മഹാഭാരതം മൂലം/സഭാപർവം/അധ്യായം26

മഹാഭാരതം മൂലം/സഭാപർവം
രചന:വ്യാസൻ
അധ്യായം26

1 [വ്]
     ഏതസ്മിന്ന് ഏവ കാലേ തു ഭീമസേനോ ഽപി വീര്യവാൻ
     ധർമരാജം അനുജ്ഞാപ്യ യയൗ പ്രാചീം ദിശം പ്രതി
2 മഹതാ ബലചക്രേണ പരരാഷ്ട്രാവമർദിനാ
     വൃതോ ഭരതശാർദൂലോ ദ്വിഷച് ഛോകവിവർധനഃ
3 സ ഗത്വാ രാജശാർദൂലഃ പാഞ്ചാലാനാം പുരം മഹത്
     പാഞ്ചാലാൻ വിവിധോപായൈഃ സാന്ത്വയാം ആസ പാണ്ഡവഃ
4 തതഃ സഗണ്ഡകീം ശൂരോ വിദേഹാംശ് ച നരർഷഭഃ
     വിജിത്യാൽപേന കാലേന ദശാർണാൻ അഗമത് പ്രഭുഃ
5 തത്ര ദാശാർഹകോ രാജാ സുധർമാ ലോമഹർഷണം
     കൃതവാൻ കർമ ഭീമേന മഹദ് യുദ്ധം നിരായുധം
6 ഭീമസേനസ് തു തദ് ദൃഷ്ട്വാ തസ്യ കർമ പരന്തപഃ
     അധിസേനാ പതിം ചക്രേ സുധർമാണം മഹാബലം
7 തതഃ പ്രാചീം ദിശം ഭീമോ യയൗ ഭീമപരാക്രമഃ
     സൈന്യേന മഹതാ രാജൻ കമ്പയന്ന് ഇവ മേദിനീം
8 സോ ഽശ്വമേധേശ്വരം രാജൻ രോചമാനം സഹാനുജം
     ജിഗായ സമരേ വീരോ ബലേന ബലിനാം വരഃ
9 സ തം നിർജിത്യ കൗന്തേയോ നാതിതീവ്രേണ കർമണാ
     പൂർവദേശം മഹാവീര്യോ വിജിഗ്യേ കുരുനന്ദനഃ
10 തതോ ദക്ഷിണം ആഗമ്യ പുലിന്ദ നഗരം മഹത്
    സുകുമാരം വശേ ചക്രേ സുമിത്രം ച നരാധിപം
11 തതസ് തു ധർമരാജസ്യ ശാസനാദ് ഭരതർഷഭഃ
    ശിശുപാലം മഹാവീര്യം അഭ്യയാജ് ജനമേജയ
12 ചേദിരാജോ ഽപി തച് ഛ്രുത്വാ പാണ്ഡവസ്യ ചികീർഷിതം
    ഉപനിഷ്ക്രമ്യ നഗരാത് പ്രത്യഗൃഹ്ണാത് പരന്തപഃ
13 തൗ സമേത്യ മഹാരാജ കുരു ചേദിവൃഷൗ തദാ
    ഉഭയോർ ആത്മകുലയോഃ കൗശല്യം പര്യപൃച്ഛതാം
14 തതോ നിവേദ്യ തദ് രാഷ്ട്രം ചേദിരാജോ വിശാം പതേ
    ഉവാച ഭീമം പ്രഹസൻ കിം ഇദം കുരുഷേ ഽനഘ
15 തസ്യ ഭീമസ് തദാചഖ്യൗ ധർമരാജ ചികീർഷിതം
    സ ച തത് പ്രതിഗൃഹ്യൈവ തഥാ ചക്രേ നരാധിപഃ
16 തതോ ഭീമസ് തത്ര രാജന്ന് ഉഷിത്വാ ത്രിദശാഃ ക്ഷപാഃ
    സത്കൃതഃ ശിശുപാലേന യയൗ സബലവാഹനഃ