മഹാഭാരതം മൂലം/വനപർവം/അധ്യായം242

മഹാഭാരതം മൂലം/വനപർവം
രചന:വ്യാസൻ
അധ്യായം242

1 [വൈ]
     തതസ് തു ശിൽപിനഃ സർവേ അമാത്യപ്രവരാശ് ച ഹ
     വിദുരശ് ച മഹാപ്രാജ്ഞോ ധാർതരാഷ്ട്രേ ന്യവേദയത്
2 സജ്ജം ക്രതുവരം രാജൻ കാലപ്രാപ്തം ച ഭാരത
     സൗവർണം ച കൃതം ദിവ്യം ലാംഗലം സുമഹാധനം
3 ഏതച് ഛ്രുത്വാ നൃപശ്രേഷ്ഠോ ധാർതരാഷ്ട്രോ വിശാം പതേ
     ആജ്ഞാപയാം ആസ നൃപഃ ക്രതുരാജപ്രവർതനം
4 തതഃ പ്രവവൃതേ യജ്ഞഃ പ്രഭൂതാന്നഃ സുസംസ്കൃതഃ
     ദീക്ഷിതശ് ചാപി ഗാന്ധാരിർ യഥാ ശാസ്തം യഥാക്രമം
5 പ്രഹൃഷ്ടോ ധൃതരാഷ്ട്രോ ഽഭൂദ് വിദുരശ് ച മഹായശാഃ
     ഭീഷ്മോ ദ്രോണഃ കൃപഃ കർണോ ഗാന്ധാരീ ച യശസ്വിനീ
6 നിമന്ത്രണാർഥം ദൂതാംശ് ച പ്രേഷയാം ആസ ശീഘ്രഗാൻ
     പാർഥിവാനാം ച രാജേന്ദ്ര ബ്രാഹ്മണാനാം തഥൈവ ച
     തേ പ്രയാതാ യഥോദ്ദിഷ്ടം ദൂതാസ് ത്വരിതവാഹനാഃ
7 തത്ര കം ചിത് പ്രയാതം തു ദൂതം ദുഃശാസനോ ഽബ്രവീത്
     ഗച്ഛ ദ്വൈതവനം ശീഘ്രം പാണ്ഡവാൻ പാപപൂരുഷാൻ
     നിമന്ത്രയ യഥാന്യായം വിപ്രാംസ് തസ്മിൻ മഹാവനേ
8 സ ഗത്വാ പാണ്ഡവാവാസം ഉവാചാഭിപ്രണമ്യ താൻ
     ദുര്യോധനോ മഹാരാജ യജതേ നൃപസത്തമഃ
9 സ്വവീര്യാർജിതം അർഥൗഘം അവാപ്യ കുരുനന്ദനഃ
     തത്ര ഗച്ഛന്തി രാജാനോ ബ്രാഹ്മണാശ് ച തതസ് തതഃ
10 അഹം തു പ്രേഷിതോ രാജൻ കൗരവേണ മഹാത്മനാ
    ആമന്ത്രയതി വോ രാജാ ധാർതരാഷ്ട്രോ ജനേശ്വരഃ
    മനോ ഽഭിലഷിതം രാജ്ഞസ് തം ക്രതും ദ്രഷ്ടും അർഹഥ
11 തതോ യുധിഷ്ഠിരോ രാജാ തച് ഛ്രുത്വാ ദൂത ഭാഷിതം
    അബ്രവീൻ നൃപശാർദൂലോ ദിഷ്ട്യാ രാജാ സുയോധനഃ
    യജതേ ക്രതുമുഖ്യേന പൂർവേഷാം കീർതിവർധനഃ
12 വയം അപ്യ് ഉപയാസ്യാമോ ന ത്വ് ഇദാനീം കഥം ചന
    സമയഃ പരിപാല്യോ നോ യാവദ് വർഷം ത്രയോദശം
13 ശ്രുത്വൈതദ് ധർമരാജസ്യ ഭീമോ വചനം അബ്രവീത്
    തദാ തു നൃപതിർ ഗന്താ ധമ രാജോ യുധിഷ്ഠിരഃ
14 അസ്ത്രശസ്ത്രപ്രദീപ്തേ ഽഗ്നൗ യദാ തം പാതയിഷ്യതി
    വർഷാത് ത്രയോദശാദ് ഊർധ്വം രണസത്രേ നരാധിപഃ
15 യദാ ക്രോധഹവിർ മോക്താ ധാർതരാഷ്ട്രേഷു പാണ്ഡവഃ
    ആഗന്താരസ് തദാ സ്മേതി വാച്യസ് തേ സ സുയോധനഃ
16 ശേഷാസ് തു പാണ്ഡവാ രാജൻ നൈവോചുഃ കിം ചിദ് അപ്രിയം
    ദൂതശ് ചാപി യഥാവൃത്തം ധാർതരാഷ്ട്രേ ന്യവേദയത്
17 അഥാജഗ്മുർ നരശ്രേഷ്ഠാ നാനാജനപദേശ്വരാഃ
    ബ്രാഹ്മണാശ് ച മഹാഭാഗാ ധാർതരാഷ്ട്ര പുരം പ്രതി
18 തേ ത്വ് അർചിതാ യഥാശാസ്ത്രം യഥാ വർണം യഥാക്രമം
    മുദാ പരമയാ യുക്താഃ പ്രീത്യാ ചാപി നരേശ്വര
19 ധൃതരാഷ്ട്രോ ഽപി രാജേന്ദ്ര സംവൃതഃ സർവകൗരവൈഃ
    ഹർഷേണ മഹതാ യുക്തോ വിദുരം പ്രത്യഭാഷത
20 യഥാസുഖീ ജനഃ സർവഃ ക്ഷത്തഃ സ്യാദ് അന്നസംയുതഃ
    തുഷ്യേച് ച യജ്ഞസദനേ തഥാ ക്ഷിപ്രം വിധീയതാം
21 വിദുരസ് ത്വ് ഏവം ആജ്ഞപ്തഃ സർവവർണാൻ അരിന്ദമ
    യഥാ പ്രമാണതോ വിദ്വാൻ പൂജയാം ആസ ധർമവിത്
22 ഭക്ഷ്യഭോജ്യാന്ന പാനേന മാല്യൈശ് ചാപി സുഗന്ധിഭിഃ
    വാസോഭിർ വിവിധൈശ് ചൈവ യോജയാം ആസ ഹൃഷ്ടവത്
23 കൃത്വാ ഹ്യ് അവഭൃഥം വീരോ യഥാശാസ്ത്രം യഥാക്രമം
    സാന്ത്വയിത്വാ ച രാജേന്ദ്രോ ദത്ത്വാ ച വിവിധം വസു
    വിസർജയാം ആസ നൃപാൻ ബ്രാഹ്മണാംശ് ച സഹസ്രശഃ
24 വിസർജയിത്വാ സ നൃപാൻ ഭ്രാതൃഭിഃ പരിവാരിതഃ
    വിവേശ ഹാസ്തിനപുരം സഹിതഃ കർണ സൗബലൈഃ