മഹാഭാരതം മൂലം/വിരാടപർവം/അധ്യായം57

മഹാഭാരതം മൂലം/വിരാടപർവം
രചന:വ്യാസൻ
അധ്യായം57

1 [വൈ]
     അഥ സംഗമ്യ സർവേ തു കൗരവാണാം മഹാരഥാഃ
     അർജുനം സഹിതാ യത്താഃ പ്രത്യയുധ്യന്ത ഭാരത
2 സ സായകമയൈർ ജാലൈഃ സർവതസ് താൻ മഹാരഥാൻ
     പ്രാഛാദയദ് അമേയാത്മാ നീഹാര ഇവ പർവതാൻ
3 നരദ് ഭിശ് ച മഹാനാഗൈർ ഹേഷമാണൈശ് ച വാജിഭിഃ
     ഭേരീശംഖനിനാദൈശ് ച സ ശബ്ദസ് തുമുലോ ഽഭവത്
4 നരാശ്വകായാൻ നിർഭിദ്യ ലോഹാനി കവചാനി ച
     പാർഥസ്യ ശരജാലാനി വിനിഷ്പേതുഃ സഹസ്രശഃ
5 ത്വരമാണഃ ശരാൻ അസ്യാൻ പാണ്ഡവഃ സ ബഭൗ രണേ
     മധ്യന്ദിനഗതോ ഽർചിഷ്മാൻ പാണ്ഡവഃ സ ബഭൗ രണേ
6 ഉപപ്ലവന്ത വിത്രസ്താ രഥേഭ്യോ രഥിനസ് തദാ
     സാദിനശ് ചാശ്വപൃഷ്ഠേഭ്യോ ഭൂമൗ ചാപി പദാതയഃ
7 ശരൈഃ സന്താഡ്യമാനാനാം കവചാനാം മഹാത്മനാം
     താമ്രരാജതലോഹാനാം പ്രാദുരാസീൻ മഹാസ്വനഃ
8 ഛന്നം ആയോധനം സർവം ശരീരൈർ ഗതചേതസാം
     ഗജാശ്വസാദിഭിസ് തത്ര ശിതബാണാത്ത ജീവിതൈഃ
9 രഥോപസ്ഥാഭിപതിതൈർ ആസ്തൃതാ മാനവൈർ മഹീ
     പ്രനൃത്യദ് ഇവ സംഗ്രാമേ ചാപഹസ്തോ ധനഞ്ജയഃ
10 ശ്രുത്വാ ഗാണ്ഡീവനിർഘോഷം വിസ്ഫൂർജിതം ഇവാശനേഃ
    ത്രസ്താനി സർവഭൂതാനി വ്യഗച്ഛന്ത മഹാഹവാത്
11 കുണ്ഡലോഷ്ണീഷ ധാരീണി ജാതരൂപസ്രജാനി ച
    പതിതാനി സ്മ ദൃശ്യന്തേ ശിരാംസി രണമൂർധനി
12 വിശിഖോന്മഥിതൈർ ഗാത്രൈർ ബാഹുഭിശ് ച സ കാർമുകൈഃ
    സ ഹസ്താഭരണൈശ് ചാന്യൈഃ പ്രച്ഛന്നാ ഭാതി മേദിനീ
13 ശിരസാം പാത്യമാനാനാം അന്തരാ നിശിതൈഃ ശരൈഃ
    അശ്വവൃഷ്ടിർ ഇവാകാശാദ് അഭവദ് ഭരതർഷഭ
14 ദർശയിത്വാ തഥാത്മാനം രൗദ്രം രുദ്ര പരാക്രമഃ
    അവരുദ്ധശ് ചരൻ പാർഥോ ദശവർഷാണി ത്രീണി ച
    ക്രോധാഗ്നിം ഉത്സൃജദ് ഘോരം ധാർതരാഷ്ട്രേഷു പാണ്ഡവഃ
15 തസ്യ തദ് ദഹതഃ സൈന്യം ദൃഷ്ട്വാ ചൈവ പരാക്രമം
    സർവേ ശാന്തി പരാ യോധാ ധാർതരാഷ്ട്രസ്യ പശ്യതഃ
16 വിത്രാസയിത്വാ തത് സൈന്യം ദ്രാവയിത്വാ മഹാരഥാൻ
    അർജുനോ ജയതാം ശ്രേഷ്ഠഃ പര്യവർതത ഭാരത
17 പ്രാവർതയൻ നദീം ഘോരാം ശോണിതൗഘതരംഗിണീം
    അസ്ഥി ശൈവലസംബാധാം യുഗാന്തേ കാലനിർമിതാം
18 ശരചാപ പ്ലവാം ഘോരാം മാംസശോണിതകർദമാം
    മഹാരഥമഹാദ്വീപാം ശംഖദുന്ദുഭിനിസ്വനാം
    ചകാര മഹതീം പാർഥോ നദീം ഉത്തരശോണിതാം
19 ആദദാനസ്യ ഹി ശരാൻ സന്ധായ ച വിമുഞ്ചതഃ
    വികർഷതശ് ച ഗാണ്ഡീവം ന കിം ചിദ് ദൃശ്യതേ ഽന്തരം