ശ്രീമദ് ഭാഗവതം (മൂലം) / അഷ്ടമഃ സ്കന്ധഃ (സ്കന്ധം 8) / അദ്ധ്യായം 14

വിക്കിഗ്രന്ഥശാല സംരംഭത്തിൽ നിന്ന്

ശ്രീമദ് ഭാഗവതം (മൂലം) / അഷ്ടമഃ സ്കന്ധഃ (സ്കന്ധം 8) / അദ്ധ്യായം 14[തിരുത്തുക]


രാജോവാച

മന്വന്തരേഷു ഭഗവൻ യഥാ മന്വാദയസ്ത്വിമേ ।
യസ്മിൻ കർമ്മണി യേ യേന നിയുക്താസ്തദ്വദസ്വ മേ ॥ 1 ॥

ഋഷിരുവാച

മനവോ മനുപുത്രാശ്ച മുനയശ്ച മഹീപതേ ।
ഇന്ദ്രാഃ സുരഗണാശ്ചൈവ സർവ്വേ പുരുഷശാസനാഃ ॥ 2 ॥

യജ്ഞാദയോ യാഃ കഥിതാഃ പൌരുഷ്യസ്തനവോ നൃപ ।
മന്വാദയോ ജഗദ്യാത്രാം നയന്ത്യാഭിഃ പ്രചോദിതാഃ ॥ 3 ॥

ചതുർ യുഗാന്തേ കാലേന ഗ്രസ്താൻ ശ്രുതിഗണാൻ യഥാ ।
തപസാ ഋഷയോഽപശ്യൻ യതോ ധർമ്മഃ സനാതനഃ ॥ 4 ॥

തതോ ധർമ്മം ചതുഷ്പാദം മനവോ ഹരിണോദിതാഃ ।
യുക്താഃ സഞ്ചാരയന്ത്യദ്ധാ സ്വേ സ്വേ കാലേ മഹീം നൃപ ॥ 5 ॥

പാലയന്തി പ്രജാപാലാ യാവദന്തം വിഭാഗശഃ ।
യജ്ഞഭാഗഭുജോ ദേവാ യേ ച തത്രാന്വിതാശ്ച തൈഃ ॥ 6 ॥

ഇന്ദ്രോ ഭഗവതാ ദത്താം ത്രൈലോക്യശ്രിയമൂർജ്ജിതാം ।
ഭുഞ്ജാനഃ പാതി ലോകാംസ്ത്രീൻ കാമം ലോകേ പ്രവർഷതി ॥ 7 ॥

ജ്ഞാനം ചാനുയുഗം ബ്രൂതേ ഹരിഃ സിദ്ധസ്വരൂപധൃക് ।
ഋഷിരൂപധരഃ കർമ്മ യോഗം യോഗേശരൂപധൃക് ॥ 8 ॥

സർഗ്ഗം പ്രജേശരൂപേണ ദസ്യൂൻ ഹന്യാത്സ്വരാഡ് വപുഃ ।
കാലരൂപേണ സർവ്വേഷാമഭാവായ പൃഥഗ്ഗുണഃ ॥ 9 ॥

സ്തൂയമാനോ ജനൈരേഭിർമ്മായയാ നാമരൂപയാ ।
വിമോഹിതാത്മഭിർന്നാനാദർശനൈർന്ന ച ദൃശ്യതേ ॥ 10 ॥

ഏതത്കൽപവികൽപസ്യ പ്രമാണം പരികീർത്തിതം ।
യത്ര മന്വന്തരാണ്യാഹുശ്ചതുർദ്ദശ പുരാവിദഃ ॥ 11 ॥