മഹാഭാരതം മൂലം/വനപർവം/അധ്യായം271

മഹാഭാരതം മൂലം/വനപർവം
രചന:വ്യാസൻ
അധ്യായം271

1 [മാർക്]
     തതോ വിനിര്യായ പുരാത് കുംഭകർണഃ സഹാനുഗഃ
     അപശ്യത് കപിസൈന്യം തജ് ജിതകാശ്യ് അഗ്രതഃ സ്ഥിതം
2 തം അഭ്യേത്യാശു ഹരയഃ പരിവാര്യ സമന്തതഃ
     അഭ്യഘ്നംശ് ച മഹാകായൈർ ബഹുഭിർ ജഗതീ രുഹൈഃ
     കരജൈർ അതുദംശ് ചാന്യേ വിഹായ ഭയം ഉത്തമം
3 ബഹുധാ യുധ്യമാനാസ് തേ യുദ്ധമാർഗൈഃ പ്ലവംഗമാഃ
     നാനാപ്രഹരണൈർ ഭീമം രാക്ഷസേന്ദ്രം അതാഡയൻ
4 സ താഡ്യമാനഃ പ്രഹസൻ ഭക്ഷയാം ആസ വാനരാൻ
     പനസം ച ഗവാക്ഷം ച വജ്രബാഹും ച വാനരം
5 തദ് ദൃഷ്ട്വാ വ്യഥനം കർമ കുംഭകർണസ്യ രക്ഷസഃ
     ഉദക്രോശൻ പരിത്രസ്താസ് താരപ്രഭൃതയസ് തദാ
6 തം താരം ഉച്ചൈഃ ക്രോശന്തം അന്യാംശ് ച ഹരിയൂഥപാൻ
     അഭിദുദ്രാവ സുഗ്രീവഃ കുംഭകർണം അപേതഭീഃ
7 തതോ ഽഭിപത്യ വേഗേന കുംഭകർണം മഹാമനാഃ
     ശാലേന ജഘ്നിവാൻ മൂർധ്നി ബലേന കപികുഞ്ജരഃ
8 സ മഹാത്മാ മഹാവേഗഃ കുംഭകർണസ്യ മൂർധനി
     ബിഭേദ ശാലം സുഗ്രീവോ ന ചൈവാവ്യഥയത് കപിഃ
9 തതോ വിനദ്യ പ്രഹസഞ് ശാലസ്പർശ വിബോധിഥ
     ദോർഭ്യാം ആദായ സുഗ്രീവം കുംഭകർണോ ഽഹരദ് ബലാത്
10 ഹ്രിയമാണം തു സുഗ്രീവം കുംഭകർണേന രക്ഷസാ
    അവേക്ഷ്യാഭ്യദ്രവദ് വീരഃ സൗമിത്രിർ മിത്രനന്ദനഃ
11 സോ ഽഭിപത്യ മഹാവേഗം രുക്മപുംഖം മഹാശരം
    പ്രാഹിണോത് കുംഭകർണായ ലക്ഷ്മണഃ പരവീരഹാ
12 സ തസ്യ ദേവാവരണം ഭിത്ത്വാ ദേഹം ച സായകഃ
    ജഗാമ ദാരയൻ ഭൂമിം രുധിരേണ സമുക്ഷിതഃ
13 തഥാ സ ഭിന്നഹൃദയഃ സമുത്സൃജ്യ കപീശ്വരം
    കുംഭകർണോ മഹേഷ്വാസഃ പ്രഗൃഹീതശിലായുധഃ
    അഭിദുദ്രാവ സൗമിത്രിം ഉദ്യമ്യ മഹതീം ശലാം
14 തസ്യാഭിദ്രവതസ് തൂർണം ക്ഷുരാഭ്യാം ഉച്ഛ്രിതൗ കരൗ
    ചിച്ഛേദ നിശിതാഗ്രാഭ്യാം സ ബഭൂവ ചതുർഭുജഃ
15 താൻ അപ്യ് അസ്യ ഭുജാൻ സർവാൻ പ്രഗൃഹീതശിലായുധാൻ
    ക്ഷുരൈശ് ചിച്ഛേദ ലഘ്വ് അസ്ത്രം സൗമിത്രിഃ പ്രതിദർശയൻ
16 സ ബഭൂവാതികായാശ് ച ബഹു പാദശിരോ ഭുജഃ
    തം ബ്രഹ്മാസ്ത്രേണ സൗമിത്രിർ ദദാഹാദ്രിചയോപമം
17 സ പപാത മഹാവീര്യോ ദിവ്യാസ്ത്രാഭിഹതോ രണേ
    മഹാശനി വിനിർദഗ്ധഃ പാപപോ ഽങ്കുരവാൻ ഇവ
18 തം ദൃഷ്ട്വാ വൃത്ര സങ്കാശം കുംഭകർണം തരസ്വിനം
    ഗതാസും പതിതം ഭൂമൗ രാക്ഷസാഃ പ്രാദ്രവൻ ഭയാത്
19 തഥാ താന്ദ് രവതോ യോധാൻ ദൃഷ്ട്വാ തൗ ദൂഷണാനുജൗ
    അവസ്ഥാപ്യാഥ സൗമിത്രിം സങ്ക്രുദ്ധാവ് അഭ്യധാവതാം
20 താവ് ആദ്രവന്തൗ സങ്ക്രുദ്ധോ വജ്രവേഗപ്രമാഥിനൗ
    പ്രതിജഗ്രാഹ സൗമിത്രിർ വിനദ്യോഭൗ പതത്രിഭിഃ
21 തതഃ സുതുമുലം യുദ്ധം അഭവൽ ലോമഹർഷണം
    ദൂഷണാനുജയോഃ പാർഥ ലക്ഷ്മണസ്യ ച ധീമതഃ
22 മഹതാ ശരവർഷേണ രാക്ഷസൗ സോ ഽഭ്യവർഷത
    തൗ ചാപി വീരൗ സങ്ക്രുദ്ധാവ് ഉഭൗ തൗ സമവർഷതാം
23 മുഹൂർതം ഏവം അഭവദ് വജ്രവേഗപ്രമാഥിനോഃ
    സൗമിത്രേശ് ച മഹാബാഹോഃ സമ്പ്രഹാരഃ സുദാരുണഃ
24 അഥാദ്രിശൃംഗം ആദായ ഹനൂമാൻ മാരുതാത്മജഃ
    അഭിദ്രുത്യാദദേ പ്രാണാൻ വജ്രവേഗസ്യ രക്ഷസഃ
25 നീലശ് ച മഹതാ ഗ്രാവ്ണാ ദൂഷണാവരജം ഹരിഃ
    പ്രമാഥിനം അഭിദ്രുത്യ പ്രമമാഥ മഹാബലഃ
26 തതഃ പ്രാവർതത പുനഃ സംഗ്രാമഃ കടുകോദയഃ
    രാമരാവണ സൈന്യാനാം അന്യോന്യം അഭിധാവതാം
27 ശതശോ നൈരൃതാൻ വന്യാ ജഘ്നുർ വന്യാംശ് ച നൈരൃതാഃ
    നൈരൃതാസ് തത്ര വധ്യന്തേ പ്രായശോ ന തു വാനരാഃ