മഹാഭാരതം മൂലം/വിരാടപർവം/അധ്യായം60

മഹാഭാരതം മൂലം/വിരാടപർവം
രചന:വ്യാസൻ
അധ്യായം60

1 [വൈ]
     ഭീഷ്മേ തു സംഗ്രാമശിരോ വിഹായ; പലായമാനേ ധേതരാഷ്ട്ര പുത്രഃ
     ഉച്ഛ്രിത്യ കേതും വിനദൻ മഹാത്മാ; സ്വയം വിഗൃഹ്യാർജുനം ആസസാദ
2 സ ഭീമധന്വാനം ഉദഗ്രവീര്യം; ധനഞ്ജയം ശത്രുഗണേ ചരന്തം
     ആ കർണ പൂർണായതചോദിതേന; ഭല്ലേന വിവ്യാധ ലലാടമധ്യേ
3 സ തേന ബാണേന സമർപിതേന; ജാംബൂനദാഭേന സുസംശിതേന
     രരാജ രാജൻ മഹനീയ കർമാ; യഥൈക പർവാ രുചിരൈക ശൃംഗഃ
4 അഥാസ്യ ബാണേന വിദാരിതസ്യ; പ്രാദുർബഭൂവാസൃഗ് അജസ്രം ഉഷ്ണം
     സാ തസ്യ ജാംബൂനദപുഷ്പചിത്രാ; മാലേവ ചിത്രാഭിവിരാജതേ സ്മ
5 സ തേന ബാണാഭിഹതസ് തരസ്വീ; ദുര്യോധനേനോദ്ധത മന്യുവേഗഃ
     ശരാൻ ഉപാദായ വിഷാഗ്നികൽപാൻ; വിവ്യാധ രാജാനം അദീനസത്ത്വഃ
6 ദുര്യോധനശ് ചാപി തം ഉഗ്രതേജാഃ; പാർഥശ് ച ദുര്യോധനം ഏകവീരഃ
     അന്യോന്യം ആജൗ പുരുഷപ്രവീരൗ; സമം സമാജഘ്നതുർ ആജമീഢൗ
7 തതഃ പ്രഭിന്നേന മഹാഗജേന; മഹീധരാഭേന പുനർ വികർണഃ
     രഥൈശ് ചതുർഭിർ ഗജപാദരക്ഷൈഃ; കുന്തീസുതം ജിഷ്ണും അഥാഭ്യധാവത്
8 തം ആപതന്തം ത്വരിതം ഗജേന്ദ്രം; ധനഞ്ജയഃ കുംഭവിഭാഗമധ്യേ
     ആ കർണ പൂർണേന ദൃഢായസേന; ബാണേന വിവ്യാധ മഹാജവേന
9 പാർഥേന സൃഷ്ടഃ സ തു ഗാർധ്രപത്ര; ആ പുംഖദേശാത് പ്രവിവേശ നാഗം
     വിദാര്യ ശൈലപ്രവര പ്രകാശം; യഥാശനിഃ പർവതം ഇന്ദ്ര സൃഷ്ടഃ
10 ശരപ്രതപ്തഃ സ തു നാഗരാജഃ; പ്രവേപിതാംഗോ വ്യഥിതാന്തർ ആത്മാ
    സംസീദമാനോ നിപപാത മഹ്യാം; വജ്രാഹതം ശൃംഗം ഇവാചലസ്യ
11 നിപാതിതേ ദന്തിവരേ പൃഥിവ്യാം; ത്രാസാദ് വികർണഃ സഹസാവതീര്യ
    തൂർണം പദാന്യ് അഷ്ട ശതാനി ഗത്വാ; വിവിംശതേഃ സ്യന്ദനം ആരുരോഹ
12 നിഹത്യ നാഗം തു ശരേണ തേന; വജ്രോപമേനാദ്രിവരാംബുദാഭം
    തഥാവിധേനൈവ ശരേണ പാർഥോ; ദുര്യോധനം വക്ഷസി നിർബിഭേദ
13 തതോ ഗജേ രാജനി ചൈവ ഭിന്നേ; ഭഗ്നേ വികർണേ ച സ പാദരക്ഷേ
    ഗാണ്ഡീവമുക്തൈർ വിശിഖൈഃ പ്രണുന്നാസ്; തേ യുധ മുഖ്യാഃ സഹസാപജഗ്മുഃ
14 ദൃഷ്ട്വൈവ ബാണേന ഹതം തു നാഗം; യോധാംശ് ച സർവാൻ ദ്രവതോ നിശമ്യ
    രഥം സമാവൃത്യ കുരുപ്രവീരോ; രണാത് പ്രദുദ്രാവ യതോ ന പാർഥഃ
15 തം ഭീമരൂപം ത്വരിതം ദ്രവന്തം; ദുര്യോധനം ശത്രുസഹോ നിഷംഗീ
    പ്രാക്ഷ്വേഡയദ് യോദ്ധുമനാഃ കിരീടീ; ബാണേന വിദ്ധം രുധിരം വമന്തം
16 [അർജ്]
    വിഹായ കീർതിം വിപുലം യശശ് ച; യുദ്ധാത് പരാവൃത്യ പലായസേ കിം
    ന തേ ഽദ്യ തൂര്യാണി സമാഹതാനി; യഥാവദ് ഉദ്യാന്തി ഗതസ്യ യുദ്ധേ
17 യുധിഷ്ഠിരസ്യാസ്മി നിദേശകാരീ; പാർഥസ് തൃതീയോ യുധി ച സ്ഥിരോ ഽസ്മി
    തദർഥം ആവൃത്യ മുഖം പ്രയച്ഛ; നരേന്ദ്ര വൃത്തം സ്മര ധാർതരാഷ്ട്ര
18 മോഘം തവേദം ഭുവി നാമധേയം; ദുര്യോധനേതീഹ കൃതം പുരസ്താത്
    ന ഹീഹ ദുര്യോധനതാ തവാസ്തി; പലായമാനസ്യ രണം വിഹായ
19 ന തേ പുരസ്താദ് അഥ പൃഷ്ഠതോ വാ; പശ്യാമി ദുര്യോധന രക്ഷിതാരം
    പരൈഹി യുദ്ധേന കുരുപ്രവീര; പ്രാണാൻ പ്രിയാൻ പാണ്ഡവതോ ഽദ്യ രക്ഷ