മഹാഭാരതം മൂലം/വിരാടപർവം/അധ്യായം39

മഹാഭാരതം മൂലം/വിരാടപർവം
രചന:വ്യാസൻ
അധ്യായം39

1 [ഉത്തര]
     സുവർണവികൃതാനീമാന്യ് ആയുധാനി മഹാത്മനാം
     രുചിരാണി പ്രകാശന്തേ പാർഥാനാം ആശു കാരിണാം
2 ക്വ നു സ്വിദ് അർജുനഃ പാർഥഃ പൗരവ്യോ വാ യുധിഷ്ഠിരഃ
     നകുലഃ സഹദേവശ് ച ഭീമസേനശ് ച പാണ്ഡവഃ
3 സർവ ഏവ മഹാത്മാനഃ സർവാമിത്ര വിനാശനാഃ
     രാജ്യം അക്ഷൈഃ പരാകീര്യ ന ശ്രൂയന്തേ കദാ ചന
4 ദ്രൗപദീ ക്വ ച പാഞ്ചാലീ സ്ത്രീരത്നം ഇതി വിശ്രുതാ
     ജിതാൻ അക്ഷൈസ് തദാ കൃഷ്ണാ താൻ ഏവാന്വഗമദ് വനം
5 [അർജ്]
     അഹം അസ്മ്യ് അർജുനഃ പാർഥഃ സഭാസ്താരോ യുധിഷ്ഠിരഃ
     ബല്ലവോ ഭീമസേനസ് തു പിതുസ് തേ രസപാചകഃ
6 അശ്വബന്ധോ ഽഥ നകുലഃ സഹദേവസ് തു ഗോകുലേ
     സൈരന്ധീം ദ്രൗപദീം വിദ്ധി യത്കൃതേ കീചകാ ഹതാഃ
7 [ഉത്തര]
     ദശ പാർഥസ്യ നാമാനി യാനി പൂർവം ശ്രുതാനി മേ
     പ്രബ്രൂയാസ് താനി യദി മേ ശ്രദ്ദധ്യാം സർവം ഏവ തേ
8 [അർജ്]
     ഹന്ത തേ ഽഹം സമാചക്ഷേ ദശ നാമാനി യാനി മേ
     അർജുനഃ ഫൽഗുനോ ജിഷ്ണുഃ കിരീടീ ശ്വേതവാഹനഃ
     ബീഭത്സുർ വിജയഃ കൃഷ്ണഃ സവ്യസാചീ ധനഞ്ജയഃ
9 [ഉത്തര]
     കേനാസി വിജയോ നാമ കേനാസി ശ്വേതവാഹനഃ
     കിരീടീ നാമ കേനാസി സവ്യസാചീ കഥം ഭവാൻ
10 അർജുനഃ ഫൽഗുനോ ജിഷ്ണുഃ കൃഷ്ണോ ബീഭത്സുർ ഏവ ച
    ധനഞ്ജയശ് ച കേനാസി പ്രബ്രൂഹി മമ തത്ത്വതഃ
    ശ്രുതാ മേ തസ്യ വീരസ്യ കേവലാ നാമ ഹേതവഃ
11 [അർജ്]
    സർവാഞ് ജനപദാഞ് ജിത്വാ വിത്തം ആച്ഛിദ്യ കേവലം
    മധ്യേ ധനസ്യ തിഷ്ഠാമി തേനാഹുർ മാം ധനഞ്ജയം
12 അഭിപ്രയാമി സംഗ്രാമേ യദ് അഹം യുദ്ധദുർമദാ
    നാജിത്വാ വിനിവർതാമി തേന മാം വിജയം വിദുഃ
13 ശ്വേതാഃ കാഞ്ചനസംനാഹാ രഥേ യുജ്യന്തി മേ ഹയാഃ
    സംഗ്രാമേ യുധ്യമാനസ്യ തേനാഹം ശ്വേതവാഹനഃ
14 ഉത്തരാഭ്യാം ച പൂർവാഭ്യാം ഫൽഗുനീഭ്യാം അഹം ദിവാ
    ജാതോ ഹിമവതഃ പൃഷ്ഠേ തേന മാം ഫൽഗുനം വിദുഃ
15 പുരാ ശക്രേണ മേ ദത്തം യുധ്യതോ ദാനവർഷഭൈഃ
    കിരീടം മൂർധ്നി സൂര്യാഭം തേന മാഹുഃ കിരീടിനം
16 ന കുര്യാം കർമ ബീഭത്സം യുധ്യമാനഃ കഥം ചന
    തേന ദേവമനുഷ്യേഷു ബീഭത്സുർ ഇതി മാം വിദുഃ
17 ഉഭൗ മേ ദക്ഷിണൗ പാണീ ഗാണ്ഡീവസ്യ വികർഷണേ
    തേന ദേവമനുഷ്യേഷു സവ്യസാചീതി മാം വിദുഃ
18 പൃഥിവ്യാം ചതുരന്തായാം വർണോ മേ ദുർലഭഃ സമഃ
    കരോമി കർമ ശുൽകം ച തേന മാം അർജുനം വിദുഃ
19 അഹം ദുരാപോ ദുർധർഷോ ദമനഃ പാകശാസനിഃ
    തേന ദേവമനുഷ്യേഷു ജിഷ്ണു നാമാസ്മി വിശ്രുതഃ
20 കൃഷ്ണ ഇത്യ് ഏവ ദശമം നാമ ചക്രേ പിതാ മമ
    കൃഷ്ണാവദാതസ്യ സതഃ പ്രിയത്വാദ് ബാലകസ്യ വൈ
21 [വൈ]
    തതഃ പാർഥം സ വൈരാടിർ അഭ്യവാദയദ് അന്തികാത്
    അഹം ഭൂമിം ജയോ നാമ നാമ്നാഹം അപി ചോത്തരഃ
22 ദിഷ്ട്യാ ത്വാം പാർഥ പശ്യാമി സ്വാഗതം തേ ധനഞ്ജയ
    ലോഹിതാക്ഷ മഹാബാഹോ നാഗരാജകരോപമ
    യദ് അജ്ഞാനാദ് അവോചം ത്വാം ക്ഷന്തും അർഹസി തൻ മമ
23 യതസ് ത്വയാ കൃതം പൂർവം വിചിത്രം കർമ ദുഷ്കരം
    അതോ ഭയം വ്യതീതം മേ പ്രീതിശ് ച പരമാ ത്വയി