മഹാഭാരതം മൂലം/വിരാടപർവം/അധ്യായം40

മഹാഭാരതം മൂലം/വിരാടപർവം
രചന:വ്യാസൻ
അധ്യായം40

1 [ഉത്തര]
     ആസ്ഥായ വിപുലം വീര രഥം സാരഥിനാ മയാ
     കതമം യാസ്യസേ ഽനീകം ഉക്തോ യാസ്യാമ്യ് അഹം ത്വയാ
2 [അർജ്]
     പ്രീതോ ഽസ്മി പുരുഷവ്യാഘ്ര ന ഭയം വിദ്യതേ തവ
     സർവാൻ നുദാമി തേ ശത്രൂൻ രണേ രണവിശാരദ
3 സ്വസ്ഥോ ഭവ മഹാബുദ്ധേ പശ്യ മാം ശത്രുഭിഃ സഹ
     യുധ്യമാനം വിമർദേ ഽസ്മിൻ കുർവാണം ഭൈരവം മഹത്
4 ഏതാൻ സർവാൻ ഉപാസംഗാൻ ക്ഷിപ്രം ബധ്നീഹി മേ രഥേ
     ഏതം ചാഹര നിസ്ത്രിംശം ജാതരൂപപരിഷ്കൃതം
     അഹം വൈ കുരുഭിർ യോത്സ്യാമ്യ് അവജേഷ്യാമി തേ പശൂൻ
5 സങ്കൽപപക്ഷ വിക്ഷേപം ബാഹുപ്രാകാരതോരണം
     ത്രിദണ്ഡതൂണ സംബാധം അനേകധ്വജസങ്കുലം
6 ജ്യാ ക്ഷേപണം ക്രോധകൃതം നേമീ നിനദദുന്ദുഭിഃ
     നഗരം തേ മയാ ഗുപ്തം രഥോപസ്ഥം ഭവിഷ്യതി
7 അധിഷ്ഠിതോ മയാ സംഖ്യേ രഥോ ഗാണ്ഡീവധന്വനാ
     അജേയഃ ശത്രുസൈന്യാനാം വൈരാടേ വ്യേതു തേ ഭയം
8 [ഉത്തര]
     ബിഭേമി നാഹം ഏതേഷാം ജാനാമി ത്വാം സ്ഥിരം യുധി
     കേശവേനാപി സംഗ്രാമേ സാക്ഷാദ് ഇന്ദ്രേണ വാ സമം
9 ഇദം തു ചിന്തയന്ന് ഏവ പരിമുഹ്യാമി കേവലം
     നിശ്ചയം ചാപി ദുർമേധാ ന ഗച്ഛാമി കഥം ചന
10 ഏവം വീരാംഗരൂപസ്യ ലക്ഷണൈർ ഉചിതസ്യ ച
    കേന കർമ വിപാകേന ക്ലീബത്വം ഇദം ആഗതം
11 മന്യേ ത്വാം ക്ലീബ വേഷേണ ചരന്തം ശൂലപാണിനം
    ഗന്ധർവരാജപ്രതിമം ദേവം വാപി ശതക്രതും
12 [അർജ്]
    ഭ്രാതുർ നിയോഗാജ് ജ്യേഷ്ഠസ്യ സംവത്സരം ഇദം വ്രതം
    ചരാമി ബ്രഹ്മചര്യം വൈ സത്യം ഏതദ് ബ്രവീമി തേ
13 നാസ്മി ക്ലീബോ മഹാബാഹോ പരവാൻ ധർമസംയുതഃ
    സമാപ്തവ്രതം ഉത്തീർണം വിദ്ധി മാം ത്വം നൃപാത്മജ
14 [ഉത്തര]
    പരമോ ഽനുഗ്രഹോ മേ ഽദ്യ യത് പ്രതർകോ ന മേ വൃഥാ
    ന ഹീദൃശാഃ ക്ലീബ രൂപാ ഭവന്തീഹ നരോത്തമാഃ
15 സഹായവാൻ അസ്മി രണേ യുധ്യേയം അമരൈർ അപി
    സാധ്വസം തത് പ്രനഷ്ടം മേ കിം കരോമി ബ്രവീഹി മേ
16 അഹം തേ സംഗ്രഹീഷ്യാമി ഹയാഞ് ശത്രുരഥാരുജഃ
    ശിക്ഷിതോ ഹ്യ് അസ്മി സാരഥ്യേ തീർഥതഃ പുരുഷർഷഭ
17 ദാരുകോ വാസുദേവസ്യ യഥാ ശക്രസ്യ മാതലിഃ
    തഥാ മാം വിദ്ധി സാരഥ്യേ ശിക്ഷിതം നരപുംഗവ
18 യസ്യ യാതേ ന പശ്യന്തി ഭൂമൗ പ്രാപ്തം പദം പദം
    ദക്ഷിണം യോ ധുരം യുക്തഃ സുഗ്രീവ സദൃശോ ഹയഃ
19 യോ ഽയം ധുരം ധുര്യവരോ വാമം വഹതി ശോഭനഃ
    തം മന്യേ മേഘപുഷ്പസ്യ ജവേന സദൃശം ഹയം
20 യോ ഽയം കാഞ്ചനസംനാഹഃ പാർഷ്ണിം വഹതി ശോഭനഃ
    വാമം സൈന്യസ്യ മന്യേ തം ജവേന ബലവത്തരം
21 യോ ഽയം വഹതി തേ പാർഷ്ണിം ദക്ഷിണാം അഞ്ചിതോദ്യതഃ
    ബലാഹകാദ് അപി മതഃ സ ജവേ വീര്യവത്തരഃ
22 ത്വാം ഏവായം രഥോ വോഢും സംഗ്രാമേ ഽർഹതി ധന്വിനം
    ത്വം ചേമം രഥം ആസ്ഥായ യോദ്ധും അർഹോ മതോ മമ
23 [വൈ]
    തതോ നിർമുച്യ ബാഹുഭ്യാം വലയാനി സ വീര്യവാൻ
    ചിത്രേ ദുന്ദുഭിസംനാദേ പ്രത്യമുഞ്ചത് തലേ ശുഭേ
24 കൃഷ്ണാൻ ഭംഗീമതഃ കേശാഞ് ശ്വേതേനോദ്ഗ്രഥ്യ വാസസാ
    അധിജ്യം തരസാ കൃത്വാ ഗാണ്ഡീവം വ്യാക്ഷിപദ് ധനുഃ
25 തസ്യ വിക്ഷിപ്യമാണസ്യ ധനുഷോ ഽഭൂൻ മഹാസ്വനഃ
    യഥാ ശൈലസ്യ മഹതഃ ശൈലേനൈവാഭിജഘ്നുർ അഃ
26 സ നിർഘതാഭവദ് ഭൂമിർ ദിക്ഷു വായുർ വവൗ ഭൃശം
    ഭ്രാന്തദ്വിജം ഖം തദാസീത് പ്രകമ്പിതമഹാദ്രുമം
27 തം ശബ്ദം കുരവോ ഽജാനൻ വിസ്ഫോഡം അശനേർ ഇവ
    യദ് അർജുനോ ധനുഃശ്രേഷ്ഠം ബാഹുഭ്യാം ആക്ഷിപദ് രഥേ