മഹാഭാരതം മൂലം/വനപർവം/അധ്യായം272

മഹാഭാരതം മൂലം/വനപർവം
രചന:വ്യാസൻ
അധ്യായം272

1 [മാർക്]
     തതഃ ശ്രുത്വാ ഹതം സംഖ്യേ കുംഭകർണം സഹാനുഗം
     പ്രഹസ്തം ച മഹേഷ്വാസം ധൂമ്രാക്ഷം ചാതിതേജസം
2 പുത്രം ഇന്ദ്രജിതം ശൂരം രാവണഃ പ്രത്യഭാഷത
     ജഹി രാമം അമിത്രഘ്ന സുഗ്രീവം ച സലക്ഷ്മണം
3 ത്വയാ ഹി മമ സത് പുത്ര യശോ ദീപ്തം ഉപാർജിതം
     ജിത്വാ വജ്രധരം സംഖ്യേ സഹസ്രാക്ഷം ശചീപതിം
4 അന്തർഹിതഃ പ്രകാശോ വാ ദിവ്യൈർ ദത്തവരൈഃ ശരൈഃ
     ജഹി ശത്രൂൻ അമിത്രഘ്ന മമ ശസ്ത്രഭൃതാം വര
5 രാമലക്ഷ്മണ സുഗ്രീവാഃ ശരസ്പർശം ന തേ ഽനഘ
     സമർഥാഃ പ്രതിസംസോഢും കുതസ് തദ് അനുയായിനഃ
6 അകൃതാ യാ പ്രഹസ്തേന കുംഭകർണേന ചാനഘ
     ഖരസ്യാപചിതിഃ സംഖ്യേ താം ഗച്ഛസ്വ മഹാഭുജ
7 ത്വം അദ്യ നിശിതൈർ ബാണൈർ ഹത്വാ ശത്രൂൻ സസൈനികാൻ
     പ്രതിനന്ദയ മാം പുത്രപുരാ ബദ്ധ്വൈവ വാസവം
8 ഇത്യ് ഉക്തഃ സ തഥേത്യ് ഉക്ത്വാ രഥം ആസ്ഥായ ദംശിതഃ
     പ്രയയാവ് ഇന്ദ്രജിദ് രാജംസ് തൂർണം ആയോധനം പ്രതി
9 തത്ര വിശ്രാവ്യ വിസ്പഷ്ടം നാമ രാക്ഷസപുംഗവഃ
     ആഹ്വയാം ആസ സമരേ ലക്ഷ്മണം ശുഭലക്ഷണം
10 തം ലക്ഷ്മണോ ഽപ്യ് അഭ്യധാവത് പ്രഗൃഹ്യ സശരം ധനുഃ
    ത്രാസയംസ് തലഘോഷേണ സിംഹഃ ക്ഷുദ്രമൃഗം യഥാ
11 തയോഃ സമഭവദ് യുദ്ധം സുമഹജ് ജയ ഗൃദ്ധിനോഃ
    ദിവ്യാസ്ത്രവിദുഷോസ് തീവ്രം അന്യോന്യസ്പർധിനോസ് തദാ
12 രാവണിസ് തു യദാ നൈനം വിശേഷയതി സായകൈഃ
    തതോ ഗുരുതരം യത്നം ആതിഷ്ഠദ് ബലിനാം വരഃ
13 തത ഏനം മഹാവേഗൈർ അർദയാം ആസ തോമരൈഃ
    താൻ ആഗതാൻ സ ചിച്ഛേദ സൗമിത്രിർ നിശിതൈഃ ശരൈഃ
    തേ നികൃത്താഃ ശരൈസ് തീക്ഷ്ണൈർ ന്യപതൻ വസുധാതലേ
14 തം അംഗദോ വാലിസുതഃ ശ്രീമാൻ ഉദ്യമ്യ പാദപം
    അഭിദ്രുത്യ മഹാവേഗസ് താഡയാം ആസ മൂർധനി
15 തസ്യേന്ദ്രജിദ് അസംഭ്രാന്തഃ പ്രാസേനോരസി വീര്യവാൻ
    പ്രഹർതും ഐച്ഛത് തം ചാസ്യ പ്രാസം ചിച്ഛേദ ലക്ഷ്മണഃ
16 തം അഭ്യാശഗതം വീരം അംഗദം രാവണാത്മജഃ
    ഗദയാതാഡയത് സവ്യേ പാർശ്വേ വാനരപുംഗവം
17 തം അചിന്ത്യപ്രഹാരം സബലവാൻ വാലിനഃ സുതഃ
    സസർജേന്ദ്രജിതഃ ക്രോധാച് ഛാല സ്കന്ധം അമിത്രജിത്
18 സോ ഽംഗദേന രുഷോത്സൃഷ്ടോ വധായേന്ദ്രജിതസ് തരുഃ
    ജഘാനേന്ദ്രജിതഃ പാർഥരഥം സാശ്വം സസാരഥിം
19 തതോ ഹതാശ്വാത് പ്രസ്കന്ദ്യ രഥാത് സ ഹതസാരഥിഃ
    തത്രൈവാന്തർദധേ രാജൻ മായയാ രാവണാത്മജഃ
20 അന്തർഹിതം വിദിത്വാ തം ബഹു മായം ച രാക്ഷസം
    രാമസ് തം ദേശം ആഗമ്യ തത് സൈന്യം പര്യരക്ഷത
21 സ രാമം ഉദ്ദിശ്യ ശരൈസ് തതോ ദത്തവരൈസ് തദാ
    വിവ്യാധ സർവഗാത്രേഷു ലക്ഷ്മണം ച മഹാരഥം
22 തം അദൃശ്യം ശരൈഃ ശൂരൗ മായയാന്തർഹിതം തദാ
    യോധയാം ആസതുർ ഉഭൗ രാവണിം രാമലക്ഷ്മണൗ
23 സ രുഷാ സർവഗാത്രേഷു തയോഃ പുരുഷസിംഹയോഃ
    വ്യസൃജത് സായകാൻ ഭൂയോ ശതശോ ഽഥ സഹസ്രശഃ
24 തം അദൃശ്യം വിചിന്വന്തഃ സൃജന്തം അനിശം ശരാൻ
    ഹരയോ വിവിശുർ വ്യോമ പ്രഹൃഹ്യ മഹതീഃ ശിലാഃ
25 താംശ് ച തൗ ചാപ്യ് അദൃശ്യഃ സ ശരൈർ വിവ്യാധ രാക്ഷസഃ
    സ ഭൃശം താഡയൻ വീരോ രാവണിർ മായയാ വൃതഃ
26 തൗ ശരൈർ ആചിതൗ വീരൗ ഭ്രാതരൗ രാമലക്ഷ്മണൗ
    പേതതുർ ഗഗനാദ് ഭൂമിം സൂര്യാ ചന്ദ്രമസാവ് ഇവ