മഹാഭാരതം മൂലം/വനപർവം/അധ്യായം136
| ←അധ്യായം135 | മഹാഭാരതം മൂലം/വനപർവം രചന: അധ്യായം136 |
അധ്യായം137→ |
1 [യവ]
പ്രതിഭാസ്യന്തി വൈ വേദാ മമ താതസ്യ ചോഭയോഃ
അതി ചാന്യാൻ ഭവിഷ്യാവോ വരാ ലബ്ധാസ് തഥാ മയാ
2 [ഭരദ്]
ദർപസ് തേ ഭവിതാ താത വരാംൽ ലബ്ധ്വാ യഥേപ്സിതാൻ
സ ദർപപൂർണഃ കൃപണഃ ക്ഷിപ്രം ഏവ വിനശ്യസി
3 അത്രാപ്യ് ഉദാഹരന്തീമാ ഗാഥാ ദേവൈർ ഉദാഹൃതാഃ
ഋഷിർ ആസീത് പുരാ പുത്ര ബാലധിർ നാമ വീര്യവാൻ
4 സപുത്രശോകാദ് ഉദ്വിഗ്നസ് തപസ് തേപേ സുദുശ്ചരം
ഭവേൻ മമ സുതോ ഽമർത്യ ഇതി തം ലബ്ധവാംശ് ച സഃ
5 തസ്യ പ്രസാദോ ദേവൈശ് ച കൃതോ ന ത്വ് അമരൈഃ സമഃ
നാമർത്യോ വിദ്യതേ മർത്യോ നിമിത്തായുർ ഭവിഷ്യതി
6 [ബ്]
യഥേമേ പർവതാഃ ശശ്വത് തിഷ്ഠന്തി സുരസത്തമാഃ
അക്ഷയാസ് തന്നിമിത്തം മേ സുതസ്യായുർ ഭവേദ് ഇതി
7 തസ്യ പുത്രസ് തദാ ജജ്ഞേ മേധാവീ ക്രോധനഃ സദാ
സ തച് ഛ്രുത്വാകരോദ് ദർപം ഋഷീംശ് ചൈവാവമന്യത
8 വികുർവാണോ മുനീനാം തു ചരമാണോ മഹീം ഇമാം
ആസസാദ മഹാവീര്യം ധനുഷാക്ഷം മനീഷിണം
9 തസ്യാപചക്രേ മേധാവീ തം ശശാപ സ വീര്യവാൻ
ഭവ ഭസ്മേതി ചോക്തഃ സ ന ഭസ്മ സമപദ്യത
10 ധനുഷാക്ഷസ് തു തം ദൃഷ്ട്വാ മേധാവിനം അനാമയം
നിമിത്തം അസ്യ മഹിഷൈർ ഭേദയാം ആസ വീര്യവാൻ
11 സ നിമിത്തേ വിനസ്തേ തു മമാര സഹസാ ശിശുഃ
തം മൃതം പുത്രം ആദായ വിലലാപ തതഃ പിതാ
12 ലാലപ്യമാനം തം ദൃഷ്ട്വാ മുനയഃ പുനർ ആർതവത്
ഊചുർ വേദോക്തയാ പൂർവം ഗാഥയാ തൻ നിബോധ മേ
13 ന ദിഷ്ടം അർഥം അത്യേതും ഈശോ മർത്യഃ കഥം ചന
മഹിഷൈർ ഭേദയാം ആസ ധനുഷാക്ഷോ മഹീധരാൻ
14 ഏവം ലബ്ധ്വാ വരാൻ ബാലാ ദർപപൂർണാസ് തരസ്വിനഃ
ക്ഷിപ്രം ഏവ വിനശ്യന്തി യഥാ ന സ്യാത് തഥാ ഭവാൻ
15 ഏഷ രൈഭ്യോ മഹാവീര്യഃ പുത്രൗ ചാസ്യ തഥാ വിഭൗ
തം യഥാ പുത്ര നാഭ്യേഷി തഥാ കുര്യാസ് ത്വ് അതന്ദ്രിതഃ
16 സ ഹി ക്രുദ്ധഃ സമർഥസ് ത്വാം പുത്ര പീഡയിതും രുഷാ
വൈദ്യശ് ചാപി തപസ്വീ ച കോപനശ് ച മഹാൻ ഋഷിഃ
17 [യ്]
ഏവം കരിഷ്യേ മാ താപം താത കാർഷീഃ കഥം ചന
യഥാ ഹി മേ ഭവാൻ മാന്യസ് തഥാ രൈഭ്യഃ പിതാ മമ
18 ഉക്ത്വാ സ പിതരം ശ്ലക്ഷ്ണം യവക്രീർ അകുതോഭയഃ
വിപ്രകുർവന്ന് ഋഷീൻ അന്യാൻ അതുഷ്യത് പരയാ മുദാ