മഹാഭാരതം മൂലം/സഭാപർവം/അധ്യായം23

←അധ്യായം22

മഹാഭാരതം മൂലം/സഭാപർവം രചന:വ്യാസൻ അധ്യായം23

അധ്യായം24→

1 [വ്]
     പാർഥഃ പ്രാപ്യ ധനുഃശ്രേഷ്ഠം അക്ഷയ്യൗ ച മഹേഷുധീ
     രഥം ധ്വജം സഭാം ചൈവ യുധിഷ്ഠിരം അഭാഷത
 2 ധനുർ അസ്ത്രം ശരാ വീര്യം പക്ഷോ ഭൂമിർ യശോബലം
     പ്രാപ്തം ഏതൻ മയാ രാജൻ ദുഷ്പ്രാപം യദ് അഭീപ്സിതം
 3 തത്ര കൃത്യം അഹം മന്യേ കോശസ്യാസ്യ വിവർധനം
     കരം ആഹാരയിഷ്യാമി രാജ്ഞഃ സർവാൻ നൃപോത്തമ
 4 വിജയായ പ്രയാസ്യാമി ദിശം ധനദ രക്ഷിതാം
     തിഥാവ് അഥ മുഹൂർതേ ച നക്ഷത്രേ ച തഥാ ശിവേ
 5 ധനഞ്ജയ വചോ ശ്രുത്വാ ധർമരാജോ യുധിഷ്ഠിരഃ
     സ്നിഗ്ധഗംഭീര നാദിന്യാ തം ഗിരാ പ്രത്യഭാഷത
 6 സ്വസ്തി വാച്യാർഹതോ വിപ്രാൻ പ്രയാഹി ഭരതർഷഭ
     ദുർഹൃദാം അപ്രഹർഷായ സുഹൃദാം നന്ദനായ ച
     വിജയസ് തേ ധ്രുവം പാർഥ പ്രിയം കാമം അവാപ്നുഹി
 7 ഇത്യ് ഉക്തഃ പ്രയയൗ പാർഥഃ സൈന്യേന മഹതാ വൃതഃ
     അഗ്നിദത്തേന ദിവ്യേന രഥേനാദ്ഭുതകർമണാ
 8 തഥൈവ ഭീമസേനോ ഽപി യമൗ ച പുരുഷർഷഭൗ
     സ സൈന്യാഃ പ്രയയുഃ സർവേ ധർമരാജാഭി പൂജിതാഃ
 9 ദിശം ധനപതേർ ഇഷ്ടാം അജയത് പാകശാസനിഃ
     ഭീമസേനസ് തഥാ പ്രാചീം സഹദേവസ് തു ദക്ഷിണാം
 10 പ്രതീചീം നകുലോ രാജൻ ദിശം വ്യജയദ് അസ്ത്രവിത്
    ഖാണ്ഡവ പ്രസ്ഥം അധ്യാസ്തേ ധർമരാജോ യുധിഷ്ഠിരഃ
11 [ജ്]
    ദിശാം അഭിജയം ബ്രഹ്മൻ വിസ്തരേണാനുകീർതയ
    ന ഹി തൃപ്യാമി പൂർവേഷാം ശൃണ്വാനശ് ചരിതം മഹത്
12 [വൈ]
    ധനഞ്ജയസ്യ വക്ഷ്യാമി വിജയം പൂർവം ഏവ തേ
    യൗഗപദ്യേന പാർഥൈർ ഹി വിജിതേയം വസുന്ധരാ
13 പൂർവം കുണിന്ദ വിഷയേ വശേ ചക്രേ മഹീപതീൻ
    ധനഞ്ജയോ മഹാബാഹുർ നാതിതീവ്രേണ കർമണാ
14 ആനർതാൻ കാലകൂടാംശ് ച കുണിന്ദാംശ് ച വിജിത്യ സഃ
    സുമണ്ഡലം പാപജിതം കൃതവാൻ അനു സൈനികം
15 സ തേന സഹിതോ രാജൻ സവ്യസാചീ പരന്തപഃ
    വിജിഗ്യേ സകലം ദ്വീപം പ്രതിവിന്ധ്യം ച പാർഥിവം
16 സകല ദ്വീപവാസാംശ് ച സപ്ത ദ്വീപേ ച യേ നൃപാഃ
    അർജുനസ്യ ച സൈന്യാനാം വിഗ്രഹസ് തുമുലോ ഽഭവത്
17 സ താൻ അപി മഹേഷ്വാസോ വിജിത്യ ഭരതർഷഭ
    തൈർ ഏവ സഹിതഃ സർവൈഃ പ്രാഗ്ജ്യോതിഷം ഉപാദ്രവത്
18 തത്ര രാജാ മഹാൻ ആസീദ് ഭഗദത്തോ വിശാം പതേ
    തേനാസീത് സുമഹദ് യുദ്ധം പാണ്ഡവസ്യ മഹാത്മനഃ
19 സ കിരാതൈശ് ച ചീനൈശ് ച വൃതഃ പ്രാഗ്ജ്യോതിഷോ ഽഭവത്
    അന്യൈശ് ച ബഹുഭിർ യോധൈഃ സാഗരാനൂപവാസിഭിഃ
20 തതഃ സ ദിവസാൻ അഷ്ടൗ യോധയിത്വാ ധനഞ്ജയം
    പ്രഹസന്ന് അബ്രവീദ് രാജാ സംഗ്രാമേ വിഗതക്ലമഃ
21 ഉപപന്നം മഹാബാഹോ ത്വയി പാണ്ഡവനന്ദന
    പാകശാസനദായാദേ വീര്യം ആഹവശോഭിനി
22 അഹം സഖാ സുരേന്ദ്രസ്യ ശക്രാദ് അനവമോ രണേ
    ന ച ശക്നോമി തേ താത സ്ഥാതും പ്രമുഖതോ യുധി
23 കിം ഈപ്സിതം പാണ്ഡവേയ ബ്രൂഹി കിം കരവാണി തേ
    യദ് വക്ഷ്യസി മഹാബാഹോ തത് കരിഷ്യാമി പുത്രക
24 [അർ]
    കുരൂണാം ഋഷഭോ രാജാ ധർമപുത്രോ യുധിഷ്ഠിരഃ
    തസ്യ പാർഥിവതാം ഈപ്സേ കരസ് തസ്മൈ പ്രദീയതാം
25 ഭവാൻ പിതൃസഖാ ചൈവ പ്രീയമാണോ മയാപി ച
    തതോ നാജ്ഞാപയാമി ത്വാം പ്രീതിപൂർവം പ്രദീയതാം
26 [ഭ]
    കുന്തീ മാതർ യഥാ മേ ത്വം തഥാ രാജാ യുധിഷ്ഠിരഃ
    സർവം ഏതത് കരിഷ്യാമി കിം ചാന്യത് കരവാണി തേ