മഹാഭാരതം മൂലം/അശ്വമേധികപർവം/അധ്യായം52

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/അശ്വമേധികപർവം
രചന:വ്യാസൻ
അധ്യായം52

1 [വ്]
     തഥാ പ്രയാന്തം വാർഷ്ണേയം ദ്വാരകാം ഭരതർഷഭാഃ
     പരിഷ്വജ്യ ന്യവർതന്ത സാനുയാത്രാഃ പരന്തപാഃ
 2 പുനഃ പുനശ് ച വാർഷ്ണേയം പര്യഷ്വജത ഫൽഗുനഃ
     ആ ചക്ഷുർവിഷയാച് ചൈനം ദദർശ ച പുനഃ പുനഃ
 3 കൃച്ഛ്രേണൈവ ച താം പാർഥോ ഗോവിന്ദേ വിനിവേശിതാം
     സഞ്ജഹാര തദാ ദൃഷ്ടിം കൃഷ്ണശ് ചാപ്യ് അപരാജിതഃ
 4 തസ്യ പ്രയാണേ യാന്യ് ആസൻ നിമിത്താനി മഹാത്മനഃ
     ബഹൂന്യ് അദ്ഭുതരൂപാണി താനി മേ ഗദതഃ ശൃണു
 5 വായുർ വേഗേന മഹതാ രഥസ്യ പുരതോ വവൗ
     കുർവൻ നിഃശർകരം മാർഗം വിരജസ്കം അകണ്ടകം
 6 വവർഷ വാസവശ് ചാപി തോയം ശുചി സുഗന്ധി ച
     ദിവ്യാനി ചൈവ പുഷ്പാണി പുരതഃ ശാർമ്ഗധന്വനഃ
 7 സ പ്രയാതോ മഹാബാഹുഃ സമേഷു മരു ധന്വസു
     ദദർശാഥ മുനിശ്രേഷ്ഠം ഉത്തങ്കം അമിതൗജസം
 8 സ തം സമ്പൂജ്യ തേജസ്വീ മുനിം പൃഥുല ലോചനഃ
     പൂജിതസ് തേന ച തദാ പര്യപൃച്ഛദ് അനാമയം
 9 സ പൃഷ്ടഃ കുശലം തേന സമ്പൂജ്യ മധുസൂദനം
     ഉത്തങ്കോ ബ്രാഹ്മണശ്രേഷ്ഠസ് തതഃ പപ്രച്ഛ മാധവം
 10 കച് ചിച് ഛൗരേ ത്വയാ ഗത്വാ കുരുപാണ്ഡവസദ്മ തത്
    കൃതം സൗഭ്രാത്രം അചലം തൻ മേ വ്യാഖ്യാതും അർഹസി
11 അഭിസന്ധായ താൻ വീരാൻ ഉപാവൃത്തോ ഽസി കേശവ
    സംബന്ധിനഃ സുദയിതാൻ സതതം വൃഷ്ണിപുംഗവ
12 കച് ചിത് പാണ്ഡുസുതാഃ പഞ്ച ധൃതരാഷ്ട്രസ്യ ചാത്മജാഃ
    ലോകേഷു വിഹരിഷ്യന്തി ത്വയാ സഹ പരന്തപ
13 സ്വരാഷ്ട്രേഷു ച രാജാനഃ കച് ചിത് പ്രാപ്സ്യന്തി വൈ സുഖം
    കൗരവേഷു പ്രശാന്തേഷു ത്വയാ നാഥേന മാധവ
14 യാ മേ സംഭാവനാ താത ത്വയി നിത്യം അവർതത
    അപി സാ സഫലാ കൃഷ്ണ കൃതാ തേ ഭരതാൻ പ്രതി
15 [വാ]
    കൃതോ യത്നോ മയാ ബ്രഹ്മൻ സൗഭ്രാത്രേ കൗരവാൻ പ്രതി
    ന ചാശക്യന്ത സന്ധാതും തേ ഽധർമരുചയോ മയാ
16 തതസ് തേ നിധനം പ്രാപ്താഃ സർവേ സ സുതബാന്ധവാഃ
    ന ദിഷ്ടം അഭ്യതിക്രാന്തും ശക്യം ബുദ്ധ്യാ ബലേന വാ
    മഹർഷേ വിദിതം നൂനം സർവം ഏതത് തവാനഘ
17 തേ ഽത്യക്രാമൻ മതിം മഹ്യം ഭീഷ്മസ്യ വിദുരസ്യ ച
    തതോ യമക്ഷയം ജഗ്മുഃ സമാസാദ്യേതരേതരം
18 പഞ്ച വൈ പാണ്ഡവാഃ ശിഷ്ടാ ഹതമിത്രാ ഹതാത്മജാഃ
    ധാർതരാഷ്ട്രാശ് ച നിഹതാഃ സർവേ സ സുതബാന്ധവാഃ
19 ഇത്യ് ഉക്തവചനേ കൃഷ്ണേ ഭൃശം ക്രോധസമന്വിതഃ
    ഉത്തങ്കഃ പ്രത്യുവാചൈനം രോഷാദ് ഉത്ഫാല്യ ലോചനേ
20 യസ്മാച് ഛക്തേന തേ കൃഷ്ണ ന ത്രാതാഃ കുരുപാണ്ഡവാഃ
    സംബന്ധിനഃ പ്രിയാസ് തസ്മാച് ഛപ്സ്യേ ഽഹം ത്വാം അസംശയം
21 ന ച തേ പ്രസഭം യസ്മാത് തേ നിഗൃഹ്യ നിവർതിതാഃ
    തസ്മാൻ മന്യുപരീതസ് ത്വാം ശപ്സ്യാമി മധുസൂദന
22 ത്വയാ ഹി ശക്തേന സതാ മിഥ്യാചാരേണ മാധവ
    ഉപചീർണാഃ കുരുശ്രേഷ്ഠാ യസ് ത്വ് ഏതാൻ സമുപേക്ഷഥാഃ
23 [വാ]
    ശൃണു മേ വിസ്തരേണേദം യദ് വക്ഷ്യേ ഭൃഗുനന്ദന
    ഗൃഹാണാനുനയം ചാപി തപസ്വീ ഹ്യ് അസി ഭാർഗവ
24 ശ്രുത്വാ ത്വം ഏതദ് അധ്യാത്മം മുഞ്ചേഥാഃ ശാപം അദ്യ വൈ
    ന ച മാം തപസാൽപേന ശക്തോ ഽഭിഭവിതും പുമാൻ
25 ന ച തേ തപസോ നാശം ഇച്ഛാമി ജപതാം വര
    തപസ് തേ സുമഹദ് ദീപ്തം ഗുരവശ് ചാപി തോഷിതാഃ
26 കൗമാരം വ്രഹ്മചര്യം തേ ജാനാമി ദ്വിജസത്തമ
    ദുഃഖാർജിതസ്യ തപസസ് തസ്മാൻ നേച്ഛാമി തേ വ്യയം