മഹാഭാരതം മൂലം/വിരാടപർവം/അധ്യായം62
| ←അധ്യായം61 | മഹാഭാരതം മൂലം/വിരാടപർവം രചന: അധ്യായം62 |
അധ്യായം63→ |
1 [വൈ]
തതോ വിജിത്യ സംഗ്രാമേ കുരൂൻ ഗോവൃഷഭേക്ഷണഃ
സമാനയാം ആസ തദാ വിരാടസ്യ ധനം മഹത്
2 ഗതേഷു ച പ്രഭഗ്നേഷു ധാർതരാഷ്ട്രേഷു സർവശഃ
വനാൻ നിഷ്ക്രമ്യ ഗഹനാദ് ബഹവഃ കുരു സൈനികാഃ
3 ഭയാത് സന്ത്രസ്തമനസഃ സമാജഗ്മുസ് തതസ് തതഃ
മുക്തകേശാ വ്യദൃശ്യന്ത സ്ഥിതാഃ പ്രാഞ്ജലയസ് തദാ
4 ക്ഷുത്പിപാസാപരിശ്രാന്താ വിദേശ സ്ഥാ വിചേതസഃ
ഊചുഃ പ്രണമ്യ സംഭ്രാന്താഃ പാർഥ കിം കരവാം അതേ
5 [അർജ്]
സ്വസ്തി വ്രജത ഭദ്രം വോ ന ഭേതവ്യം കഥം ചന
നാഹം ആർതാഞ് ജിഘാംസാമി ഭൃശം ആശ്വാസയാമി വഃ
6 [വൈ]
തസ്യ താം അഭയാം വാചം ശ്രുത്വാ യോധാഃ സമാഗതാഃ
ആയുഃ കീർതിയശോ ദാഭിസ് തം ആശിർ ഭിർ അനന്ദയൻ
7 തതോ നിവൃത്താഃ കുരവഃ പ്രഭഗ്നാ വശം ആസ്ഥിതാഃ
പന്ഥാനം ഉപസംഗമ്യ ഫൽഗുനോ വാക്യം അബ്രവീത്
8 രാജപുത്ര പ്രത്യവേക്ഷ സമാനീതാനി സർവശഃ
ഗോകുലാനി മഹാബാഹോ വീര ഗോപാലകൈഃ സഹ
9 തതോ ഽഹരാഹ്ണേ യാസ്യാമോ വിരാടനഗരം പ്രതി
ആശ്വാസ്യ പായയിത്വാ ച പരിപ്ലാവ്യ ച വാജിനഃ
10 ഗച്ഛന്തു ത്വരിതാശ് ചൈവ ഗോപാലാഃ പ്രേഷിതാസ് ത്വയാ
നഗരേ പ്രിയം ആഖ്യാതും ഘോഷയന്തു ച തേ ജയം
11 [വൈ]
ഉത്തരസ് ത്വരമാണോ ഽഥ ദൂതാൻ ആജ്ഞാപയത് തതഃ
വചനാദ് അർജുനസ്യൈവ ആചക്ഷധ്വം ജയം മമ