മഹാഭാരതം മൂലം/വനപർവം/അധ്യായം159

മഹാഭാരതം മൂലം/വനപർവം
രചന:വ്യാസൻ
അധ്യായം159

1 [വൈഷ്ര്]
     യുധിഷ്ഠിര ധൃതിർ ദാക്ഷ്യം ദേശകാലൗ പരാക്രമഃ
     ലോകതന്ത്രവിധാനാനാം ഏഷ പഞ്ചവിധോ വിധിഃ
2 ധൃതിമന്തശ് ച ദക്ഷാശ് ച സ്വേ സ്വേ കർമണി ഭാരത
     പരാക്രമവിധാനജ്ഞാ നരാഃ കൃതയുഗേ ഽഭവൻ
3 ധൃതിമാൻ ദേശകാലജ്ഞഃ സർവധർമവിധാനവിത്
     ക്ഷത്രിയഃ ക്ഷത്രിയ ശ്രേഷ്ഠ പൃഥിവീം അനുശാസ്തി വൈ
4 യ ഏവം വർതതേ പാർഥ പുരുഷഃ സർവകർമസു
     സ ലോകേ ലഭതേ വീര യശോ പ്രേത്യ ച സദ്ഗതിം
5 ദേശകാലാന്തര പ്രേപ്സുഃ കൃത്വാ ശക്രഃ പരാക്രമം
     സമ്പ്രാപ്തസ് ത്രിദിവേ രാജ്യം വൃത്രഹാ വസുഭിഃ സഹ
6 പാപാത്മാ പാപബുദ്ധിർ യഃ പാപം ഏവാനുവർതതേ
     കർമണാം അവിഭാഗജ്ഞഃ പ്രേത്യ ചേഹ ച നശ്യതി
7 അകാലജ്ഞഃ സുദുർമേധാഃ കാര്യാണാം അവിശേഷവിത്
     വൃഥാചാര സമാരംഭഃ പ്രേത്യ ചേഹ ച നശ്യതി
8 സാഹസേ വർതമാനാനാം നികൃതീനാം ദുരാത്മനാം
     സർവസാമർഥ്യ ലിപ്സൂനാം പാപോ ഭവതി നിശ്ചയഃ
9 അധർമജ്ഞോ ഽവലിപ്തശ് ച ബാല ബുദ്ധിർ അമർഷണഃ
     നിർഭയോ ഭീമസേനോ ഽയം തം ശാധി പുരുഷർഷഭ
10 ആർഷ്ടിഷേണസ്യ രാജർഷേഃ പ്രാപ്യ ഭൂയസ് ത്വം ആശ്രമം
    താമിസ്രം പ്രഥമം പക്ഷം വീതശോകഭയോ വസ
11 അലകാഃ സഹ ഗന്ധർവൈർ യക്ഷൈശ് ച സഹ രാക്ഷസൈഃ
    മൻ നിയുക്താ മനുഷ്യേന്ദ്ര സർവേ ച ഗിരിവാസിനഃ
    രക്ഷന്തു ത്വാ മഹാബാഹോ സഹിതം ദ്വിജസത്തമൈഃ
12 സാഹസേഷു ച സന്തിഷ്ഠന്ന് ഇഹ ശൈലേ വൃകോദരഃ
    വാര്യതാം സാധ്വ് അയം രാജംസ് ത്വയാ ധർമഭൃതാം വര
13 ഇതഃ പരം ച രാജേന്ദ്ര ദ്രക്ഷ്യന്തി വനഗോചരാഃ
    ഉപസ്ഥാസ്യന്തി ച സദാ രക്ഷിഷ്യന്തി ച സർവശഃ
14 തഥൈവ ചാന്ന പാനാനി സ്വാദൂനി ച ബഹൂനി ച
    ഉപസ്ഥാസ്യന്തി വോ ഗൃഹ്യ മത് പ്രേഷ്യാഃ പുരുഷർഷഭ
15 യഥാ ജിഷ്ണുർ മഹേന്ദ്രസ്യ യഥാ വായോർ വൃകോദരഃ
    ധർമസ്യ ത്വം യഥാ താത യോഗോത്പന്നോ നിജഃ സുതഃ
16 ആത്മജാവ് ആത്മസമ്പന്നൗ യമൗ ചോഭൗ യഥാശ്വിനോഃ
    രക്ഷ്യാസ് തദ്വൻ മമാപീഹ യൂയം സർവേ യുധിഷ്ഠിര
17 അർഥതത്ത്വവിഭാഗജ്ഞഃ സർവധർമവിശേഷവിത്
    ഭീമസേനാദ് അവരജഃ ഫൽഗുനഃ കുശലീ ദിവി
18 യാഃ കാശ് ചന മതാ ലോകേഷ്വ് അഗ്ര്യാഃ പരമസമ്പദഃ
    ജന്മപ്രഭൃതി താഃ സർവാഃ സ്ഥിതാസ് താത ധനഞ്ജയേ
19 ദമോ ദാനം ബലം ബുദ്ധിർ ഹ്രീർ ധൃതിർ തേജ ഉത്തമം
    ഏതാന്യ് അപി മഹാസത്ത്വേ സ്ഥിതാന്യ് അമിതതേജസി
20 ന മോഹാത് കുരുതേ ജിഷ്ണുഃ കർമ പാണ്ഡവ ഗർഹിതം
    ന പാർഥസ്യ മൃഷോക്താനി കഥയന്തി നരാ നൃഷു
21 സ ദേവ പിതൃഗന്ധർവൈഃ കുരൂണാം കീർതിവർധനഃ
    മാനിതഃ കുരുതേ ഽസ്ത്രാണി ശക്ര സദ്മനി ഭാരത
22 യോ ഽസൗ സർവാൻ മഹീപാലാൻ ധർമേണ വശം ആനയത്
    സ ശന്തനുർ മഹാതേജാ പിതുസ് തവ പിതാമഹഃ
    പ്രീയതേ പാർഥ പാർഥേന ദിവി ഗാണ്ഡീവധന്വനാ
23 സമ്യക് ചാസൗ മഹാവീര്യഃ കുലധുര്യ ഇവ സ്ഥിതഃ
    പിതൄൻ ദേവാംസ് തഥാ വിപ്രാൻ പൂജയിത്വാ മഹായശഃ
    സപ്ത മുഖ്യാൻ മഹാമേധാൻ ആഹരദ് യമുനാം പ്രതി
24 അധിരാജഃ സ രാജംസ് ത്വാം ശന്തനുഃ പ്രപിതാമഹഃ
    സ്വർഗജിച് ഛക്ര ലോകസ്ഥഃ കുശലം പരിപൃച്ഛതി
25 [വൈ]
    തതഃ ശക്തിം ഗദാം ഖഡ്ഗം ധനുശ് ച ഭരതർഷഭ
    പ്രാധ്വം കൃത്വാ നമശ് ചക്രേ കുബേരായ വൃകോദരഃ
26 തതോ ഽബ്രവീദ് ധനാധ്യക്ഷഃ ശരണ്യഃ ശരണാഗതം
    മാനഹാ ഭവ ശത്രൂണാം സുഹൃദാം നന്ദിവർധനഃ
27 സ്വേഷു വേശ്മസു രമ്യേഷു വസതാമിത്ര താപനാഃ
    കാമാൻ ഉപഹരിഷ്യന്തി യക്ഷാ വോ ഭരതർഷഭാഃ
28 ശീഘ്രം ഏവ ഗുഡാകേശഃ കൃതാസ്ത്രഃ പുരുഷർഷഭഃ
    സാക്ഷാൻ മഘവതാ സൃഷ്ടഃ സമ്പ്രാപ്സ്യതി ധനഞ്ജയഃ
29 ഏവം ഉത്തമകർമാണം അനുശിഷ്യ യുധിഷ്ഠിരം
    അസ്തം ഗിരിവരശ്രേഷ്ഠം പ്രയയൗ ഗുഹ്യകാധിപഃ
30 തം പരിസ്തോമ സങ്കീർണൈർ നാനാരത്നവിഭൂഷിതൈഃ
    യാനൈർ അനുയയുർ യക്ഷാ രാക്ഷസാശ് ച സഹസ്രശഃ
31 പക്ഷിണാം ഇവ നിർഘോഷഃ കുബേര സദനം പ്രതി
    ബഭൂവ പരമാശ്വാനാം ഐരാവത പഥേ യതാം
32 തേ ജഗ്മുസ് തൂർണം ആകാശം ധനാധിപതി വാജിനഃ
    പ്രകർഷന്ത ഇവാഭ്രാണി പിബന്ത ഇവ മാരുതം
33 തതസ് താനി ശരീരാണി ഗതസത്ത്വാനി രക്ഷസാം
    അപാകൃഷ്യന്ത ശൈലാഗ്രാദ് ധനാധിപതി ശാസനാത്
34 തേഷാം ഹി ശാപകാലോ ഽസൗ കൃതോ ഽഗസ്ത്യേന ധീമതാ
    സമരേ നിഹതാസ് തസ്മാത് സർവേ മണിമതാ സഹ
35 പാണ്ഡവാസ് തു മഹാത്മാനസ് തേഷു വേശ്മസു താം ക്ഷപാം
    സുഖം ഊഷുർ ഗതോദ്വേഗാഃ പൂജിതാഃ സർവരാക്ഷസൈഃ