മഹാഭാരതം മൂലം/വനപർവം/അധ്യായം83

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/വനപർവം
രചന:വ്യാസൻ
അധ്യായം83


1 [പുലസ്ത്യ]
     അഥ സന്ധ്യാം സമാസാദ്യ സംവേദ്യം തീർഥം ഉത്തമം
     ഉപസ്പൃശ്യ നരോ വിദ്വാൻ ഭവേൻ നാസ്ത്യ് അത്ര സംശയഃ
 2 രാമസ്യ ച പ്രസാദേന തീർഥം രാജൻ കൃതം പുരാ
     തൽ ലോഹിത്യം സമാസാദ്യ വിന്ദ്യാദ് ബഹുസുവർണകം
 3 കരതോയാം സമാസാദ്യ ത്രിരാത്രോപോഷിതോ നരഃ
     അശ്വമേധം അവാപ്നോതി കൃതേ പൈതാമഹേ വിധൗ
 4 ഗംഗായാസ് ത്വ് അഥ രാജേന്ദ്ര സാഗരസ്യ ച സംഗമേ
     അശ്വമേധം ദശഗുണം പ്രവദന്തി മനീഷിണഃ
 5 ഗംഗായാസ് ത്വ് അപരം ദ്വീപം പ്രാപ്യ യഃ സ്നാതി ഭാരത
     ത്രിരാത്രോപോഷിതോ രാജൻ സർവകാമാൻ അവാപ്നുയാത്
 6 തതോ വൈതരണീം ഗത്വാ നദീം പാപപ്രമോചനീം
     വിരജം തീർഥം ആസാദ്യ വിരാജതി യഥാ ശശീ
 7 പ്രഭവേച് ച കുലേ പുണ്യേ സർവപാപം വ്യപോഹതി
     ഗോസഹസ്രഫലം ലബ്ധ്വാ പുനാതി ച കുലം നരഃ
 8 ശോണസ്യ ജ്യോതിരഥ്യാശ് ച സംഗമേ നിവസഞ് ശുചിഃ
     തർപയിത്വാ പിതൄൻ ദേവാൻ അഗ്നിഷ്ടോമ ഫലം ലഭേത്
 9 ശോണസ്യ നർമദായാശ് ച പ്രഭവേ കുരുനന്ദന
     വംശഗുൽമ ഉപസ്പൃശ്യ വാജിമേധഫലം ലഭേത്
 10 ഋഷഭം തീർഥം ആസാദ്യ കോശലായാം നരാധിപ
    വാജപേയം അവാപ്നോതി ത്രിരാത്രോപോഷിതോ നരഃ
11 കോശലായാം സമാസാദ്യ കാലതീർഥ ഉപസ്പൃശേത്
    വൃശഭൈകാദശ ഫലം ലഭതേ നാത്ര സംശയഃ
12 പുഷ്പവത്യാം ഉപസ്പൃശ്യ ത്രിരാത്രോപോഷിതോ നരഃ
    ഗോസഹസ്രഫലം വിന്ദ്യാത് കുലം ചൈവ സമുദ്ധരേത്
13 തതോ ബദരികാ തീർഥേ സ്നാത്വാ പ്രയത മാനസഃ
    ദീർഘം ആയുർ അവാപ്നോതി സ്വർഗലോകം ച ഗച്ഛതി
14 തതോ മഹേന്ദ്രം ആസാദ്യ ജാമദഗ്ന്യ നിഷേവിതം
    രാമ തീർഥേ നരഃ സ്നാത്വാ വാജിമേധഫലം ലഭേത്
15 മതംഗസ്യ തു കേദാരസ് തത്രൈവ കുരുനന്ദന
    തത്ര സ്നാത്വാ നരോ രാജൻ ഗോസഹസ്രഫലം ലഭേത്
16 ശ്രീപർവതം സമാസാദ്യ നദീതീര ഉപസ്പൃശേത്
    അശ്വമേധം അവാപ്നോതി സ്വർഗലോകം ച ഗച്ഛതി
17 ശ്രീപർവതേ മഹാദേവോ ദേവ്യാ സഹ മഹാദ്യുതിഃ
    ന്യവസത് പരമപ്രീതോ ബ്രഹ്മാ ച ത്രിദശൈർ വൃതഃ
18 തത്ര ദേവ ഹ്രദേ സ്നാത്വാ ശുചിഃ പ്രയത മാനസഃ
    അശ്വമേധം അവാപ്നോതി പരാം സിദ്ധിം ച ഗച്ഛതി
19 ഋഷഭം പർവതം ഗത്വാ പാണ്ഡ്യേഷു സുരപൂജിതം
    വാജപേയം അവാപ്നോതി നാകപൃഷ്ഠേ ച മോദതേ
20 തതോ ഗച്ഛേത കാവേരീം വൃതാം അപ്സരസാം ഗണൈഃ
    തത്ര സ്നാത്വാ നരോ രാജൻ ഗോസഹസ്രഫലം ലഭേത്
21 തതസ് തീരേ സമുദ്രസ്യ കന്യാ തീർഥ ഉപസ്പൃശേത്
    തത്രോപസ്പൃശ്യ രാജേന്ദ്ര സർവപാപൈഃ പ്രമുച്യതേ
22 അഥ ഗോകർണം ആസാദ്യ ത്രിഷു ലോകേഷു വിശ്രുതം
    സമുദ്രമധ്യേ രാജേന്ദ്ര സർവലോകനമസ്കൃതം
23 യത്ര ബ്രഹ്മാദയോ ദേവാ ഋഷയശ് ച തപോധനാഃ
    ഭൂതയക്ഷപിശാചാശ് ച കിംനരാഃ സ മഹോരഗാഃ
24 സിദ്ധചാരണഗന്ധർവാ മാനുഷാഃ പന്നഗാസ് തഥാ
    സരിതഃ സാഗരാഃ ശൈലാ ഉപാസന്ത ഉമാ പതിം
25 തത്രേശാനം സമഭ്യർച്യ ത്രിരാത്രോപോഷിതോ നരഃ
    ദശാശ്വമേധം ആപ്നോതി ഗാണപത്യം ച വിന്ദതി
    ഉഷ്യ ദ്വാദശ രാത്രം തു കൃതാത്മാ ഭവതേ നരഃ
26 തത ഏവ തു ഗായത്ര്യാഃ സ്ഥാനം ത്രൈലോക്യവിശ്രുതം
    ത്രിരാത്രം ഉഷിതസ് തത്ര ഗോസഹസ്രഫലം ലഭേത്
27 നിദർശനം ച പ്രത്യക്ഷം ബ്രാഹ്മണാനാം നരാധിപ
    ഗായത്രീം പഠതേ യസ് തു യോനിസങ്കരജസ് തഥാ
    ഗാഥാ വാ ഗീതികാ വാപി തസ്യ സമ്പദ്യതേ നൃപ
28 സംവർതസ്യ തു വിപ്രർഷേർ വാപീം ആസാദ്യ ദുർലഭാം
    രൂപസ്യ ഭാഗീ ഭവതി സുഭഗശ് ചൈവ ജായതേ
29 തതോ വേണ്ണാം സമാസാദ്യ തർപയേത് പിതൃദേവതാഃ
    മയൂരഹംസസംയുക്തം വിമാനം ലഭതേ നരഃ
30 തതോ ഗോദാവരീം പ്രാപ്യ നിത്യം സിദ്ധനിഷേവിതാം
    ഗവാം അയം അവാപ്നോതി വാസുകേർ ലോകം ആപ്നുയാത്
31 വേണ്ണായാഃ സംഗമേ സ്നാത്വാ വാജപേയഫലം ലഭേത്
    വരദാ സംഗമേ സ്നാത്വാ ഗോസഹസ്രഫലം ലഭേത്
32 ബ്രഹ്മ സ്ഥാനം സമാസാദ്യ ത്രിരാത്രം ഉഷിതോ നരഃ
    ഗോസഹസ്രഫലം വിന്ദേത് സ്വർഗലോകം ച ഗച്ഛതി
33 കുശപ്ലവനം ആസാദ്യ ബ്രഹ്മ ചാരീ സമാഹിതഃ
    ത്രിരാത്രം ഉഷിതഃ സ്നാത്വാ അശ്വമേധ ഫലം ലഭേത്
34 തതോ ദേവ ഹ്രദേ രമ്യേ കൃഷ്ണ വേണ്ണാ ജലോദ്ഭവേ
    ജാതിമാത്രഹ്രദേ ചൈവ തഥാ കന്യാശ്രമേ നൃപ
35 യത്ര ക്രതുശതൈർ ഇഷ്ട്വാ ദേവരാജോ ദിവം ഗതഃ
    അഗ്നിഷ്ടോമ ശതം വിന്ദേദ് ഗമനാദ് ഏവ ഭാരത
36 സർവദേവ ഹ്രദേ സ്നാത്വാ ഗോസഹസ്രഫലം ലഭേത്
    ജാതിമാത്രഹ്രദേ സ്നാത്വാ ഭവേജ് ജാതിസ്മരോ നരഃ
37 തതോ ഽവാപ്യ മഹാപുണ്യാം പയോഷ്ണീം സരിതാം വരാം
    പിതൃദേവാർചന രതോ ഗോസഹസ്രഫലം ലഭേത്
38 ദണ്ഡകാരണ്യം ആസാദ്യ മഹാരാജ ഉപസ്പൃശേത്
    ഗോസഹസ്രഫലം തത്ര സ്നാതമാത്രസ്യ ഭാരത
39 ശരഭംഗാശ്രമം ഗത്വാ ശുകസ്യ ച മഹാത്മനാഃ
    ന ദുർഗതിം അവാപ്നോതി പുനാതി ച കുലം നരഃ
40 തതഃ ശൂർപാരകം ഗച്ഛേജ് ജാമദഗ്ന്യ നിഷേവിതം
    രാമ തീർഥേ നരഃ സ്നാത്വാ വിന്ദ്യാദ് ബഹുസുവർണകം
41 സപ്ത ഗോദാവരേ സ്നാത്വാ നിയതോ നിയതാശനഃ
    മഹത് പുണ്യം അവാപ്നോതി ദേവലോകം ച ഗച്ഛതി
42 തതോ ദേവപഥം ഗച്ഛേൻ നിയതോ നിയതാശനഃ
    ദേവ സത്രസ്യ യത് പുണ്യം തദ് അവാപ്നോതി മാനവഃ
43 തുംഗകാരണ്യം ആസാദ്യ ബ്രഹ്മ ചാരീ ജിതേന്ദ്രിയഃ
    വേദാൻ അധ്യാപയത് തത്ര ഋഷിഃ സാരസ്വതഃ പുരാ
44 തത്ര വേദാൻ പ്രനഷ്ടാംസ് തു മുനേർ അംഗിരസഃ സുതഃ
    ഉപവിഷ്ടോ മഹർഷീണാം ഉത്തരീയേഷു ഭാരത
45 ഓങ്കാരേണ യഥാന്യായം സമ്യഗ് ഉച്ചാരിതേന ച
    യേന യത് പൂർവം അഭ്യസ്തം തത് തസ്യ സമുപസ്ഥിതം
46 ഋഷയസ് തത്ര ദേവാശ് ച വരുണോ ഽഗ്നിഃ പ്രജാപതിഃ
    ഹരിർ നാരായണോ ദേവോ മഹാദേവസ് തഥൈവ ച
47 പിതാ മഹശ് ച ഭഗവാൻ ദേവൈഃ സഹ മഹാദ്യുതിഃ
    ഭൃഗും നിയോജയാം ആസ യാജനാർഥേ മഹാദ്യുതിം
48 തതഃ സചക്രേ ഭഗവാൻ ഋഷീണാം വിധിവത് തദാ
    സർവേഷാം പുനർ ആധാനം വിധിദൃഷ്ടേന കർമണാ
49 ആജ്യഭാഗേന വൈ തത്ര തർപിതാസ് തു യഥാവിധി
    ദേവാസ് ത്രിഭുവണം യാതാ ഋഷയശ് ച യഥാസുഖം
50 തദ് അരണ്യം പ്രവിഷ്ടസ്യ തുംഗകം രാജസത്തമ
    പാപം പ്രണശ്യതേ സർവം സ്ത്രിയോ വാ പുരുഷസ്യ വാ
51 തത്ര മാസം വസേദ് ധീരോ നിയതോ നിയതാശനഃ
    ബ്രഹ്മലോകം വ്രജേദ് രാജൻ പുനീതേ ച കുലം നരഃ
52 മേധാവികം സമാസാദ്യ പിതൄൻ ദേവാംശ് ച തർപയേത്
    അഗ്നിഷ്ടോമം അവാപ്നോതി സ്മൃതിം മേധാം ച വിന്ദതി
53 തതഃ കാലഞ്ജരം ഗത്വാ പർവതം ലോകവിശ്രുതം
    തത്ര ദേവ ഹ്രദേ സ്നാത്വാ ഗോസഹസ്രഫലം ലഭേത്
54 ആത്മാനം സാധയേത് തത്ര ഗിരൗ കാലഞ്ജരേ നൃപ
    സ്വർഗലോകേ മഹീയേത നരോ നാസ്ത്യ് അത്ര സംശയഃ
55 തതോ ഗിരിവരശ്രേഷ്ഠേ ചിത്രകൂടേ വിശാം പതേ
    മന്ദാകിനീം സമാസാദ്യ നദീം പാപപ്രമോചിനീം
56 തത്രാഭിഷേകം കുർവാണഃ പിതൃദേവാർചനേ രതഃ
    അശ്വമേധം അവാപ്നോതി ഗതിം ച പരമാം വ്രജേത്
57 തതോ ഗച്ഛേത രാജേന്ദ്ര ഭർതൃസ്ഥാനം അനുത്തമം
    യത്ര ദേവോ മഹാസേനോ നിത്യം സംനിഹിതോ നൃപഃ
58 പുമാംസ് തത്ര നരശ്രേഷ്ഠ ഗമനാദ് ഏവ സിധ്യതി
    കോടിതീർഥേ നരഃ സ്നാത്വാ ഗോസഹസ്രഫലം ലഭേത്
59 പ്രദക്ഷിണം ഉപാവൃത്യ ജ്യേഷ്ഠസ്ഥാനം വ്രജേൻ നരഃ
    അഭിഗമ്യ മഹാദേവം വിരാജതി യഥാ ശശീ
60 തത്ര കൂപോ മഹാരാജ വിശ്രുതോ ഭരതർഷഭ
    സമുദ്രാസ് തത്ര ചത്വാരോ നിവസന്തി യുധിഷ്ഠിര
61 തത്രോപസ്പൃശ്യ രാജേന്ദ്ര കൃത്വാ ചാപി പ്രദക്ഷിണം
    നിയതാത്മാ നരഃ പൂതോ ഗച്ഛേത പരമാം ഗതിം
62 തതോ ഗച്ഛേത് കുരുശ്രേഷ്ഠ ശൃംഗവേര പുരം മഹത്
    യത്ര തീർണോ മഹാരാജ രാമോ ദാശരഥിഃ പുരാ
63 ഗംഗായാം തു നരഃ സ്നാത്വാ ബ്രഹ്മ ചാരീ സമാഹിതഃ
    വിധൂതപാപ്മാ ഭവതി വാജപേയം ച വിന്ദതി
64 അഭിഗമ്യ മഹാദേവം അഭ്യർച്യ ച നരാധിപ
    പ്രദക്ഷിണം ഉപാവൃത്യ ഗാണപത്യം അവാപ്നുയാത്
65 തതോ ഗച്ഛേത രാജേന്ദ്ര പ്രയാഗം ഋഷിസംസ്തുതം
    യത്ര ബ്രഹ്മാദയോ ദേവാ ദിശശ് ച സ ദിഗ് ഈശ്വരാഃ
66 ലോകപാലാശ് ച സാധ്യാശ് ച നൈരൃതാഃ പിതരസ് തഥാ
    സനത് കുമാര പ്രമുഖാസ് തഥൈവ പരമർഷയഃ
67 അംഗിരഃ പ്രമുഖാശ് ചൈവ തഥാ ബ്രഹ്മർഷയോ ഽപരേ
    തഥാ നാഗാഃ സുപർണാശ് ച സിദ്ധാശ് ചക്രചരാസ് തഥാ
68 സരിതഃ സാഗരാശ് ചൈവ ഗന്ധർവാപ്സരസസ് തഥാ
    ഹരിശ് ച ഭഗവാൻ ആസ്തേ പ്രജാപതിപുരസ്കൃതഃ
69 തത്ര ത്രീണ്യ് അഗ്നികുണ്ഡാനി യേഷാം മധ്യേ ച ജാഹ്നവീ
    പ്രയാഗാദ് അഭിനിഷ്ക്രാന്താ സർവതീർഥപുരസ്കൃതാ
70 തപനസ്യ സുതാ തത്ര ത്രിഷു ലോകേഷു വിശ്രുതാ
    യമുനാ ഗംഗയാ സാർധം സംഗതാ ലോകപാവനീ
71 ഗംഗായമുനയോർ മദ്യം പൃഥിവ്യാ ജഘനം സ്മൃതം
    പ്രയാഗം ജഘനസ്യാന്തം ഉപസ്ഥം ഋഷയോ വിദുഃ
72 പ്രയാഗം സ പ്രതിഷ്ഠാനം കംബലാശ്വതരൗ തഥാ
    തീർഥം ഭോഗവതീ ചൈവ വേദീ പ്രോക്താ പ്രജാപതേഃ
73 തത്ര വേദാശ് ച യജ്ഞാശ് ച മൂർതിമന്തോ യുധിഷ്ഠിര
    പ്രജാപതിം ഉപാസന്തേ ഋഷയശ് ച മഹാവ്രതാഃ
    യജന്തേ ക്രതുഭിർ ദേവാസ് തഥാ ചക്രചരാ നൃപ
74 തതഃ പുണ്യതമം നാസ്തി ത്രിഷു ലോകേഷു ഭാരത
    പ്രയാഗഃ സർവതീർഥേഭ്യഃ പ്രഭവത്യ് അധികം വിഭോ
75 ശ്രവണാത് തസ്യ തീർഥസ്യ നാമ സങ്കീർതനാദ് അപി
    മൃത്തികാ ലംഭനാദ് വാപി നരഃ പാപാത് പ്രമുച്യതേ
76 തത്രാഭിഷേകം യഃ കുര്യാത് സംഗമേ സംശിതവ്രതഃ
    പുണ്യം സഫലം ആപ്നോതി രാജസൂയാശ്വമേധയോഃ
77 ഏഷാ യജന ഭൂമിർ ഹി ദേവാനാം അപി സത്കൃതാ
    തത്ര ദത്തം സൂക്ഷ്മം അപി മഹദ് ഭവതി ഭാരത
78 ന വേദ വചനാത് താത ന ലോകവചനാദ് അപി
    മതിർ ഉത്ക്രമണീയാ തേ പ്രയാഗമരണം പ്രതി
79 ദശ തീർഥസഹസ്രാണി ഷഷ്ടികോട്ത്യസ് തഥാപരാഃ
    യേഷാം സാംനിധ്യം അത്രൈവ കീർതിതം കുരുനന്ദന
80 ചാതുർവേദേ ച യത് പുണ്യം സത്യവാദിഷു ചൈവ യത്
    സ്നാത ഏവ തദാപ്നോതി ഗംഗാ യമുന സംഗമേ
81 തത്ര ഭോഗവതീ നാമ വാസുകേസ് തീർഥം ഉത്തമം
    തത്രാഭിഷേകം യഃ കുര്യാത് സോ ഽശ്വമേധം അവാപ്നുയാത്
82 തത്ര ഹംസപ്രപതനം തീർഥം ത്രൈലോക്യവിശ്രുതം
    ദശാശ്വമേധികം ചൈവ ഗംഗായാം കുരുനന്ദന
83 യത്ര ഗംഗാ മഹാരാജ സ ദേശസ് തത് തപോവനം
    സിദ്ധക്ഷേത്രം തു തജ് ജ്ഞേയം ഗംഗാതീരസമാശ്രിതം
84 ഇദം സത്യം ദ്വിജാതീനാം സാധൂനാം ആത്മജസ്യ ച
    സുഹൃദാം ച ജപേത് കർണേ ശിഷ്യസ്യാനുഗതസ്യ ച
85 ഇദം ധർമ്യം ഇദം പുണ്യം ഇദം മേധ്യം ഇദം സുഖം
    ഇദം സ്വർഗ്യം ഇദം രമ്യം ഇദം പാവനം ഉത്തമം
86 മഹർഷീണാം ഇദം ഗുഹ്യം സർപപാപപ്രമോചനം
    അധീത്യ ദ്വിജമധ്യേ ച നിർമലത്വം അവാപ്നുയാത്
87 യശ് ചേദം ശൃണുയാൻ നിത്യം തീർഥപുണ്യം സദാ ശുചിഃ
    ജാതീഃ സ സ്മരതേ ബഹ്വീർ നാകപൃഷ്ഠേ ച മോദതേ
88 ഗമ്യാന്യ് അപി ച തീർഥാനി കീർതിതാന്യ് അഗമാനി ച
    മനസാ താനി ഗച്ഛേത സർവതീർഥസമീക്ഷയാ
89 ഏതാനി വസുഭിഃ സാധ്യൈർ ആദിത്യൈർ മരുദ് അശ്വിഭിഃ
    ഋഷിഭിർ ദേവകൽപൈശ് ച ശ്രിതാനി സുകൃതൈഷിഭിഃ
90 ഏവം ത്വം അപി കൗരവ്യ വിധിനാനേന സുവ്രത
    വ്രജ തീർഥാനി നിയതഃ പുണ്യം പുണ്യേന വർധതേ
91 ഭാവിതൈഃ കാരണൈഃ പൂർവം ആസ്തിക്യാച് ഛ്രുതി ദർശനാത്
    പ്രാപ്യന്തേ താനി തീർഥാനി സദ്ഭിഃ ശിഷ്ടാനുദർശിഭിഃ
92 നാവ്രതോ നാകൃതാത്മാ ച നാശുചിർ ന ച തസ്കരഃ
    സ്നാതി തീർഥേഷു കൗരവ്യ ന ച വക്രമതിർ നരഃ
93 ത്വയാ തു സമ്യഗ്വൃത്തേന നിത്യം ധർമാർഥദർശിനാ
    പിതരസ് താരിതാസ് താത സർവേ ച പ്രപിതാ മഹാഃ
94 പിതാ മഹ പുരോഗാശ് ച ദേവാഃ സർഷിഗണാ നൃപ
    തവ ധർമേണ ധർമജ്ഞ നിത്യം ഏവാഭിതോഷിതാഃ
95 അവാപ്സ്യസി ച ലോകാൻ വൈ വസൂനാം വാസവോപമ
    കീർതിം ച മഹതീം ഭീഷ്മ പ്രാപ്സ്യസേ ഭുവി ശാശ്വതീം
96 [നാരദ]
    ഏവം ഉക്ത്വാഭ്യനുജ്ഞാപ്യ പുലസ്ത്യോ ഭഗവാൻ ഋഷിഃ
    പ്രീതഃ പ്രീതേന മനസാ തത്രൈവാന്തരധീയതേ
97 ഭീഷ്മശ് ച കുരുശാർദൂല ശാസ്ത്രതത്ത്വാർഥ ദർശിവാൻ
    പുലസ്ത്യവചനാച് ചൈവ പൃഥിവീം അനുചക്രമേ
98 അനേന വിധിനാ യസ് തു പൃഥിവീം സഞ്ചരിഷ്യതി
    അശ്വമേധ ശതസ്യാഗ്ര്യം ഫലം പ്രേത്യ സ ഭോക്ഷ്യതേ
99 അതശ് ചാഷ്ട ഗുണം പാർഥ പ്രാപ്സ്യസേ ധർമം ഉത്തമം
    നേതാ ച ത്വം ഋഷീൻ യസ്മാത് തേന തേ ഽഷ്ട ഗുണം ഫലം
100 രക്ഷോഗണാവകീർണാനി തീർഥാന്യ് ഏതാനി ഭാരത
   ന ഗതിർ വിദ്യതേ ഽന്യസ്യ ത്വാം ഋതേ കുരുനന്ദന
101 ഇദം ദേവർഷിചരിതം സർവതീർഥാർഥ സംശ്രിതം
   യഃ പഠേത് കല്യം ഉത്ഥായ സർവപാപൈഃ പ്രമുച്യതേ
102 ഋഷിമുഖ്യാഃ സദാ യത്ര വാൽമീകിസ് ത്വ് അഥ കാശ്യപഃ
   ആത്രേയസ് ത്വ് അഥ കൗണ്ഡിന്യോ വിശ്വാ മിത്രോ ഽഥ ഗൗതമഃ
103 അസിതോ ദേവലശ് ചൈവ മാർകണ്ഡേയോ ഽഥ ഗാലവഃ
   ഭരദ് വാജോ വസിഷ്ഠശ് ച മുനിർ ഉദ്ദാലകസ് തഥാ
104 ശൗനകഃ സഹ പുത്രേണ വ്യാസശ് ച ജപതാം വരഃ
   ദുർവാസാശ് ച മുനിശ്രേഷ്ഠോ ഗാലവശ് ച മഹാതപഃ
105 ഏതേ ഋഷിവരാഃ സർവേ ത്വത്പ്രതീക്ഷാസ് തപോധനാഃ
   ഏഭിഃ സഹ മഹാരാജ തീർഥാന്യ് ഏതാന്യ് അനുവ്രജ
106 ഏഷ വൈ ലോമശോ നാമ ദേവർഷിർ അമിതദ്യുതിഃ
   സമേഷ്യതി ത്വയാ ചൈവ തേന സാർധം അനുവ്രജ
107 മയാ ച സഹധർമജ്ഞ തീർഥാന്യ് ഏതാന്യ് അനുവ്രജ
   പ്രാപ്സ്യസേ മഹതീം കീർതിം യഥാ രാജാ മഹാഭിഷഃ
108 യഥാ യയാതിർ ധർമാത്മാ യഥാ രാജാ പുരൂരവഃ
   തഥാ ത്വം കുരുശാർദൂല സ്വേന ധർമേണ ശോഭസേ
109 യഥാ ഭഗീരഥോ രാജാ യഥാ രാമശ് ച വിശ്രുതഃ
   തഥാ ത്വം സർവരാജഭ്യോ ഭ്രാജസേ രശ്മിവാൻ ഇവ
110 യഥാ മനുർ യഥേക്ഷ്വാകുർ യഥാ പൂരുർ മഹായശാഃ
   യഥാ വൈന്യോ മഹാതേജാസ് തഥാ ത്വം അപി വിശ്രുതഃ
111 യഥാ ച വൃത്രഹാ സർവാൻ സപത്നാൻ നിർദഹത് പുരാ
   തഥാ ശത്രുക്ഷയം കൃത്വാ പ്രജാസ് ത്വം പാലയിഷ്യസി
112 സ്വധർമവിജിതാം ഉർവീം പ്രാപ്യ രാജീവലോചന
   ഖ്യാതിം യാസ്യസി ധർമേണ കാർതവീര്യാർജുനോ യഥാ
113 [വ്]
   ഏവം ആശ്വാസ്യ രാജാനം നാരദോ ഭഗവാൻ ഋഷിഃ
   അനുജ്ഞാപ്യ മഹാത്മാനം തത്രൈവാന്തരധീയത
114 യുധിഷ്ഠിരോ ഽപി ധർമാത്മാ തം ഏവാർഥം വിചിന്തയൻ
   തീർഥയാത്രാശ്രയം പുണ്യം ഋഷീണാം പ്രത്യവേദയത്