മഹാഭാരതം മൂലം/ഭീഷ്മപർവം/അധ്യായം70

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം70

1 [സ്]
     അഥ രാജൻ മഹാബാഹുഃ സാത്യകിർ യുദ്ധദുർമദഃ
     വികൃഷ്യ ചാപം സമരേ ഭാരസാധനം ഉത്തമം
 2 പ്രാമുഞ്ചത് പുംഖസംയുക്താഞ് ശരാൻ ആശീവിഷോപമാൻ
     പ്രകാശം ലഘുചിത്രം ച ദർശയന്ന് അസ്ത്രലാഘവം
 3 തസ്യ വിക്ഷിപതശ് ചാപം ശരാൻ അന്യാംശ് ച മുഞ്ചതഃ
     ആദദാനസ്യ ഭൂയശ് ച സന്ദധാനസ്യ ചാപരാൻ
 4 ക്ഷിപതശ് ച ശരാൻ അസ്യ രണേ ശത്രൂൻ വിനിഘ്നതഃ
     ദദൃശേ രൂപം അത്യർഥം മേഘസ്യേവ പ്രവർഷതഃ
 5 തം ഉദീര്യന്തം ആലോക്യ രാജാ ദുര്യോധനസ് തതഃ
     രഥാനാം അയുതം തസ്യ പ്രേഷയാം ആസ ഭാരത
 6 താംസ് തു സർവാൻ മഹേഷ്വാസാൻ സാത്യകിഃ സത്യവിക്രമഃ
     ജഘാന പരമേഷ്വാസോ ദിവ്യേനാസ്ത്രേണ വീര്യവാൻ
 7 സ കൃത്വാ ദാരുണം കർമ പ്രഗൃഹീതശരാസനഃ
     ആസസാദ തതോ വീരോ ഭൂരിശ്രവസം ആഹവേ
 8 സ ഹി സന്ദൃശ്യ സേനാം താം യുയുധാനേന പാതിതം
     അഭ്യധാവത സങ്ക്രുദ്ധഃ കുരൂണാം കീർതിവർധനഃ
 9 ഇന്ദ്രായുധസവർണം തത് സ വിസ്ഫാര്യ മഹദ് ധനുഃ
     വ്യസൃജദ് വജ്രസങ്കാശാഞ് ശരാൻ ആശീവിഷോപമാൻ
     സഹസ്രശോ മഹാരാജ ദർശയൻ പാണിലാഘവം
 10 ശരാംസ് താൻ മൃത്യുസംസ്പർശാൻ സാത്യകേസ് തു പദാനുഗാഃ
    ന വിഷേഹുസ് തദാ രാജൻ ദുദ്രുവുസ് തേ സമന്തതഃ
    വിഹായ സമരേ രാജൻ സാത്യകിം യുദ്ധദുർമദം
11 തം ദൃഷ്ട്വാ യുയുധാനസ്യ സുതാ ദശ മഹാബലാഃ
    മഹാരഥാഃ സമാഖ്യാതാശ് ചിത്രവർമായുധ ധ്വജാഃ
12 സമാസാദ്യ മഹേഷ്വാസം ഭൂരിശ്രവസം ആഹവേ
    ഊചുർ സർവേ സുസംരബ്ധാ യൂപകേതും മഹാരണേ
13 ഭോ ഭോ കൗരവ ദായാദ സഹാസ്മാഭിർ മഹാബല
    ഏഹി യുധ്യസ്വ സംഗ്രാമേ സമസ്തൈഃ പൃഥഗ് ഏവ വാ
14 അസ്മാൻ വാ ത്വം പരാജിത്യ യശഃ പ്രാപ്നുഹി സംയുഗേ
    വയം വാ ത്വാം പരാജിത്യ പ്രീതിം ദാസ്യാമഹേ പിതുഃ
15 ഏവം ഉക്തസ് തദാ ശൂരൈസ് താൻ ഉവാച മഹാബലഃ
    വീര്യശ്ലാഘീ നരശ്രേഷ്ഠസ് താൻ ദൃഷ്ട്വാ സമുപസ്ഥിതാൻ
16 സാധ്വ് ഇദം കഥ്യതേ വീരാ യദ് ഏവം മതിർ അദ്യ വഃ
    യുധ്യധ്വം സഹിതാ യത്താ നിഹനിഷ്യാമി വോ രണേ
17 ഏവം ഉക്താ മഹേഷ്വാസാസ് തേ വീരാഃ ക്ഷിപ്രകാരിണഃ
    മഹതാ ശരവർഷേണ അഭ്യവർഷന്ന് അരിന്ദമം
18 അപരാഹ്ണേ മഹാരാജ സംഗ്രാമസ് തുമുലോ ഽഭവത്
    ഏകസ്യ ച ബഹൂനാം ച സമേതാനാം രണാജിരേ
19 തം ഏകം രഥിനാം ശ്രേഷ്ഠ ശരവർഷൈർ അവാകിരൻ
    പ്രാവൃഷീവ മഹാശൈലം സിഷിചുർ ജലദാ നൃപ
20 തൈസ് തു മുക്താഞ് ശരൗഘാംസ് താൻ യമദണ്ഡാശനി പ്രഭാൻ
    അസമ്പ്രാപ്താൻ അസം പ്രാപ്താംശ് ചിച്ഛേദാശു മഹാരഥഃ
21 തത്രാദ്ഭുതം അപശ്യാമ സൗമദത്തേഃ പരാക്രമം
    യദ് ഏകോ ബഹുഭിർ യുദ്ധേ സമസജ്ജദ് അഭീതവത്
22 വിസൃജ്യ ശരവൃഷ്ടിം താം ദശ രാജൻ മഹാരഥാഃ
    പരിവാര്യ മഹാബാഹും നിഹന്തും ഉപചക്രമുഃ
23 സൗമദത്തിസ് തതഃ ക്രുദ്ധസ് തേഷാം ചാപാനി ഭാരത
    ചിച്ഛേദ ദശഭിർ ബാണൈർ നിമേഷേണ മഹാരഥഃ
24 അഥൈഷാം ഛിന്നധനുഷാം ഭല്ലൈഃ സംനതപർവഭിഃ
    ചിച്ഛേദ സമരേ രാജഞ് ശിരാംസി നിശിതൈഃ ശരൈഃ
    തേ ഹതാ ന്യപതൻ ഭൂമൗ വജ്രഭഗ്നാ ഇവ ദ്രുമാഃ
25 താൻ ദൃഷ്ട്വാ നിഹതാൻ വീരാൻ രണേ പുത്രാൻ മഹാബലാൻ
    വാർഷ്ണേയോ വിനദൻ രാജൻ ഭൂരിശ്രവസം അഭ്യയാത്
26 രഥം രഥേന സമരേ പീഡയിത്വാ മഹാബലൗ
    താവ് അന്യോന്യസ്യ സമരേ നിഹത്യ രഥവാജിനഃ
    വിരഥാവ് അഭിവൽഗന്തൗ സമേയാതാം മഹാരഥൗ
27 പ്രഗൃഹീതമഹാഖഡ്ഗൗ തൗ ചർമ വരധാരിണൗ
    ശുശുഭാതേ നരവ്യാഘ്രൗ യുദ്ധായ സമവസ്ഥിതൗ
28 തതഃ സാത്യകിം അഭ്യേത്യ നിസ്ത്രിംശവരധാരിണം
    ഭീമസേനസ് ത്വരൻ രാജൻ രഥം ആരോപയത് തദാ
29 തവാപി തനയോ രാജൻ ഭൂരിശ്രവസം ആഹവേ
    ആരോപയദ് രഥം തൂർണം പശ്യതാം സർവധന്വിനാം
30 തസ്മിംസ് തഥാ വർതമാനേ രണേ ഭീഷ്മം മഹാരഥം
    അയോധയന്ത സംരബ്ധാഃ പാണ്ഡവാ ഭരതർഷഭ
31 ലോഹിതായതി ചാദിത്യേ ത്വരമാണോ ധനഞ്ജയഃ
    പഞ്ചവിംശതിസാഹസ്രാൻ നിജഘാന മഹാരഥാൻ
32 തേ ഹി ദുര്യോധനാദിഷ്ടാസ് തദാ പാർഥ നിബർഹണേ
    സമ്പ്രാപ്യൈവ ഗതാ നാശം ശലഭാ ഇവ പാവകം
33 തതോ മത്സ്യാഃ കേകയാശ് ച ധനുർവേദ വിശാരദാഃ
    പരിവവ്രുസ് തദാ പാർഥം സഹ പുത്രം മഹാരഥം
34 ഏതസ്മിന്ന് ഏവ കാലേ തു സൂര്യേ ഽസ്തം ഉപഗച്ഛതി
    സർവേഷാം ഏവ സൈന്യാനാം പ്രമോഹഃ സമജായത
35 അവഹാരം തതശ് ചക്രേ പിതാ ദേവവ്രതസ് തവ
    സന്ധ്യാകാലേ മഹാരാജ സൈന്യാനാം ശ്രാന്തവാഹനഃ
36 പാണ്ഡവാനാം കുരൂണാം ച പരസ്പരസമാഗമേ
    തേ സേനേ ഭൃശസംവിഗ്നേ യയതുഃ സ്വം നിവേശനം
37 തതഃ സ്വശിബിരം ഗത്വാ ന്യവിശംസ് തത്ര ഭാരത
    പാണ്ഡവാഃ സൃഞ്ജയൈഃ സാർധം കുരവശ് ച യഥാവിധി