മഹാഭാരതം മൂലം/അശ്വമേധികപർവം/അധ്യായം33
| ←അധ്യായം32 | മഹാഭാരതം മൂലം/അശ്വമേധികപർവം രചന: അധ്യായം33 |
അധ്യായം34→ |
1 [ബ്ര്]
നാഹം തഥാ ഭീരു ചരാമി ലോകേ; തഥാ ത്വം മാം തർകയസേ സ്വബുദ്ധ്യാ
വിപ്രോ ഽസ്മി മുക്തോ ഽസ്മി വനേചരോ ഽസ്മി; ഗൃഹസ്ഥ ധർമാ ബ്രഹ്മ ചാരീ തഥാസ്മി
2 നാഹം അസ്മി യഥാ മാം ത്വം പശ്യസേ ചക്ഷുഷാ ശുഭേ
മയാ വ്യാപ്തം ഇദം സർവം യത് കിം ചിജ് ജഗതീ ഗതം
3 യേ കേ ചിജ് ജന്തവോ ലോകേ ജംഗമാഃ സ്ഥാവരാശ് ച ഹ
തേഷാം മാം അന്തകം വിദ്ധി ദാരൂണാം ഇവ പാവകം
4 രാജ്യം പൃഥിവ്യാം സർവസ്യാം അഥ വാപി ത്രിവിഷ്ടപേ
തഥാ ബുദ്ധിർ ഇയം വേത്തി ബുദ്ധിർ ഏവ ധനം മമ
5 ഏകഃ പന്ഥാ ബ്രാഹ്മണാനാം യേന ഗച്ഛന്തി തദ്വിദഃ
ഗൃഹേഷു വനവാസേഷു ഗുരു വാസേഷു ഭിക്ഷുഷു
ലിംഗൈർ ബഹുഭിർ അവ്യഗ്രൈർ ഏകാ ബുദ്ധിർ ഉപാസ്യതേ
6 നാനാ ലിംഗാശ്രമസ്ഥാനാം യേഷാം ബുദ്ധിഃ ശമാത്മികാ
തേ ഭാവം ഏകം ആയാന്തി സരിതഃ സാഗരം യഥാ
7 ബുദ്ധ്യായം ഗമ്യതേ മാർഗഃ ശരീരേണ ന ഗമ്യതേ
ആദ്യന്തവന്തി കർമാണി ശരീരം കർമബന്ധനം
8 തസ്മാത് തേ സുഭഗേ നാസ്തി പരലോകകൃതം ഭയം
മദ്ഭാവഭാവനിരതാ മമൈവാത്മാനം ഏഷ്യസി