മഹാഭാരതം മൂലം/വനപർവം/അധ്യായം235

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/വനപർവം
രചന:വ്യാസൻ
അധ്യായം235

1 [വൈ]
     തതോ ഽർജുനശ് ചിത്രസേനം പ്രഹസന്ന് ഇദം അബ്രവീത്
     മധ്യേ ഗന്ധർവസൈന്യാനാം മഹേഷ്വാസോ മഹാദ്യുതിഃ
 2 കിം തേ വ്യവസിതം വീര കൗരവാണാം വിനിഗ്രഹേ
     കിമർഥം ച സദാരോ ഽയം നിഗൃഹീതഃ സുയോധനഃ
 3 [ചിത്ര]
     വിദിതോ ഽയം അഭിപ്രായസ് തതസ്ഥേന മഹാത്മനാ
     ദുര്യോധനസ്യ പാപസ്യ കർണസ്യ ച ധനഞ്ജയ
 4 വനസ്ഥാൻ ഭവതോ ജ്ഞാത്വാ ക്ലിശ്യമാനാൻ അനർഹവത്
     ഇമേ ഽവഹസിതും പ്രാപ്താ ദ്രൗപദീം ച യശസ്വിനീം
 5 ജ്ഞാത്വാ ചികീർഷിതം ചൈഷാം മാം ഉവാച സുരേശ്വരഃ
     ഗച്ഛ ദുര്യോധനം ബദ്ധ്വാ സാമാത്യം ത്വം ഇഹാനയ
 6 ധനഞ്ജയശ് ച തേ രക്ഷ്യഃ സഹ ഭ്രാതൃഭിർ ആഹവേ
     സ ഹി പ്രിയഃ സഖാ തുഭ്യം ശിഷ്യശ് ച തവ പാണ്ടവഃ
 7 വചനാദ് ദേവരാജസ്യ തതോ ഽസ്മീഹാഗതോ ദ്രുതം
     അയം ദുരാത്മാ ബദ്ധശ് ച ഗമിഷ്യാമി സുരാലയം
 8 [അർജ്]
     ഉത്സൃജ്യതാം ചിത്രസേന ഭ്രാതാസ്മാകം സുയോധനഃ
     ധർമരാജസ്യ സന്ദേശാൻ മമ ചേദ് ഇച്ഛസി പ്രിയം
 9 [ചിത്ര]
     പാപോ ഽയം നിത്യസന്ദുഷ്ടോ ന വിമോക്ഷണം അർഹതി
     പ്രലബ്ധാ ധർമരാജസ്യ കൃഷ്ണായാശ് ച ധനഞ്ജയ
 10 നേദം ചികീർഷിതം തസ്യ കുന്തീപുത്രോ മഹാവ്രതഃ
    ജാനാതി ധർമരാജോ ഹി ശ്രുത്വാ കുരു യഥേച്ഛസി
11 [വൈ]
    തേ സർവ ഏവ രാജാനം അഭിജഗ്മുർ യുധിഷ്ഠിരം
    അഭിഗമ്യ ച തത് സർവം ശശംസുസ് തസ്യ ദുഷ്കൃതം
12 അജാതശത്രുസ് തച് ഛ്രുത്വാ ഗന്ധർവസ്യ വചസ് തദാ
    മോക്ഷയാം ആസ താൻ സർവാൻ ഗന്ധർവാൻ പ്രശശംസ ച
13 ദിഷ്ട്യാ ഭവദ്ഭിർ ബലിഭിഃ ശക്തൈഃ സർവൈർ ന ഹിംസിതഃ
    ദുർവൃത്തോ ദാർതരാഷ്ട്രോ ഽയം സാമാത്യജ്ഞാതി ബാന്ധവഃ
14 ഉപകാരോ മഹാംസ് താത കൃതോ ഽയം മമ ഖേചരാഃ
    കുലം ന പരിഭൂതം മേ മോക്ഷേണാസ്യ ദുരാത്മനഃ
15 ആജ്ഞാപയധ്വം ഇഷ്ടാനി പ്രീയാമോ ദർശനേന വഃ
    പ്രാപ്യ സർവാൻ അഭിപ്രായാംസ് തതോ വ്രജത മാചിരം
16 അനുജ്ഞാതാസ് തു ഗന്ധർവാഃ പാണ്ഡുപുത്രേണ ധീമതാ
    സഹാപ്സരോഭിഃ സംഹൃഷ്ടാശ് ചിത്രസേന മുഖാ യയുഃ
17 ദേവരാഡ് അപി ഗന്ധർവാൻ മൃതാംസ് താൻ സമജീവയത്
    ദിവ്യേനാമൃത വർഷേണ യേ ഹതാഃ കൗരവൈർ യുധി
18 ജ്ഞാതീംസ് താൻ അവമുച്യാഥ രാജദാരാംശ് ച സർവശഃ
    കൃത്വാ ച ദുഷ്കരം കർമ പ്രീതിയുക്താശ് ച പാണ്ഡവാഃ
19 സസ്ത്രീ കുമാരൈഃ കുരുഭിഃ പൂജ്യമാനാ മഹാരഥാഃ
    ബഭ്രാജിരേ മഹാത്മാനഃ കുരുമധ്യേ യഥാഗ്നയഃ
20 തതോ ദുര്യോധനം മുച്യ ഭ്രാതൃഭിഃ സഹിതം തദാ
    യുധിഷ്ഠിരഃ സപ്രണയം ഇദം വചനം അബ്രവീത്
21 മാ സ്മ താത പുനഃ കാർഷീർ ഈദൃശം സാഹസം ക്വ ചിത്
    ന ഹി സാഹസ കർതാരഃ സുഖം ഏധന്തി ഭാരത
22 സ്വസ്തിമാൻ സഹിതഃ സർവൈർ ഭ്രാതൃഭിഃ കുരുനന്ദന
    ഗൃഹാൻ വ്രജ യഥാകാമം വൈമനസ്യം ച മാ കൃഥാഃ
23 പാണ്ഡവേനാഭ്യനുജ്ഞാതോ രാജാ ദുര്യോധനസ് തദാ
    വിദീര്യമാണോ വ്രീഡേന ജഗാമ ഗനരം പ്രതി
24 തസ്മിൻ ഗതേ കൗരവേയേ കുന്തീപുത്രോ യുധിഷ്ഠിരഃ
    ഭ്രാതൃഭിഃ സഹിതോ വീരഃ പൂജ്യമാനോ ദ്വിജാതിഭിഃ
25 തപോധനൈശ് ച തൈഃ സർവൈർ വൃതഃ ശക്ര ഇവാമരൈഃ
    വനേ ദ്വൈതവനേ തസ്മിൻ വിജഹാര മുദാ യുതഃ