മഹാഭാരതം മൂലം/വനപർവം/അധ്യായം26

മഹാഭാരതം മൂലം/വനപർവം
രചന:വ്യാസൻ
അധ്യായം26

1 [വൈ]
     തത് കാനനം പ്രാപ്യ നരേന്ദ്രപുത്രാഃ; സുഖോചിതാ വാസം ഉപേത്യ കൃച്ഛ്രം
     വിജഹ്രുർ ഇന്ദ്ര പ്രതിമാഃ ശിവേഷു; സരസ്വതീ ശാലവനേഷു തേഷു
2 യതീംശ് ച സർവാൻ സ മുനീംശ് ച രാജാ; തസ്മിൻ വനേ മൂലഫലൈർ ഉദഗ്രൈഃ
     ദ്വിജാതിമുഖ്യാൻ ഋഷഭഃ കുരൂണാം; സന്തർപയാം ആസ മഹാനുഭാവഃ
3 ഇഷ്ടീശ് ച പിത്ര്യാണി തഥാഗ്രിയാണി; മഹാവനേ വസതാം പാണ്ഡവാനാം
     പുരോഹിതഃ സർവസമൃദ്ധതേജാശ്; ചകാര ധൗമ്യഃ പിതൃവത് കുരൂണാം
4 അപേത്യ രാഷ്ട്രാദ് വസതാം തു തേഷാം; ഋഷിഃ പുരാണോ ഽതിഥിർ ആജഗാമ
     തം ആശ്രമം തീവ്രസമൃദ്ധതേജാ; മാർകണ്ഡേയഃ ശ്രീമതാം പാണ്ഡവാനാം
5 സ സർവവിദ് ദ്രൗപദീം പ്രേക്ഷ്യ കൃഷ്ണാം; യുധിഷ്ഠിരം ഭീമസേനാർജുനൗ ച
     സംസ്മൃത്യ രാമം മനസാ മഹാത്മാ; തപസ്വിമധ്യേ ഽസ്മയതാമിതൗജാഃ
6 തം ധർമരാജോ വിമനാ ഇവാബ്രവീത്; സർവേ ഹ്രിയാ സന്തി തപസ്വിനോ ഽമീ
     ഭവാൻ ഇദം കിം സ്മയതീവ ഹൃഷ്ടസ്; തപസ്വിനാം പശ്യതാം മാം ഉദീക്ഷ്യ
7 [മാർ]
     ന താത ഹൃഷ്യാമി ന ച സ്മയാമി; പ്രഹർഷജോ മാം ഭജതേ ന ദർപഃ
     തവാപദം ത്വ് അദ്യ സമീക്ഷ്യ രാമം; സത്യവ്രതം ദാശരഥിം സ്മരാമി
8 സ ചാപി രാജാ സഹ ലക്ഷ്മണേന; വനേ നിവാസം പിതുർ ഏവ ശാസനാത്
     ധന്വീ ചരൻ പാർഥ പുരാ മയൈവ; ദൃഷ്ടോ ഗിരേർ ഋഷ്യമൂകസ്യ സാനൗ
9 സഹസ്രനേത്ര പ്രതിമോ മഹാത്മാ; മയസ്യ ജേത നമുചേശ് ച ഹന്താ
     പിതുർ നിദേശാദ് അനഘഃ സ്വധർമം; വനേവാസം ദാശരഥിശ് ചകാര
10 സ ചാപി ശക്രസ്യ സമപ്രഭാവോ; മഹാനുഭാവഃ സമരേഷ്വ് അജേയഃ
    വിഹായ ഭോഗാൻ അചരദ് വനേഷു; നേശേ ബലസ്യേതി ചരേദ് അധർമം
11 നൃപാശ് ച നാഭാഗ ഭഗീരഥാദയോ; മഹീം ഇമാം സാഗരാന്താം വിജിത്യ
    സത്യേന തേ ഽപ്യ് അജയംസ് താത ലോകാൻ; നേശേ ബലസ്യേതി ചരേദ് അധർമം
12 അലർകം ആഹുർ നരവര്യ സന്തം; സത്യവ്രതം കാശികരൂഷ രാജം
    വിഹായ രഷ്ട്രാണി വസൂനി ചൈവ; നേശേ ബലസ്യേതി ചരേദ് അധർമം
13 ധാത്രാ വിധിർ യോ വിഹിതഃ പുരാണസ്; തം പൂജയന്തോ നരവര്യ സന്തഃ
    സപ്തർഷയഃ പാർഥ ദിവി പ്രഭാന്തി; നേശേ ബലസ്യേതി ചരേദ് അധർമം
14 മഹാബലാൻ പർവതകൂടമാത്രാൻ; വിഷാണിനഃ പശ്യ ഗജാൻ നരേന്ദ്ര
    സ്ഥിതാൻ നിദേശേ നരവര്യ ധാതുർ; നേശേ ബലസ്യേതി ചരേദ് അധർമം
15 സർവാണി ഭൂതാനി നരേന്ദ്ര പശ്യ; യഥാ യഥാവദ് വിഹിതം വിധാത്രാ
    സ്വയോനിതസ് തത് കുരുതേ പ്രഭാവാൻ; നേശേ ബലസ്യേതി ചരേദ് അധർമം
16 സത്യേന ധർമേണ യഥാർഹ വൃത്ത്യാ; ഹ്രിയാ തഥാ സർവഭൂതാന്യ് അതീത്യ
    യശശ് ച തേജശ് ച തവാപി ദീപ്തം; വിഭാവസോർ ഭാസ്കരസ്യേവ പാർഥ
17 യഥാപ്രതിജ്ഞം ച മഹാനുഭാവ; കൃച്ഛ്രം വനേവാസം ഇമം നിരുഷ്യ
    തതഃ ശ്രിയം തേജസാ സ്വേന ദീപ്താം; ആദാസ്യസേ പാർഥിവ കൗരവേഭ്യഃ
18 [വൈ]
    തം ഏവം ഉക്ത്വാ വചനം മഹർഷിസ്; തപസ്വിമധ്യേ സഹിതം സുഹൃദ്ഭിഃ
    ആമന്ത്ര്യ ധൗമ്യം സഹിതാംശ് ച പാർഥാംസ്; തതഃ പ്രതസ്ഥേ ദിശം ഉത്തരാം സഃ