ശ്രീമദ് ഭാഗവതം (മൂലം) / ദശമഃ സ്കന്ധഃ (പൂർവ്വാർദ്ധഃ) (സ്കന്ധം 10 പൂർവ്വാർദ്ധം) / അദ്ധ്യായം 42

← സ്കന്ധം 10 പൂർവ്വാർദ്ധം : അദ്ധ്യായം 41

സ്കന്ധം 10 പൂർവ്വാർദ്ധം : അദ്ധ്യായം 43 →

ശ്രീമദ് ഭാഗവതം (മൂലം) / ദശമഃ സ്കന്ധഃ (പൂർവ്വാർദ്ധഃ) (സ്കന്ധം 10 പൂർവ്വാർദ്ധം) / അദ്ധ്യായം 42

ശ്രീശുക ഉവാച

     അഥ വ്രജൻ രാജപഥേന മാധവഃ
          സ്ത്രിയം ഗൃഹീതാംഗവിലേപഭാജനാം ।
     വിലോക്യ കുബ്ജാം യുവതീം വരാനനാം
          പപ്രച്ഛ യാന്തീം പ്രഹസൻ രസപ്രദഃ ॥ 1 ॥

     കാ ത്വം വരോർവ്വേതദു ഹാനുലേപനം
          കസ്യാംഗനേ വാ കഥയസ്വ സാധു നഃ ।
     ദേഹ്യാവയോരംഗവിലേപമുത്തമം
          ശ്രേയസ്തതസ്തേ ന ചിരാദ്ഭവിഷ്യതി ॥ 2 ॥

സൈരന്ധ്ര്യുവാച

     ദാസ്യസ്മ്യഹം സുന്ദര കംസസമ്മതാ
          ത്രിവക്രനാമാ ഹ്യനുലേപകർമ്മണി ।
     മദ്ഭാവിതം ഭോജപതേരതിപ്രിയം
          വിനാ യുവാം കോഽന്യതമസ്തദർഹതി ॥ 3 ॥

രൂപപേശലമാധുര്യഹസിതാലാപവീക്ഷിതൈഃ ।
ധർഷിതാത്മാ ദദൌ സാന്ദ്രമുഭയോരനുലേപനം ॥ 4 ॥

തതസ്താവംഗരാഗേണ സ്വവർണ്ണേതരശോഭിനാ ।
സമ്പ്രാപ്തപരഭാഗേന ശുശുഭാതേഽനുരഞ്ജിതൌ ॥ 5 ॥

പ്രസന്നോ ഭഗവാൻ കുബ്ജാം ത്രിവക്രാം രുചിരാനനാം ।
ഋജ്വീം കർത്തും മനശ്ചക്രേ ദർശയൻ ദർശനേ ഫലം ॥ 6 ॥

പദ്ഭ്യാമാക്രമ്യ പ്രപദേ ദ്വ്യംഗുല്യുത്താനപാണിനാ ।
പ്രഗൃഹ്യ ചിബുകേഽധ്യാത്മമുദനീനമദച്യുതഃ ॥ 7 ॥

സാ തദർജ്ജുസമാനാംഗീ ബൃഹച്ഛ്രോണിപയോധരാ ।
മുകുന്ദസ്പർശനാത് സദ്യോ ബഭൂവ പ്രമദോത്തമാ ॥ 8 ॥

തതോ രൂപഗുണൌദാര്യസമ്പന്നാ പ്രാഹ കേശവം ।
ഉത്തരീയാന്തമാകൃഷ്യ സ്മയന്തീ ജാതഹൃച്ഛയാ ॥ 9 ॥

ഏഹി വീര ഗൃഹം യാമോ ന ത്വാം ത്യക്തുമിഹോത്സഹേ ।
ത്വയോൻമഥിതചിത്തായാഃ പ്രസീദ പുരുഷർഷഭ ॥ 10 ॥

ഏവം സ്ത്രിയാ യാച്യമാനഃ കൃഷ്ണോ രാമസ്യ പശ്യതഃ ।
മുഖം വീക്ഷ്യാനുഗാനാം ച പ്രഹസംസ്താമുവാച ഹ ॥ 11 ॥

ഏഷ്യാമി തേ ഗൃഹം സുഭ്രൂഃ പുംസാമാധിവികർശനം ।
സാധിതാർത്ഥോഽഗൃഹാണാം നഃ പാന്ഥാനാം ത്വം പരായണം ॥ 12 ॥

വിസൃജ്യ മാധ്വ്യാ വാണ്യാ താം വ്രജൻ മാർഗ്ഗേ വണിക്പഥൈഃ ।
നാനോപായനതാംബൂലസ്രഗ്ഗന്ധൈഃ സാഗ്രജോഽർച്ചിതഃ ॥ 13 ॥

തദ്ദർശനസ്മരക്ഷോഭാദാത്മാനം നാവിദൻ സ്ത്രിയഃ ।
വിസ്രസ്തവാസഃകബരവലയാലേഖ്യമൂർത്തയഃ ॥ 14 ॥

തതഃ പൌരാൻ പൃച്ഛമാനോ ധനുഷഃ സ്ഥാനമച്യുതഃ ।
തസ്മിൻ പ്രവിഷ്ടോ ദദൃശേ ധനുരൈന്ദ്രമിവാദ്ഭുതം ॥ 15 ॥

പുരുഷൈർബഹുഭിർഗുപ്തമർച്ചിതം പരമർദ്ധിമത് ।
വാര്യമാണോ നൃഭിഃ കൃഷ്ണഃ പ്രസഹ്യ ധനുരാദദേ ॥ 16 ॥

     കരേണ വാമേന സലീലമുദ്ധൃതം
          സജ്യം ച കൃത്വാ നിമിഷേണ പശ്യതാം ।
     നൃണാം വികൃഷ്യ പ്രബഭഞ്ജ മധ്യതോ
          യഥേക്ഷുദണ്ഡം മദകര്യുരുക്രമഃ ॥ 17 ॥

ധനുഷോ ഭജ്യമാനസ്യ ശബ്ദഃ ഖം രോദസീ ദിശഃ ।
പൂരയാമാസ യം ശ്രുത്വാ കംസസ്ത്രാസമുപാഗമത് ॥ 18 ॥

തദ് രക്ഷിണഃ സാനുചരാഃ കുപിതാ ആതതായിനഃ ।
ഗ്രഹീതുകാമാ ആവവ്രുർഗൃഹ്യതാം വധ്യതാമിതി ॥ 19 ॥

അഥ താൻ ദുരഭിപ്രായാൻ വിലോക്യ ബലകേശവൌ ।
ക്രുദ്ധൌ ധന്വന ആദായ ശകലേ താംശ്ച ജഘ്നതുഃ ॥ 20 ॥

ബലം ച കംസപ്രഹിതം ഹത്വാ ശാലാമുഖാത്തതഃ ।
നിഷ്ക്രമ്യ ചേരതുർഹൃഷ്ടൌ നിരീക്ഷ്യ പുരസമ്പദഃ ॥ 21 ॥

തയോസ്തദദ്ഭുതം വീര്യം നിശാമ്യ പുരവാസിനഃ ।
തേജഃ പ്രാഗൽഭ്യം രൂപം ച മേനിരേ വിബുധോത്തമൌ ॥ 22 ॥

തയോർവ്വിചരതോഃ സ്വൈരമാദിത്യോഽസ്തമുപേയിവാൻ ।
കൃഷ്ണരാമൌ വൃതൌ ഗോപൈഃ പുരാച്ഛകടമീയതുഃ ॥ 23 ॥

     ഗോപ്യോ മുകുന്ദവിഗമേ വിരഹാതുരാ യാ
          ആശാസതാശിഷ ഋതാ മധുപുര്യഭൂവൻ ।
     സംപശ്യതാം പുരുഷഭൂഷണഗാത്രലക്ഷ്മീം
          ഹിത്വേതരാൻ നു ഭജതശ്ചകമേഽയനം ശ്രീഃ ॥ 24 ॥

അവനിക്താംഘ്രിയുഗളൗ ഭുക്ത്വാ ക്ഷീരോപസേചനം ।
ഊഷതുസ്താം സുഖം രാത്രിം ജ്ഞാത്വാ കംസചികീർഷിതം ॥ 25 ॥

കംസസ്തു ധനുഷോ ഭംഗം രക്ഷിണാം സ്വബലസ്യ ച ।
വധം നിശമ്യ ഗോവിന്ദരാമവിക്രീഡിതം പരം ॥ 26 ॥

ദീർഘപ്രജാഗരോ ഭീതോ ദുർന്നിമിത്താനി ദുർമ്മതിഃ ।
ബഹൂന്യചഷ്ടോഭയഥാ മൃത്യോർദൌത്യകരാണി ച ॥ 27 ॥

അദർശനം സ്വശിരസഃ പ്രതിരൂപേ ച സത്യപി ।
അസത്യപി ദ്വിതീയേ ച ദ്വൈരൂപ്യം ജ്യോതിഷാം തഥാ ॥ 28 ॥

ഛിദ്രപ്രതീതിശ്ഛായായാം പ്രാണഘോഷാനുപശ്രുതിഃ ।
സ്വർണ്ണപ്രതീതിർവൃക്ഷേഷു സ്വപദാനാമദർശനം ॥ 29 ॥

സ്വപ്നേ പ്രേതപരിഷ്വംഗഃ ഖരയാനം വിഷാദനം ।
യായാന്നളദമാല്യേകസ്തൈലാഭ്യക്തോ ദിഗംബരഃ ॥ 30 ॥

അന്യാനി ചേത്ഥം ഭൂതാനി സ്വപ്നജാഗരിതാനി ച ।
പശ്യൻ മരണസന്ത്രസ്തോ നിദ്രാം ലേഭേ ന ചിന്തയാ ॥ 31 ॥

വ്യുഷ്ടായാം നിശി കൌരവ്യ സൂര്യേ ചാദ്ഭ്യഃ സമുത്ഥിതേ ।
കാരയാമാസ വൈ കംസോ മല്ലക്രീഡാമഹോത്സവം ॥ 32 ॥

ആനർച്ചുഃ പുരുഷാ രംഗം തൂര്യഭേര്യശ്ച ജഘ്നിരേ ।
മഞ്ചാശ്ചാലങ്കൃതാഃ സ്രഗ്ഭിഃ പതാകാചൈലതോരണൈഃ ॥ 33 ॥

തേഷു പൌരാ ജാനപദാ ബ്രഹ്മക്ഷത്രപുരോഗമാഃ ।
യഥോപജോഷം വിവിശൂ രാജാനശ്ച കൃതാസനാഃ ॥ 34 ॥

കംസഃ പരിവൃതോഽമാത്യൈ രാജമഞ്ച ഉപാവിശത് ।
മണ്ഡലേശ്വരമധ്യസ്ഥോ ഹൃദയേന വിദൂയതാ ॥ 35 ॥

വാദ്യമാനേഷു തൂര്യേഷു മല്ലതാളോത്തരേഷു ച ।
മല്ലാഃ സ്വലങ്കൃതാ ദൃപ്താഃ സോപാധ്യായാഃ സമാവിശൻ ॥ 36 ॥

ചാണൂരോ മുഷ്ടികഃ കൂടഃ ശലസ്തോശല ഏവ ച ।
ത ആസേദുരുപസ്ഥാനം വൽഗുവാദ്യപ്രഹർഷിതാഃ ॥ 37 ॥

നന്ദഗോപാദയോ ഗോപാ ഭോജരാജസമാഹുതാഃ ।
നിവേദിതോപായനാസ്ത ഏകസ്മിൻ മഞ്ച ആവിശൻ ॥ 38 ॥