മഹാഭാരതം മൂലം/വിരാടപർവം/അധ്യായം58
| ←അധ്യായം57 | മഹാഭാരതം മൂലം/വിരാടപർവം രചന: അധ്യായം58 |
അധ്യായം59→ |
1 [വൈ]
അഥ ദുര്യോധനഃ കർണോ ദുഃശാസനവിവിംശതീ
ദ്രോണശ് ച സഹ പുത്രേണ കൃപശ് ചാതിരഥോ രണേ
2 പുനർ ഈയുഃ സുസംരബ്ധാ ധനഞ്ജയ ജിഘാംസയാ
വിസ്ഫാരയന്തശ് ചാപാനിബലവന്തി ദൃഢാനി ച
3 താൻ പ്രകീർണപതാകേന രഥേനാദിത്യവർചസാ
പ്രത്യുദ്യയൗ മഹാരാജൻ സമസ്താൻ വാനരധ്വജഃ
4 തതഃ കൃപശ് ച കർണശ് ച ദ്രോണശ് ച രഥിനാം വരഃ
തം മഹാസ്ത്രൈർ മഹാവീര്യം പരിവാര്യ ധനഞ്ജയം
5 ശരൗഘാൻ സമ്യഗ് അസ്യന്തോ ജീമൂതാ ഇവ വാർഷികാഃ
വവർഷുഃ ശരവർഷാണി പ്രപതന്തം കിരീടിനം
6 ഇഷുഭിർ ബഹുഭിസ് തൂർണം സമരേ ലോമവാഹിഭിഃ
അദൂരാത് പര്യവസ്ഥായ പൂരയാം ആസുർ ആദൃതാഃ
7 തഥാവകീർണസ്യ ഹി തൈർ ദിവ്യൈർ അസ്ത്രൈഃ സമന്തതഃ
ന തസ്യ ദ്വ്യംഗുലം അപി വിവൃതം സമദൃശ്യത
8 തതഃ പ്രഹസ്യ ബീഭത്സുർ ദിവ്യം ഐന്ദ്രം മഹാരഥഃ
അസ്ത്രം ആദിത്യസങ്കാശം ഗാണ്ഡീവേ സമയോജയത്
9 സ രശ്മിഭിർ ഇവാദിത്യഃ പ്രതപൻ സമരേ ബലീ
കിരീടമാലീ കൗന്തേയഃ സർവാൻ പ്രാച്ഛാദയത് കുരൂൻ
10 യഥാബലാഹകേ വിദ്യൂത് പാവകോ വാ ശിലോച്ചയേ
തഥാ ഗാണ്ഡീവം അഭവദ് ഇന്ദ്രായുധം ഇവാതതം
11 യഥാ വർഷതി പർജന്യേ വിദ്യുദ് വിഭ്രാജതേ ദിവി
തഥാ ദശ ദിശഃ സർവാഃ പതദ് ഗാണ്ഡീവം ആവൃണോത്
12 ത്രസ്താശ് ച രഥിനഃ സർവേ ബഭൂവുസ് തത്ര സർവശഃ
സർവേ ശാന്തി പരാ ഭൂത്വാ സ്വചിത്താനി ന ലേഭിരേ
സംഗ്രാമവിമുഖാഃ സർവേ യോധാസ് തേ ഹതചേതസഃ
13 ഏവം സർവാണി സൈന്യാനി ഭഗ്നാനി ഭരതർഷഭ
പ്രാദ്രവന്ത ദിശഃ സർവാ നിരാശാനി സ്വജീവിതേ