ശ്രീമദ് ഭാഗവതം (മൂലം) / ദശമഃ സ്കന്ധഃ (പൂർവ്വാർദ്ധഃ) (സ്കന്ധം 10 പൂർവ്വാർദ്ധം) / അദ്ധ്യായം 14
← സ്കന്ധം 10 പൂർവ്വാർദ്ധം : അദ്ധ്യായം 13 | സ്കന്ധം 10 പൂർവ്വാർദ്ധം : അദ്ധ്യായം 15 → |
ശ്രീമദ് ഭാഗവതം (മൂലം) / ദശമഃ സ്കന്ധഃ (പൂർവ്വാർദ്ധഃ) (സ്കന്ധം 10 പൂർവ്വാർദ്ധം) / അദ്ധ്യായം 14[തിരുത്തുക]
ബ്രഹ്മോവാച
നൌമീഡ്യ തേഽഭ്രവപുഷേ തഡിദംബരായ
ഗുഞ്ജാവതംസപരിപിച്ഛലസൻമുഖായ ।
വന്യസ്രജേ കവലവേത്രവിഷാണവേണു-
ലക്ഷ്മശ്രിയേ മൃദുപദേ പശുപാംഗജായ ॥ 1 ॥
അസ്യാപി ദേവ വപുഷോ മദനുഗ്രഹസ്യ
സ്വേച്ഛാമയസ്യ ന തു ഭൂതമയസ്യ കോഽപി ।
നേശേ മഹി ത്വവസിതും മനസാഽഽന്തരേണ
സാക്ഷാത്തവൈവ കിമുതാത്മസുഖാനുഭൂതേഃ ॥ 2 ॥
ജ്ഞാനേ പ്രയാസമുദപാസ്യ നമന്ത ഏവ
ജീവന്തി സൻമുഖരിതാം ഭവദീയവാർത്താം ।
സ്ഥാനേ സ്ഥിതാഃ ശ്രുതിഗതാം തനുവാങ്മനോഭിർ-
യേ പ്രായശോഽജിത ജിതോഽപ്യസി തൈസ്ത്രിലോക്യാം ॥ 3 ॥
ശ്രേയഃസ്രുതിം ഭക്തിമുദസ്യ തേ വിഭോ
ക്ലിശ്യന്തി യേ കേവലബോധലബ്ധയേ ।
തേഷാമസൌ ക്ലേശല ഏവ ശിഷ്യതേ
നാന്യദ്യഥാ സ്ഥൂലതുഷാവഘാതിനാം ॥ 4 ॥
പുരേഹ ഭൂമൻ ബഹവോഽപി യോഗിന-
സ്ത്വദർപ്പിതേഹാ നിജകർമ്മലബ്ധയാ ।
വിബുധ്യ ഭക്ത്യൈവ കഥോപനീതയാ
പ്രപേദിരേഽഞ്ജോഽച്യുത തേ ഗതിം പരാം ॥ 5 ॥
തഥാപി ഭൂമൻ മഹിമാഗുണസ്യ തേ
വിബോദ്ധുമർഹത്യമലാന്തരാത്മഭിഃ ।
അവിക്രിയാത്സ്വാനുഭവാദരൂപതോ
ഹ്യനന്യബോധ്യാത്മതയാ ന ചാന്യഥാ ॥ 6 ॥
ഗുണാത്മനസ്തേഽപി ഗുണാൻ വിമാതും
ഹിതാവതീർണ്ണസ്യ ക ഈശിരേഽസ്യ ।
കാലേന യൈർവ്വാ വിമിതാഃ സുകൽപൈർ-
ഭൂപാംസവഃ ഖേ മിഹികാ ദ്യുഭാസാഃ ॥ 7 ॥
തത്തേഽനുകമ്പാം സുസമീക്ഷമാണോ
ഭുഞ്ജാന ഏവാത്മകൃതം വിപാകം ।
ഹൃദ്വാഗ്വപുർഭിർവിദധന്നമസ്തേ
ജീവേത യോ മുക്തിപദേ സ ദായഭാക് ॥ 8 ॥
പശ്യേശ മേഽനാര്യമനന്ത ആദ്യേ
പരാത്മനി ത്വയ്യപി മായിമായിനി ।
മായാം വിതത്യേക്ഷിതുമാത്മവൈഭവം
ഹ്യഹം കിയാനൈച്ഛമിവാർച്ചിരഗ്നൌ ॥ 9 ॥
അതഃ ക്ഷമസ്വാച്യുത മേ രജോഭുവോ
ഹ്യജാനതസ്ത്വത്പൃഥഗീശമാനിനഃ ।
അജാവലേപാന്ധതമോഽന്ധചക്ഷുഷ
ഏഷോഽനുകമ്പ്യോ മയി നാഥവാനിതി ॥ 10 ॥
ക്വാഹം തമോമഹദഹംഖചരാഗ്നിവാർഭൂ-
സംവേഷ്ടിതാണ്ഡഘടസപ്തവിതസ്തികായാഃ ।
ക്വേദൃഗ്വിധാവിഗണിതാണ്ഡപരാണുചര്യാ-
വാതാധ്വരോമവിവരസ്യ ച തേ മഹിത്വം ॥ 11 ॥
ഉത്ക്ഷേപണം ഗർഭഗതസ്യ പാദയോഃ
കിം കൽപതേ മാതുരധോക്ഷജാഗസേ ।
കിമസ്തിനാസ്തിവ്യപദേശഭൂഷിതം
തവാസ്തി കുക്ഷേഃ കിയദപ്യനന്തഃ ॥ 12 ॥
ജഗത്ത്രയാന്തോദധിസമ്പ്ലവോദേ
നാരായണസ്യോദരനാഭിനാളാത് ।
വിനിർഗ്ഗതോഽജസ്ത്വിതി വാങ്ന വൈ മൃഷാ
കിന്ത്വീശ്വര ത്വന്ന വിനിർഗ്ഗതോഽസ്മി ॥ 13 ॥
നാരായണസ്ത്വം ന ഹി സർവ്വദേഹിനാ-
മാത്മാസ്യധീശാഖിലലോകസാക്ഷീ ।
നാരായണോഽങ്ഗം നരഭൂജലായനാ-
ത്തച്ചാപി സത്യം ന തവൈവ മായാ ॥ 14 ॥
തച്ചേജ്ജലസ്ഥം തവ സജ്ജഗദ്വപുഃ
കിം മേ ന ദൃഷ്ടം ഭഗവംസ്തദൈവ ।
കിം വാ സുദൃഷ്ടം ഹൃദി മേ തദൈവ
കിം നോ സപദ്യേവ പുനർവ്യദർശി ॥ 15 ॥
അത്രൈവ മായാധമനാവതാരേ
ഹ്യസ്യ പ്രപഞ്ചസ്യ ബഹിഃ സ്ഫുടസ്യ ।
കൃത്സ്നസ്യ ചാന്തർജ്ജഠരേ ജനന്യാ
മായാത്വമേവ പ്രകടീകൃതം തേ ॥ 16 ॥
യസ്യ കുക്ഷാവിദം സർവ്വം സാത്മം ഭാതി യഥാ തഥാ ।
തത്ത്വയ്യപീഹ തത്സർവ്വം കിമിദം മായയാ വിനാ ॥ 17 ॥
അദ്യൈവ ത്വദൃതേഽസ്യ കിം മമ ന തേ
മായാത്വമാദർശിത-
മേകോഽസി പ്രഥമം തതോ വ്രജസുഹൃദ്-
വത്സാഃ സമസ്താ അപി ।
താവന്തോഽസി ചതുർഭുജാസ്തദഖിലൈഃ
സാകം മയോപാസിതാ-
സ്താവന്ത്യേവ ജഗന്ത്യഭൂസ്തദമിതം
ബ്രഹ്മാദ്വയം ശിഷ്യതേ ॥ 18 ॥
അജാനതാം ത്വത്പദവീമനാത്മ-
ന്യാത്മാഽഽത്മനാ ഭാസി വിതത്യ മായാം ।
സൃഷ്ടാവിവാഹം ജഗതോ വിധാന
ഇവ ത്വമേഷോഽന്ത ഇവ ത്രിനേത്രഃ ॥ 19 ॥
സുരേഷ്വൃഷിഷ്വീശ തഥൈവ നൃഷ്വപി
തിര്യക്ഷു യാദഃസ്വപി തേഽജനസ്യ ।
ജൻമാസതാം ദുർമ്മദനിഗ്രഹായ
പ്രഭോ വിധാതഃ സദനുഗ്രഹായ ച ॥ 20 ॥
കോ വേത്തി ഭൂമൻ ഭഗവൻ പരാത്മൻ
യോഗേശ്വരോതീർഭവതസ്ത്രിലോക്യാം ।
ക്വ വാ കഥം വാ കതി വാ കദേതി
വിസ്താരയൻ ക്രീഡസി യോഗമായാം ॥ 21 ॥
തസ്മാദിദം ജഗദശേഷമസത്സ്വരൂപം
സ്വപ്നാഭമസ്തധിഷണം പുരുദുഃഖദുഃഖം ।
ത്വയ്യേവ നിത്യസുഖബോധതനാവനന്തേ
മായാത ഉദ്യദപി യത് സദിവാവഭാതി ॥ 22 ॥
ഏകസ്ത്വമാത്മാ പുരുഷഃ പുരാണഃ
സത്യഃ സ്വയംജ്യോതിരനന്ത ആദ്യഃ ।
നിത്യോഽക്ഷരോഽജസ്രസുഖോ നിരഞ്ജനഃ
പൂർണ്ണോഽദ്വയോ മുക്ത ഉപാധിതോഽമൃതഃ ॥ 23 ॥
ഏവം വിധം ത്വാം സകലാത്മനാമപി
സ്വാത്മാനമാത്മാഽഽത്മതയാ വിചക്ഷതേ ।
ഗുർവ്വർക്കലബ്ധോപനിഷത്സുചക്ഷുഷാ
യേ തേ തരന്തീവ ഭവാനൃതാംബുധിം ॥ 24 ॥
ആത്മാനമേവാത്മതയാവിജാനതാം
തേനൈവ ജാതം നിഖിലം പ്രപഞ്ചിതം ।
ജ്ഞാനേന ഭൂയോഽപി ച തത്പ്രലീയതേ
രജ്ജ്വാമഹേർഭോഗഭവാഭവൌ യഥാ ॥ 25 ॥
അജ്ഞാനസംജ്ഞൌ ഭവബന്ധമോക്ഷൌ
ദ്വൌ നാമ നാന്യൌ സ്ത ഋതജ്ഞഭാവാത് ।
അജസ്രചിത്യാഽഽത്മനി കേവലേ പരേ
വിചാര്യമാണേ തരണാവിവാഹനീ ॥ 26 ॥
ത്വാമാത്മാനം പരം മത്വാ പരമാത്മാനമേവ ച ।
ആത്മാ പുനർബ്ബഹിർമ്മൃഗ്യ അഹോഽജ്ഞജനതാജ്ഞതാ ॥ 27 ॥
അന്തർഭവേഽനന്ത ഭവന്തമേവ
ഹ്യതത്ത്യജന്തോ മൃഗയന്തി സന്തഃ ।
അസന്തമപ്യന്ത്യഹിമന്തരേണ
സന്തം ഗുണം തം കിമു യന്തി സന്തഃ ॥ 28 ॥
അഥാപി തേ ദേവ പദാംബുജദ്വയ-
പ്രസാദലേശാനുഗൃഹീത ഏവ ഹി ।
ജാനാതി തത്ത്വം ഭഗവൻ മഹിമ്നോ-
ന ചാന്യ ഏകോഽപി ചിരം വിചിന്വൻ ॥ 29 ॥
തദസ്തു മേ നാഥ സ ഭൂരിഭാഗോ
ഭവേഽത്ര വാന്യത്ര തു വാ തിരശ്ചാം ।
യേനാഹമേകോഽപി ഭവജ്ജനാനാം
ഭൂത്വാ നിഷേവേ തവ പാദപല്ലവം ॥ 30 ॥
അഹോഽതിധന്യാ വ്രജഗോരമണ്യഃ
സ്തന്യാമൃതം പീതമതീവ തേ മുദാ ।
യാസാം വിഭോ വത്സതരാത്മജാത്മനാ
യത്തൃപ്തയേഽദ്യാപി ന ചാലമധ്വരാഃ ॥ 31 ॥
അഹോഭാഗ്യമഹോഭാഗ്യം നന്ദഗോപവ്രജൌകസാം ।
യൻമിത്രം പരമാനന്ദം പൂർണ്ണ ബ്രഹ്മ സനാതനം ॥ 32 ॥
ഏഷാം തു ഭാഗ്യമഹിമാച്യുത താവദാസ്താ-
മേകാദശൈവ ഹി വയം ബത ഭൂരിഭാഗാഃ ।
ഏതദ്ധൃഷീകചഷകൈരസകൃത്പിബാമഃ
ശർവ്വാദയോഽങ്ഘ്ര്യുദജമധ്വമൃതാസവം തേ ॥ 33 ॥
തദ്ഭൂരിഭാഗ്യമിഹ ജൻമ കിമപ്യടവ്യാം
യദ്ഗോകുലേഽപി കതമാങ്ഘ്രിരജോഽഭിഷേകം ।
യജ്ജീവിതം തു നിഖിലം ഭഗവാൻ മുകുന്ദ-
സ്ത്വദ്യാപി യത്പദരജഃ ശ്രുതിമൃഗ്യമേവ ॥ 34 ॥
ഏഷാം ഘോഷനിവാസിനാമുത ഭവാൻ
കിം ദേവ രാതേതി നഃ
ചേതോ വിശ്വഫലാത്ഫലം ത്വദപരം
കുത്രാപ്യയൻ മുഹ്യതി ।
സദ്വേഷാദിവ പൂതനാപി സകുലാ
ത്വാമേവ ദേവാപിതാ
യദ്ധാമാർത്ഥസുഹൃത്പ്രിയാത്മതനയ-
പ്രാണാശയാസ്ത്വത്കൃതേ ॥ 35 ॥
താവദ്രാഗാദയഃ സ്തേനാസ്താവത്കാരാഗൃഹം ഗൃഹം ।
താവൻമോഹോഽങ്ഘ്രിനിഗഡോ യാവത്കൃഷ്ണ ന തേ ജനാഃ ॥ 36 ॥
പ്രപഞ്ചം നിഷ്പ്രപഞ്ചോഽപി വിഡംബയസി ഭൂതലേ ।
പ്രപന്നജനതാനന്ദസന്ദോഹം പ്രഥിതും പ്രഭോ ॥ 37 ॥
ജാനന്ത ഏവ ജാനന്തു കിം ബഹൂക്ത്യാ ന മേ പ്രഭോ ।
മനസോ വപുഷോ വാചോ വൈഭവം തവ ഗോചരഃ ॥ 38 ॥
അനുജാനീഹി മാം കൃഷ്ണ സർവ്വം ത്വം വേത്സി സർവ്വദൃക് ।
ത്വമേവ ജഗതാം നാഥോ ജഗദേതത്തവാർപ്പിതം ॥ 39 ॥
ശ്രീകൃഷ്ണ വൃഷ്ണികുലപുഷ്കരജോഷദായിൻ
ക്ഷ്മാനിർജ്ജരദ്വിജപശൂദധിവൃദ്ധികാരിൻ ।
ഉദ്ധർമ്മശാർവ്വരഹര ക്ഷിതിരാക്ഷസധ്രു-
ഗാകൽപമാർക്കമർഹൻ ഭഗവൻ നമസ്തേ ॥ 40 ॥
ശ്രീശുക ഉവാച
ഇത്യഭിഷ്ടൂയ ഭൂമാനം ത്രിഃ പരിക്രമ്യ പാദയോഃ ।
നത്വാഭീഷ്ടം ജഗദ്ധാതാ സ്വധാമ പ്രത്യപദ്യത ॥ 41 ॥
തതോഽനുജ്ഞാപ്യ ഭഗവാൻ സ്വഭുവം പ്രാഗവസ്ഥിതാൻ ।
വത്സാൻ പുളിനമാനിന്യേ യഥാപൂർവ്വസഖം സ്വകം ॥ 42 ॥
ഏകസ്മിന്നപി യാതേഽബ്ദേ പ്രാണേശം ചാന്തരാത്മനഃ ।
കൃഷ്ണമായാഹതാ രാജൻ ക്ഷണാർദ്ധം മേനിരേഽർഭകാഃ ॥ 43 ॥
കിം കിം ന വിസ്മരന്തീഹ മായാമോഹിതചേതസഃ ।
യൻമോഹിതം ജഗത്സർവ്വമഭീക്ഷ്ണം വിസ്മൃതാത്മകം ॥ 44 ॥
ഊചുശ്ച സുഹൃദഃ കൃഷ്ണം സ്വാഗതം തേഽതിരംഹസാ ।
നൈകോഽപ്യഭോജി കവല ഏഹീതഃ സാധു ഭുജ്യതാം ॥ 45 ॥
തതോ ഹസൻ ഹൃഷീകേശോഽഭ്യവഹൃത്യ സഹാർഭകൈഃ ।
ദർശയംശ്ചർമ്മാജഗരം ന്യവർത്തത വനാദ് വ്രജം ॥ 46 ॥
ബർഹപ്രസൂനനവധാതുവിചിത്രിതാംഗഃ
പ്രോദ്ദാമവേണുദളശൃംഗരവോത്സവാഢ്യഃ ।
വത്സാൻ ഗൃണന്നനുഗഗീതപവിത്രകീർത്തിർ-
ഗ്ഗോപീദൃഗുത്സവദൃശിഃ പ്രവിവേശ ഗോഷ്ഠം ॥ 47 ॥
അദ്യാനേന മഹാവ്യാലോ യശോദാനന്ദസൂനുനാ ।
ഹതോഽവിതാ വയം ചാസ്മാദിതി ബാലാ വ്രജേ ജഗുഃ ॥ 48 ॥
രാജോവാച
ബ്രഹ്മൻ പരോദ്ഭവേ കൃഷ്ണേ ഇയാൻ പ്രേമാ കഥം ഭവേത് ।
യോഽഭൂതപൂർവ്വസ്തോകേഷു സ്വോദ്ഭവേഷ്വപി കഥ്യതാം ॥ 49 ॥
ശ്രീശുക ഉവാച
സർവ്വേഷാമപി ഭൂതാനാം നൃപ സ്വാത്മൈവ വല്ലഭഃ ।
ഇതരേഽപത്യവിത്താദ്യാസ്തദ് ല്ലഭതയൈവ ഹി ॥ 50 ॥
തദ് രാജേന്ദ്ര യഥാ സ്നേഹഃ സ്വസ്വകാത്മനി ദേഹിനാം ।
ന തഥാ മമതാലംബിപുത്രവിത്തഗൃഹാദിഷു ॥ 51 ॥
ദേഹാത്മവാദിനാം പുംസാമപി രാജന്യസത്തമ ।
യഥാ ദേഹഃ പ്രിയതമസ്തഥാ ന ഹ്യനു യേ ച തം ॥ 52 ॥
ദേഹോഽപി മമതാഭാക്ചേത്തർഹ്യസൌ നാത്മവത്പ്രിയഃ ।
യജ്ജീര്യത്യപി ദേഹേഽസ്മിൻ ജീവിതാശാ ബലീയസീ ॥ 53 ॥
തസ്മാത്പ്രിയതമഃ സ്വാത്മാ സർവ്വേഷാമപി ദേഹിനാം ।
തദർത്ഥമേവ സകലം ജഗദേതച്ചരാചരം ॥ 54 ॥
കൃഷ്ണമേനമവേഹി ത്വമാത്മാനമഖിലാത്മനാം ।
ജഗദ്ധിതായ സോഽപ്യത്ര ദേഹീവാഭാതി മായയാ ॥ 55 ॥
വസ്തുതോ ജാനതാമത്ര കൃഷ്ണം സ്ഥാസ്നു ചരിഷ്ണു ച ।
ഭഗവദ്രൂപമഖിലം നാന്യദ് വസ്ത്വിഹ കിഞ്ചന ॥ 56 ॥
സർവ്വേഷാമപി വസ്തൂനാം ഭാവാർത്ഥോ ഭവതി സ്ഥിതഃ ।
തസ്യാപി ഭഗവാൻ കൃഷ്ണഃ കിമതദ്വസ്തു രൂപ്യതാം ॥ 57 ॥
സമാശ്രിതാ യേ പദപല്ലവപ്ലവം
മഹത്പദം പുണ്യയശോ മുരാരേഃ ।
ഭവാംബുധിർവ്വത്സപദം പരം പദം
പദം പദം യദ്വിപദാം ന തേഷാം ॥ 58 ॥
ഏതത്തേ സർവ്വമാഖ്യാതം യത്പൃഷ്ടോഽഹമിഹ ത്വയാ ।
യത്കൌമാരേ ഹരികൃതം പൌഗണ്ഡേ പരികീർത്തിതം ॥ 59 ॥
ഏതത്സുഹൃദ്ഭിശ്ചരിതം മുരാരേ-
രഘാർദ്ദനം ശാദ്വലജേമനം ച ।
വ്യക്തേതരദ്രൂപമജോർവ്വഭിഷ്ടവം
ശൃണ്വൻ ഗൃണന്നേതി നരോഽഖിലാർത്ഥാൻ ॥ 60 ॥
ഏവം വിഹാരൈഃ കൌമാരൈഃ കൌമാരം ജഹതുർവ്രജേ ।
നിലായനൈഃ സേതുബന്ധൈർമ്മർക്കടോത്പ്ലവനാദിഭിഃ ॥ 61 ॥