രാമായണം/ബാലകാണ്ഡം/അധ്യായം69

വിക്കിഗ്രന്ഥശാല സംരംഭത്തിൽ നിന്ന്
രാമായണം/ബാലകാണ്ഡം
രചന:വാൽമീകി
അധ്യായം69

1 തതഃ പ്രഭാതേ ജനകഃ കൃതകർമാ മഹർഷിഭിഃ
 ഉവാച വാക്യം വാക്യജ്ഞഃ ശതാനന്ദം പുരോഹിതം
2 ഭ്രാതാ മമ മഹാതേജാ യവീയാൻ അതിധാർമികഃ
 കുശധ്വജ ഇതി ഖ്യാതഃ പുരീം അധ്യവസച് ഛുഭാം
3 വാര്യാഫലകപര്യന്താം പിബന്ന് ഇക്ഷുമതീം നദീം
 സാങ്കാശ്യാം പുണ്യസങ്കാശാം വിമാനം ഇവ പുഷ്പകം
4 തം അഹം ദ്രഷ്ടും ഇച്ഛാമി യജ്ഞഗോപ്താ സ മേ മതഃ
 പ്രീതിം സോ ഽപി മഹാതേജാ ഇംമാം ഭോക്താ മയാ സഹ
5 ശാസനാത് തു നരേന്ദ്രസ്യ പ്രയയുഃ ശീഘ്രവാജിഭിഃ
 സമാനേതും നരവ്യാഘ്രം വിഷ്ണും ഇന്ദ്രാജ്ഞയാ യഥാ
6 ആജ്ഞയാ തു നരേന്ദ്രസ്യ ആജഗാമ കുശധ്വജഃ
7 സ ദദർശ മഹാത്മാനം ജനകം ധർമവത്സലം
 സോ ഽഭിവാദ്യ ശതാനന്ദം രാജാനം ചാപി ധാർമികം
8 രാജാർഹം പരമം ദിവ്യം ആസനം ചാധ്യരോഹത
 ഉപവിഷ്ടാവ് ഉഭൗ തൗ തു ഭ്രാതരാവ് അമിതൗജസൗ
9 പ്രേഷയാം ആസതുർ വീരൗ മന്ത്രിശ്രേഷ്ഠം സുദാമനം
 ഗച്ഛ മന്ത്രിപതേ ശീഘ്രം ഐക്ഷ്വാകം അമിതപ്രഭം
 ആത്മജൈഃ സഹ ദുർധർഷം ആനയസ്വ സമന്ത്രിണം
10 ഔപകാര്യാം സ ഗത്വാ തു രഘൂണാം കുലവർധനം
  ദദർശ ശിരസാ ചൈനം അഭിവാദ്യേദം അബ്രവീത്
11 അയോധ്യാധിപതേ വീര വൈദേഹോ മിഥിലാധിപഃ
  സ ത്വാം ദ്രഷ്ടും വ്യവസിതഃ സോപാധ്യായപുരോഹിതം
12 മന്ത്രിശ്രേഷ്ഠവചഃ ശ്രുത്വാ രാജാ സർഷിഗണസ് തദാ
  സബന്ധുർ അഗമത് തത്ര ജനകോ യത്ര വർതതേ
13 സ രാജാ മന്ത്രിസഹിതഃ സോപാധ്യായഃ സബാന്ധവഃ
  വാക്യം വാക്യവിദാം ശ്രേഷ്ഠോ വൈദേഹം ഇദം അബ്രവീത്
14 വിദിതം തേ മഹാരാജ ഇക്ഷ്വാകുകുലദൈവതം
  വക്താ സർവേഷു കൃത്യേഷു വസിഷ്ഠോ ഭഗവാൻ ഋഷിഃ
15 വിശ്വാമിത്രാഭ്യനുജ്ഞാതഃ സഹ സർവൈർ മഹർഷിഭിഃ
  ഏഷ വക്ഷ്യതി ധർമാത്മാ വസിഷ്ഠോ മേ യഥാക്രമം
16 തൂഷ്ണീംഭൂതേ ദശരഥേ വസിഷ്ഠോ ഭഗവാൻ ഋഷിഃ
  ഉവാച വാക്യം വാക്യജ്ഞോ വൈദേഹം സപുരോഹിതം
17 അവ്യക്തപ്രഭവോ ബ്രഹ്മാ ശാശ്വതോ നിത്യ അവ്യയഃ
  തസ്മാൻ മരീചിഃ സഞ്ജജ്ഞേ മരീചേഃ കശ്യപഃ സുതഃ
18 വിവസ്വാൻ കശ്യപാജ് ജജ്ഞേ മനുർ വൈവൈവതഃ സ്മൃതഃ
  മനുഃ പ്രജാപതിഃ പൂർവം ഇക്ഷ്വാകുസ് തു മനോഃ സുതഃ
19 തം ഇക്ഷ്വാകും അയോധ്യായാം രാജാനം വിദ്ധി പൂർവകം
  ഇക്ഷ്വാകോസ് തു സുതഃ ശ്രീമാൻ വികുക്ഷിർ ഉദപദ്യത
20 വികുക്ഷേസ് തു മഹാതേജാ ബാണഃ പുത്രഃ പ്രതാപവാൻ
  ബാണസ്യ തു മഹാതേജാ അനരണ്യഃ പ്രതാപവാൻ
21 അനരണ്യാത് പൃഥുർ ജജ്ഞേ ത്രിശങ്കുസ് തു പൃഥോഃ സുതഃ
  ത്രിശങ്കോർ അഭവത് പുത്രോ ധുന്ധുമാരോ മഹായശാഃ
22 ധുന്ധുമാരാൻ മഹാതേജാ യുവനാശ്വോ മഹാരഥഃ
  യുവനാശ്വസുതഃ ശ്രീമാൻ മാന്ധാതാ പൃഥിവീപതിഃ
23 മാന്ധാതുസ് തു സുതഃ ശ്രീമാൻ സുസന്ധിർ ഉദപദ്യത
  സുസന്ധേർ അപി പുത്രൗ ദ്വൗ ധ്രുവസന്ധിഃ പ്രസേനജിത്
24 യശസ്വീ ധ്രുവസന്ധേസ് തു ഭരതോ നാമ നാമതഃ
  ഭരതാത് തു മഹാതേജാ അസിതോ നാമ ജായത
25 സഹ തേന ഗരേണൈവ ജാതഃ സ സഗരോ ഽഭവത്
  സഗരസ്യാസമഞ്ജസ് തു അസമഞ്ജാദ് അഥാംശുമാൻ
26 ദിലീപോ ഽംശുമതഃ പുത്രോ ദിലീപസ്യ ഭഗീരഥഃ
  ഭഗീരഥാത് കകുത്സ്ഥശ് ച കകുത്സ്ഥസ്യ രഘുസ് തഥാ
27 രഘോസ് തു പുത്രസ് തേജസ്വീ പ്രവൃദ്ധഃ പുരുഷാദകഃ
  കൽമാഷപാദോ ഹ്യ് അഭവത് തസ്മാജ് ജാതസ് തു ശംഖണഃ
28 സുദർശനഃ ശംഖണസ്യ അഗ്നിവർണഃ സുദർശനാത്
  ശീഘ്രഗസ് ത്വ് അഗ്നിവർണസ്യ ശീഘ്രഗസ്യ മരുഃ സുതഃ
29 മരോഃ പ്രശുശ്രുകസ് ത്വ് ആസീദ് അംബരീഷഃ പ്രശുശ്രുകാത്
  അംബരീഷസ്യ പുത്രോ ഽഭൂൻ നഹുഷഃ പൃഥിവീപതിഃ
30 നഹുഷസ്യ യയാതിസ് തു നാഭാഗസ് തു യയാതിജഃ
  നാഭാഗസ്യ ഭഭൂവാജ അജാദ് ദശരഥോ ഽഭവത്
  തസ്മാദ് ദശരഥാജ് ജാതൗ ഭ്രാതരൗ രാമലക്ഷ്മണൗ
31 ആദിവംശവിശുദ്ധാനാം രാജ്ഞാം പരമധർമിണാം
  ഇക്ഷ്വാകുകുലജാതാനാം വീരാണാം സത്യവാദിനാം
32 രാമലക്ഷ്മണയോർ അർഥേ ത്വത്സുതേ വരയേ നൃപ
  സദൃശാഭ്യാം നരശ്രേഷ്ഠ സദൃശേ ദാതും അർഹസി