മഹാഭാരതം മൂലം/അശ്വമേധികപർവം/അധ്യായം34
| ←അധ്യായം33 | മഹാഭാരതം മൂലം/അശ്വമേധികപർവം രചന: അധ്യായം34 |
അധ്യായം35→ |
1 [ബ്ര്]
നേദം അൽപാത്മനാ ശക്യം വേദിതും നാകൃതാത്മനാ
ബഹു ചാൽപം ച സങ്ക്ഷിപ്തം വിപ്ലുതം ച മതം മമ
2 ഉപായം തു മമ ബ്രൂഹി യേനൈഷാ ലഭ്യതേ മതിഃ
തൻ മന്യേ കാരണതമം യത ഏഷാ പ്രവർതതേ
3 [ബ്ര്]
അരണീം ബ്രാഹ്മണീം വിദ്ധി ഗുരുർ അസ്യോത്തരാരണിഃ
തപഃ ശ്രുതേ ഽഭിമഥ്നീതോ ജ്ഞാനാഗ്നിർ ജായതേ തതഃ
4 [ബ്രാഹ്മണീ]
യദ് ഇദം ബ്രഹ്മണോ ലിംഗം ക്ഷേത്രജ്ഞം ഇതി സഞ്ജ്ഞിതം
ഗ്രഹീതും യേന തച് ഛക്യം ലക്ഷണം തസ്യ തത് ക്വ നു
5 [ബ്ര്]
അലിംഗോ നിർഗുണശ് ചൈവ കാരണം നാസ്യ വിദ്യതേ
ഉപായം ഏവ വക്ഷ്യാമി യേന ഗൃഹ്യേത വാ ന വാ
6 സമ്യഗ് അപ്യ് ഉപദിഷ്ടശ് ച ഭ്രമരൈർ ഇവ ലക്ഷ്യതേ
കർമ ബുദ്ധിർ അബുദ്ധിത്വാജ് ജ്ഞാനലിംഗൈർ ഇവാശ്രിതം
7 ഇദം കാര്യം ഇദം നേതി ന മോക്ഷേഷൂപദിശ്യതേ
പശ്യതഃ ശൃണ്വതോ ബുദ്ധിർ ആത്മനോ യേഷു ജായതേ
8 യാവന്ത ഇഹ ശക്യേരംസ് താവതോ ഽംശാൻ പ്രകൽപയേത്
വ്യക്താൻ അവ്യക്തരൂപാംശ് ച ശതശോ ഽഥ സഹസ്രശഃ
9 സർവാൻ നാനാത്വ യുക്താംശ് ച സർവാൻ പ്രത്യക്ഷഹേതുകാൻ
യതഃ പരം ന വിദ്യേത തതോ ഽഭ്യാസേ ഭവിഷ്യതി
10 [വാ]
തതസ് തു തസ്യാ ബ്രാഹ്മണ്യാ മതിഃ ക്ഷേത്രജ്ഞസങ്ക്ഷയേ
ക്ഷേത്രജ്ഞാദ് ഏവ പരതഃ ക്ഷേത്രജ്ഞോ ഽന്യഃ പ്രവർതതേ
11 [അർജുന]
ക്വ നു സാ ബ്രാഹ്മണീ കൃഷ്ണ ക്വ ചാസൗ ബ്രാഹ്മണർഷഭഃ
യാഭ്യാം സിദ്ധിർ ഇയം പ്രാപ്താ താവ് ഉഭൗ വദ മേ ഽച്യുത
12 [വാ]
മനോ മേ ബ്രാഹ്മണം വിദ്ധി ബുദ്ധിം മേ വിദ്ധി ബ്രാഹ്മണീം
ക്ഷേത്രജ്ഞ ഇതി യശ് ചോക്തഃ സോ ഽഹം ഏവ ധനഞ്ജയ