മഹാഭാരതം മൂലം/വനപർവം/അധ്യായം27

മഹാഭാരതം മൂലം/വനപർവം
രചന:വ്യാസൻ
അധ്യായം27

1 [വൈ]
     വസത്സ്വ് അഥ ദ്വൈതവനേ പാണ്ഡവേഷു മഹാത്മസു
     അനുകീർണം മഹാരണ്യം ബ്രാഹ്മണൈഃ സമപദ്യത
2 ഈര്യമാണേന സതതം ബ്രഹ്മഘോഷേണ സർവതഃ
     ബ്രഹ്മലോകസമം പുണ്യം ആസീദ് ദ്വൈതവനം സരഃ
3 യജുഷാം ഋചാം ച സാമ്നാം ച ഗദ്യാനാം ചൈവ സർവശഃ
     ആസീദ് ഉച്ചാര്യമാണാനാം നിസ്വനോ ഹൃദയംഗമഃ
4 ജ്യാഘോഷഃ പാണ്വവേയാനാം ബ്രഹ്മഘോഷശ് ച ധീമതാം
     സംസൃഷ്ടം ബ്രഹ്മണാ ക്ഷത്രം ഭൂയ ഏവ വ്യരോചത
5 അഥാബ്രവീദ് ബകോ ദാൽഭ്യോ ധർമരാജം യുധിഷ്ഠിരം
     സന്ധ്യാം കൗന്തേയം ആസീനം ഋഷിഭിഃ പരിവാരിതം
6 പശ്യ ദ്വൈതവനേ പാർഥ ബ്രാഹ്മണാനാം തപസ്വിനാം
     ഹോമവേലാം കുരുശ്രേഷ്ഠ സമ്പ്രജ്വലിത പാവകാം
7 ചരന്തി ധർമം പുണ്യേ ഽസ്മിംസ് ത്വയാ ഗുപ്താ ധൃതവ്രതാഃ
     ഭൃഗവോ ഽംഗിരസശ് ചൈവ വാസിഷ്ഠാഃ കാശ്യപൈഃ സഹ
8 ആഗസ്ത്യാശ് ച മഹാഭാഗാ ആത്രേയാശ് ചോത്തമവ്രതാഃ
     സർവസ്യ ജഗതഃ ശ്രേഷ്ഠാ ബ്രാഹ്മണാഃ സംഗതാസ് ത്വയാ
9 ഇദം തു വചനം പാർഥ ശൃണ്വ് ഏകാഗ്രമനാ മമ
     ഭ്രാതൃഭിഃ സഹ കൗന്തേയ യത് ത്വാം വക്ഷ്യാമി കൗരവ
10 ബ്രഹ്മക്ഷത്രേണ സംസൃഷ്ടം ക്ഷത്രം ച ബ്രഹ്മണാ സഹ
    ഉദീർണൗ ദഹതഃ ശത്രൂൻ വനാനീവാഗ്നിമാരുതൗ
11 നാബ്രാഹ്മണസ് താത ചിരം ബുഭൂഷേദ്; ഇച്ഛാന്ന് ഇമം ലോകം അമും ച ജേതും
    വിനീതധർമാർഥം അപേതമോഹം; ലബ്ധ്വാ ദ്വിജം നുദതി നൃപഃ സപത്നാൻ
12 ചരൻ നൈഃശ്രേയസം ധർമം പ്രജാപാലനകാരിതം
    നാധ്യഗച്ഛദ് ബലിർ ലോകേ തീർഥം അന്യത്ര വൈ ദ്വിജാത്
13 അനൂനം ആസീദ് അസുരസ്യ കാമൈർ; വൈരോചനേഃ ശ്രീർ അപി ചാക്ഷയാസീത്
    ലബ്ധ്വാ മഹീം ബ്രാഹ്മണ സമ്പ്രയോഗാത്; തേഷ്വ് ആചരൻ ദുഷ്ടം അതോ വ്യനശ്യത്
14 നാബ്രാഹ്മണം ഭൂമിർ ഇയം സഭൂതിർ; വർണം ദ്വിതീയം ഭജതേ ചിരായ
    സമുദ്രനേമിർ നമതേ തു തസ്മൈ; യം ബ്രാഹ്മണഃ ശാസ്തി നയൈർ വിനീതഃ
15 കുഞ്ജരസ്യേവ സംഗ്രാമേ ഽപരിഗൃഹ്യാങ്കുശ ഗ്രഹം
    ബ്രാഹ്മണൈർ വിപ്രഹീണസ്യ ക്ഷത്രസ്യ ക്ഷീയതേ ബലം
16 ബ്രഹ്മണ്യ് അനുപമാ ദൃഷ്ടിഃ ക്ഷാത്രം അപ്രതിമം ബലം
    തൗ യദാ ചരതഃ സാർധം അഥ ലോകഃ പ്രസീദതി
17 യഥാ ഹി സുമഹാൻ അഗ്നിഃ കക്ഷം ദഹതി സാനിലഃ
    തഥാ ദഹതി രാജന്യോ ബ്രാഹ്മണേന സമം രിപൂൻ
18 ബ്രാഹ്മണേഭ്യോ ഽഥ മേധാവീ ബുദ്ധിർ പര്യേഷണം ചരേ
    അലബ്ധസ്യച ലാഭായ ലബ്ധസ്യ ച വിവൃദ്ധയേ
19 അലബ്ധലാഭായ ച ലബ്ധവൃദ്ധയേ; യഥാർഹ തീർഥപ്രതിപാദനായ
    യശസ്വിനം വേദവിദം വിപശ്ചിതം; ബഹുശ്രുതം ബ്രാഹ്മണം ഏവ വാസയ
20 ബ്രാഹ്മണേഷൂത്തമാ വൃത്തിസ് തവ നിത്യം യുധിഷ്ഠിര
    തേന തേ സർവലോകേഷു ദീപ്യതേ പ്രഥിതം യശഃ
21 തതസ് തേ ബ്രാഹ്മണാഃ സർവേ ബകം ദാൽഭ്യം അപൂജയൻ
    യുധിഷ്ഠിരേ സ്തൂയമാനേ ഭൂയഃ സുമനസോ ഽഭവൻ
22 ദ്വൈപായനോ നാരദശ് ച ജാമദഗ്ന്യഃ പൃഥുശ്രവാഃ
    ഇന്ദ്ര ദ്യുമ്നോ ഭാലുകിശ് ച കൃതചേതാഃ സഹസ്രപാത്
23 കർണ ശ്രവാശ് ച മുഞ്ജശ് ച ലവണാശ്വശ് ച കാശ്യപഃ
    ഹാരീതഃ സ്ഥൂണ കർണശ് ച അഗ്നിവേശ്യോ ഽഥ ശൗനകഃ
24 ഋതവാക് ച സുവാക് ചൈവ ബൃഹദശ്വ ഋതാ വസുഃ
    ഊർധ്വരേതാ വൃഷാമിത്രഃ സുഹോത്രോ ഹോത്രവാഹനഃ
25 ഏതേ ചാന്യേ ച ബഹവോ ബ്രാഹ്മണാഃ സംശിതവ്രതാഃ
    അജാതശത്രും ആനർചുഃ പുരന്ദരം ഇവർഷയഃ