മഹാഭാരതം മൂലം/വനപർവം/അധ്യായം234

മഹാഭാരതം മൂലം/വനപർവം
രചന:വ്യാസൻ
അധ്യായം234

1 [വൈ]
     തതോ ദിവ്യാസ്ത്രസമ്പന്നാ ഗന്ധർവാ ഹേമമാലിനഃ
     വിസൃജന്തഃ ശരാൻ ദീപ്താൻ സമന്താത് പര്യവാരയൻ
2 ചത്വാരഃ പാണ്ഡവാ വീരാ ഗന്ധർവാശ് ച സഹസ്രശഃ
     രണേ സംന്യപതൻ രാജംസ് തദ് അദ്ഭുതം ഇവാഭവത്
3 യഥാ കർണസ്യ ച രഥോ ധാർതരാഷ്ട്രസ്യ ചോഭയോഃ
     ഗന്ധർവൈഃ ശതശോ ഛിന്നൗ തഥാ തേഷാം പ്രചക്രിരേ
4 താൻ സമാപതതോ രാജൻ ഗന്ധർവാഞ് ശതശോ രണേ
     പ്രത്യഗൃഹ്ണൻ നരവ്യാഘ്രാഃ ശരവർഷൈർ അനേകശഃ
5 അവകീര്യമാണാഃ ഖഗമാഃ ശരവർഷൈഃ സമന്തതഃ
     ന ശേകുഃ പാണ്ഡുപുത്രാണാം സമീപേ പരിവർതിതും
6 അഭിക്രുദ്ധാൻ അഭിപ്രേക്ഷ്യ ഗന്ധർവാൻ അർജുനസ് തദാ
     ലക്ഷയിത്വാഥ ദിവ്യാനി മഹാസ്ത്രാണ്യ് ഉപചക്രമേ
7 സഹസ്രാണാം സഹസ്രം സ പ്രാഹിണോദ് യമസാദനം
     ആഗ്നേയേനാർജുനഃ സംഖ്യേ ഗന്ധർവാണാം ബലോത്കടഃ
8 തഥാ ഭീമോ മഹേഷ്വാസഃ സംയുഗേ ബലിനാം വരഃ
     ഗന്ധർവാഞ് ശതശോ രാജഞ് ജഘാന നിശിതൈഃ ശരൈഃ
9 മാദ്രീപുത്രാവ് അപി തഥാ യുധ്യമാനൗ ബലോത്കടൗ
     പരിഗൃഹ്യാഗ്രതോ രാജഞ് ജഘ്നതുഃ ശതശഃ പരാൻ
10 തേ വധ്യമാനാ ഗന്ധർവാ ദിവ്യൈർ അസ്ത്രൈർ മഹാത്മഭിഃ
    ഉത്പേതുഃ ഖം ഉപാദായ ധൃതരാഷ്ട്ര സുതാംസ് തതഃ
11 താൻ ഉത്പതിഷ്ണൂൻ ബുദ്ധ്വാ തു കുന്തീപുത്രോ ധനഞ്ജയഃ
    മഹതാ ശരജാലേന സമന്താത് പര്യവാരയത്
12 തേ ബദ്ധാഃ ശരജാലേന ശകുന്താ ഇവ പഞ്ജരേ
    വവർഷുർ അർജുനം ക്രോധാദ് ഗദാ ശക്ത്യൃഷ്ടി വൃഷ്ടിഭിഃ
13 ഗദാ ശക്ത്യസി വൃഷ്ടീസ് താ നിഹത്യ സ മഹാസ്ത്രവിത്
    ഗാത്രാണി ചാഹനദ് ഭല്ലൈർ ഗന്ധർവാണാം ധനഞ്ജയഃ
14 ശിരോഭിഃ പ്രപതദ് ഭിശ് ച ചരണൈർ ബാഹുഭിസ് തഥാ
    അശ്മവൃഷ്ടിർ ഇവാഭാതി പരേഷാം അഭവദ് ഭയം
15 തേ വധ്യമാനാ ഗന്ധർവാഃ പാണ്ഡവേന മഹാത്മനാ
    ഭൂമിഷ്ഠം അന്തരിക്ഷസ്ഥാഃ ശരവർഷൈർ അവാകിരൻ
16 തേഷാം തു ശരവർഷാണി സവ്യസാചീ പരന്തപഃ
    അസ്ത്രൈഃ സംവാര്യ തേജസ്വീ ഗന്ധർവാൻ പ്രത്യവിധ്യത
17 സ്ഥൂണാകർണേന്ദ്രജാലം ച സൗരം ചാപി തഥാർജുനഃ
    ആഗ്നേയം ചാപി സൗമ്യം ച സസർജ കുരുനന്ദനഃ
18 തേ ദഹ്യമാനാ ഗൻഹർവാഃ കുന്തീപുത്രസ്യ സായകൈഃ
    ദൈതേയാ ഇവ ശക്രേണ വിഷാദം അഗമൻ പരം
19 ഊർധ്വം ആക്രമമാണാശ് ച ശരജാലേന വാരിതാഃ
    വിസർപമാണാ ഭല്ലൈശ് ച വാര്യന്തേ സവ്യസാചിനാ
20 ഗന്ധർവാംസ് ത്രാസിതാൻ ദൃഷ്ട്വാ കുന്തീപുത്രേണ ധീമതാ
    ചിത്രസേനോ ഗദാം ഗൃഹ്യ സവ്യസാചിനം ആദ്രവത്
21 തസ്യാഭിപതതസ് തൂർണം ഗദാഹസ്തസ്യ സംയുഗേ
    ഗദാം സർവായസീം പാർഥഃ ശരൈശ് ചിച്ഛേദ സപ്തധാ
22 സഗദാം ബഹുധാ ദൃഷ്ട്വാ കൃത്താം ബാണൈസ് തരസ്വിനാ
    സംവൃത്യ വിദ്യയാത്മാനം യോധയാം ആസ പാണ്ഡവം
    അസ്ത്രാണി തസ്യ ദിവ്യാനി യോധയാം ആസ ഖേ സ്ഥിതഃ
23 ഗൻഹർവ രാജോ ബലവാൻ മായയാന്തർഹിതസ് തദാ
    അന്തർഹിതം സമാലക്ഷ്യ പ്രഹരന്തം അഥാർജുനഃ
    താഡയാം ആസ ഖചരൈർ ദിവ്യാസ്ത്രപ്രതിമന്ത്രിതൈഃ
24 അന്തർധാനവധം ചാസ്യ ചക്രേ ക്രുദ്ധോ ഽർജുനസ് തദാ
    ശബ്ദവേദ്യം ഉപാശ്രിത്യ ബഹുരൂപോ ധനഞ്ജയഃ
25 സ വദ്യമാനസ് തൈർ അസ്ത്രൈർ അർജുനേന മഹാത്മനാ
    അഥാസ്യ ദർശയാം ആസ തദാത്മാനം പ്രിയം സഖാ
26 ചിത്രസേനം അഥാലക്ഷ്യ സഖായം യുധി ദുർബലം
    സഞ്ജഹാരാസ്ത്രം അഥ തത് പ്രസൃഷ്ടം പാണ്ഡവർഷഭഃ
27 ദൃഷ്ട്വാ തു പാണ്ഡവാഃ സർവേ സംഹൃതാസ്ത്രം ധനഞ്ജയം
    സഞ്ജഹ്രുഃ പ്രദുതാൻ അശ്വാഞ് ശരവേഗാൻ ധനൂംഷി ച
28 ചിത്രസേനശ് ച ഭീമശ് ച സവ്യസാചീ യമാവ് അപി
    പൃഷ്ട്വാ കൗശലം അന്യോന്യം രഥേഷ്വ് ഏവാവതസ്ഥിരേ