മഹാഭാരതം മൂലം/വനപർവം/അധ്യായം138

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/വനപർവം
രചന:വ്യാസൻ
അധ്യായം138

1 [ൽ]
     ഭരദ്വാജസ് തു കൗന്തേയ കൃത്വാ സ്വാധ്യായം ആഹ്നികം
     സമിത് കലാപം ആദായ പ്രവിവേശ സ്വം ആശ്രമം
 2 തം സ്മ ദൃഷ്ട്വാ പുരാ സർവേ പ്രത്യുത്തിഷ്ഠന്തി പാവകാഃ
     ന ത്വ് ഏനം ഉപതിഷ്ഠന്തി ഹതപുത്രം തദാഗ്നയഃ
 3 വൈകൃതം ത്വ് അഗ്നിഹോത്രേ സ ലക്ഷയിത്വാ മഹാതപാഃ
     തം അന്ധം ശൂദ്രം ആസീനം ഗൃഹപാലം അഥാബ്രവീത്
 4 കിം നു മേ നാഗ്നയഃ ശൂദ്ര പ്രതിനന്ദന്തി ദർശനം
     ത്വം ചാപി ന യഥാപൂർവം കച് ചിത് ക്ഷേമം ഇഹാശ്രമേ
 5 കച് ചിൻ ന രൈഭ്യം പുത്രോ മേ ഗതവാൻ അൽപചേതനഃ
     ഏതദ് ആചക്ഷ്വ മേ ശീഘ്രം ന ഹി മേ ശുധ്യതേ മനാഃ
 6 [ഷൂ]
     രൈഭ്യം ഗതോ നൂനം അസൗ സുതസ് തേ മന്ദചേതനഃ
     തഥാ ഹി നിഹതഃ ശേതേ രാക്ഷസേന ബലീയസാ
 7 പ്രകാല്യമാനസ് തേനായം ശൂലഹസ്തേന രക്ഷസാ
     അഗ്ന്യാഗാരം പ്രതി ദ്വാരി മയാ ദോർഭ്യാം നിവാരിതഃ
 8 തതഃ സ നിഹതോ ഹ്യ് അത്ര ജലകാമോ ഽശുചിർ ധ്രുവം
     സംഭാവിതോ ഹി തൂർണേന ശൂലഹസ്തേന രക്ഷസാ
 9 [ൽ]
     ഭരദ്വാജസ് തു ശൂദ്രസ്യ തച് ഛ്രുത്വാ വിപ്രിയം വചഃ
     ഗതാസും പുത്രം ആദായ വിലലാപ സുദുഃഖിതഃ
 10 ബ്രാഹ്മണാനാം കിലാർഥായ നനു ത്വം തപ്തവാംസ് തപഃ
    ദ്വിജാനാം അനധീതാ വൈ വേദാഃ സമ്പ്രതിഭാന്ത്വ് ഇതി
11 തഥാ കല്യാണ ശീലസ് ത്വം ബ്രാഹ്മണേഷു മഹാത്മസു
    അനാഗാഃ സർവഭൂതേഷു കർകശത്വം ഉപേയിവാൻ
12 പ്രതിസിദ്ധോ മയാ താത രൈഭ്യാവസഥ ദർശനാത്
    ഗതവാൻ ഏവ തം ക്ഷുദ്രം കാലാന്തകയമോപമം
13 യഃ സ ജാനൻ മഹാതേജാ വൃദ്ധസ്യൈകം മമാത്മജം
    ഗതവാൻ ഏവ കോപസ്യ വശം പരമദുർമതിഃ
14 പുത്രശോകം അനുപ്രാപ്യ ഏഷ രൈഭ്യസ്യ കർമണാ
    ത്യക്ഷ്യാമി ത്വാം ഋതേ പുത്ര പ്രാണാൻ ഇഷ്ടതമാൻ ഭുവി
15 യഥാഹം പുത്രശോകേന ദേഹം ത്യക്ഷ്യാമി കിൽബിസീ
    തഥാ ജ്യേഷ്ഠഃ സുതോ രൈഭ്യം ഹിംസ്യാച് ഛീഘ്രം അനാഗസം
16 സുഖിനോ വൈ നരാ യേഷാം ജാത്യാ പുത്രോ ന വിദ്യതേ
    തേ പുത്രശോകം അപ്രാപ്യ വിചരന്തി യഥാസുഖം
17 യേ തു പുത്രകൃതാച് ഛോകാദ് ഭൃശം വ്യാകുലചേതസഃ
    ശപന്തീഷ്ടാൻ സഖീൻ ആർഥാസ് തേഭ്യഃ പാപതരോ നു കഃ
18 പരാസുശ് ച സുതോ ദൃഷ്ടഃ ശപ്തശ് ചേഷ്ടഃ സഖാ മയാ
    ഈദൃശീം ആപദം കോ നു ദ്വിതീയോ ഽനുഭവിഷ്യതി
19 വിലപ്യൈവം ബഹുവിധം ഭരദ്വാജോ ഽദഹത് സുതം
    സുസമിദ്ധം തതഃ പശ്ചാത് പ്രവിവേശ ഹുതാശനം