണിരാത്മവാൻ ।
ചിത്രസേനവിചിത്രാദ്യാ ദേവസാവർണ്ണിദേഹജാഃ ॥ 30 ॥

ദേവാഃ സുകർമ്മസുത്രാമസംജ്ഞാ ഇന്ദ്രോ ദിവസ്പതിഃ ।
നിർമ്മോകതത്ത്വദർശാദ്യാ ഭവിഷ്യന്ത്യൃഷയസ്തദാ ॥ 31 ॥

ദേവഹോത്രസ്യ തനയ ഉപഹർത്താ ദിവസ്പതേഃ ।
യോഗേശ്വരോ ഹരേരംശോ ബൃഹത്യാം സംഭവിഷ്യതി ॥ 32 ॥

മനുർവ്വാ ഇന്ദ്രസാവർണ്ണിശ്ചതുർദ്ദശമ ഏഷ്യതി ।
ഉരുഗംഭീരബുദ്ധ്യാദ്യാ ഇന്ദ്രസാവർണ്ണിവീര്യജാഃ ॥ 33 ॥

പവിത്രാശ്ചാക്ഷുഷാ ദേവാഃ ശുചിരിന്ദ്രോ ഭവിഷ്യതി ।
അഗ്നിർബ്ബാഹുഃ ശുചിഃ ശുദ്ധോ മാഗധാദ്യാസ്തപസ്വിനഃ ॥ 34 ॥

സത്രായണസ്യ തനയോ ബൃഹദ്ഭാനുസ്തദാ ഹരിഃ ।
വിതാനായാം മഹാരാജ ക്രിയാതന്തൂൻ വിതായിതാ ॥ 35 ॥

രാജംശ്ചതുർദ്ദശൈതാനി ത്രികാലാനുഗതാനി തേ ।
പ്രോക്താന്യേഭിർമ്മിതഃ കൽപോ യുഗസാഹസ്രപര്യയഃ ॥ 36 ॥