ഭാഷാഭൂഷണം/പേജ് 47
| ←പേജ് 46 | ഭാഷാഭൂഷണം (അലങ്കാരശാസ്ത്രം) രചന: അലങ്കാരപ്രകരണം |
പേജ് 48→ |
- ആധേയാധിക്യമധിക-
- മാധാരാധിക്യവും തഥാ;
- തള്ളുന്നതുലകത്തിനുള്ളിൽ
- കൊള്ളാഞ്ഞു തവ കീർത്തികൾ: 64
- വാഗ്ബ്രഹ്മത്തിൻ വലിപ്പത്തെ
- വാഴ്ത്തുവാൻ പണിയെത്രയും
- നിലപ്പതുണ്ടമേയങ്ങൾ
- നിൻഗുണങ്ങളുമങ്ങിതിൽ 65
ആധേയത്തേക്കാൾ ആധാരത്തിന്നു വലിപ്പമധികമുണ്ടെന്നോ നേരേമറിച്ചു് ആധാരത്തേക്കാൾ ആധേയത്തിന്നു വലിപ്പമധികമുണ്ടെന്നോ കല്പിക്കുന്നതു് 'അധികം' എന്ന അലങ്കാരം. 'തള്ളുന്നു' ഇത്യാദ്യർദ്ധം ആധേയാധിക്യത്തിനു് ഉദാഹരണവും. ഇവിടെ കീർത്തിവ്യാപ്തിക്കു് ആധാരമായി ഉലകിനേക്കാൾ വൈപുല്യം വർണ്ണിക്കപ്പെട്ടിരിക്കുന്നു. 'വാഗ്ബ്രഹ്മ'മിത്യാദി ശ്ലോകം ആധാരാധിക്യത്തിനു് ഉദാഹരണം. ഇതിൽ 'നിൻഗുണങ്ങൾ' ഇത്രയെന്നു് പരിച്ഛേദിക്കവയ്യാത്തവയാണു്. അവകൂടി വാഗ്ബ്രഹ്മത്തിൽ നിൽക്കണമെങ്കിൽ ആ വാഗ്ബ്രഹ്മത്തിനു് എത്രവലിപ്പം വേണമെന്നു് ആധാരാധിക്യം. മുൻചൊന്ന മട്ടു രണ്ടും ആധേയത്തിന്റെ വൈപുല്യാതിശയത്തിൽത്തന്നെ പര്യവസാനിക്കുന്നു. വേറെ ഉദാഹരണം:
- 87. ഉലകമഖിലമടങ്ങുന്നോരു നാരായണൻ ത-
- ന്നുദരമതിലൊതുങ്ങാതങ്ങു നിൻകീർത്തി രാജൻ!
- ചുഴലവുമതിനുള്ളിൽ തിങ്ങിവിങ്ങീട്ടു നാഭി-
- ച്ചുഴിവഴി വെളിവാർന്നൂ പുണ്ഡരീകച്ഛലേന. -സ്വ
ഇതു് ആധേയാധിക്യത്തിനു് ഉദാഹരണം. ഇനി ആധാരാധിക്യത്തിനു് ചൊല്ലുന്നു:
- 88. വിശ്വങ്ങളെല്ലാം തന്നുള്ളിലേ ചേർത്തോരു
- വിഷ്ണുവെത്തന്നുദരത്തിലാക്കി
- മേവിനിന്നീടുന്ന ദേവകീദേവിതൻ-
- മേന്മയെ പാർക്കിലിന്നാർക്ക് ചൊല്ലാം? -കൃഷ്ണഗാഥ
ആധാരത്തേക്കാൾ ആധേയത്തിനു് മഹത്ത്വം വരുന്നതു് ആധാരത്തിന്റെ കാർശ്യത്താലുമാകാം. ഇതിനെ അയ്യപ്പദീക്ഷിതർ 'അല്പം' എന്നു് ഒരു സ്വതന്ത്രാലങ്കാരമായി കല്പിച്ചിട്ടുണ്ടു്. ഉദാഹരണം:
- 89. ചുറ്റും വെളുത്ത കുളുർകൊങ്കകൾ കോമളാംഗി-
- യ്ക്കറ്റം കറുത്തഥ കുളിർത്തിതു മാറിടത്തിൽ:
- തിക്കിത്തിരക്കുമതുകൾക്കിടയിൽ തൊടുക്കാ-
- നോക്കാത്ത മട്ടിലൊരു താമരനൂൽക്കു പോലും. -കുമാരസംഭവം
ഇതിൽ അതിസൂക്ഷ്മമായ താമരനൂൽക്കുപോലും സ്തനാന്തരത്തിൽ കടക്കാനിടമില്ലെന്നു പറകയാൽ ആധേയത്തിനു് മഹത്വമോ ആധാരത്തിനു് കാർക്കശ്യമോ പ്രതിപാദിക്കപ്പെട്ടിരിക്കുന്നു.