മഹാഭാരതം മൂലം/കർണപർവം/അധ്യായം9

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/കർണപർവം
രചന:വ്യാസൻ
അധ്യായം9

1 [സ്]
     തതഃ കർണോ മഹേഷ്വാസഃ പാണ്ഡവാനാം അനീകിനീം
     ജഘാന സമരേ ശൂരഃ ശരൈഃ സംനതപർവഭിഃ
 2 തഥൈവ പാണ്ഡവാ രാജംസ് തവ പുത്രസ്യ വാഹിനീം
     കർണസ്യ പ്രമുഖേ ക്രുദ്ധാ വിനിജഘ്നുർ മഹാരഥാഃ
 3 കർണോ രാജൻ മഹാബാഹുർ ന്യവധീത് പാണ്ഡവീം ചമൂം
     നാരാചൈർ അർകരശ്മ്യ് ആഭൈഃ കർമാര പരിമാർജിതൈഃ
 4 തത്ര ഭാരത കർണേന നാരാചൈസ് താഡിതാ ഗജാഃ
     നേദുഃ സേദുശ് ച മമ്ലുശ് ച ബഭ്രമുശ് ച ദിശോ ദശ
 5 വധ്യമാനേ ബലേ തസ്മിൻ സൂതപുത്രേണ മാരിഷ
     നകുലോ ഽഭ്യദ്രവത് തൂർണം സൂതപുത്രം മഹാരണേ
 6 ഭീമസേനസ് തഥാ ദ്രൗണിം കുർവാണം കർമ ദുഷ്കരം
     വിന്ദാനുവിന്ദൗ കൈകേയൗ സാത്യകിഃ സമവാരയത്
 7 ശ്രുതകർമാണം ആയാന്തം ചിത്രസേനോ മഹീപതിഃ
     പ്രതിവിന്ധ്യം തഥാ ചിത്രശ് ചിത്രകേതന കാർമുകഃ
 8 ദുര്യോധനസ് തു രാജാനം ധർമപുത്രം യുധിഷ്ഠിരം
     സംശപ്തക ഗണാൻ ക്രുദ്ധോ അഭ്യധാവദ് ധനഞ്ജയഃ
 9 ധൃഷ്ടദ്യുമ്നഃ കൃപം ചാഥ തസ്മിൻ വീരവരക്ഷയേ
     ശിഖണ്ഡീ കൃതവർമാണം സമാസാദയദ് അച്യുതം
 10 ശ്രുതകീർതിസ് തഥാ ശല്യം മാദ്രീപുത്രഃ സുതം തവ
    ദുഃശാസനം മഹാരാജ സഹദേവഃ പ്രതാപവാൻ
11 കേകയൗ സാത്യകിം യുദ്ധേ ശരവർഷേണ ഭാസ്വതാ
    സാത്യകിഃ കേകയൗ ചൈവ ഛാദയാം ആസ ഭാരത
12 താവ് ഏനം ഭാരതൗ വീരം ജഘ്നതുർ ഹൃദയേ ഭൃശം
    വിഷാണാഭ്യാം യഥാ നാഗൗ പ്രതിനാഗം മഹാഹവേ
13 ശരസംഭിന്ന വർമാണൗ താവ് ഉഭൗ ഭ്രാതരൗ രണേ
    സാത്യകിം സത്യകർമാണം രാജൻ വിവ്യധതുഃ ശരൈഃ
14 തൗ സാത്യകിർ മഹാരാജ പ്രഹസൻ സർവതോദിശം
    ഛാദയഞ് ശരവർഷേണ വാരയാം ആസ ഭാരത
15 വാര്യമാണോ തതസ് തൗ തു ശൈനേയ ശരവൃഷ്ടിഭിഃ
    ശൈനേയസ്യ രഥം തൂർണം ഛാദയാം ആസതുഃ ശരൈഃ
16 തയോസ് തു ധനുഷീ ചിത്രേ ഛിത്ത്വാ ശൗരിർ മഹാഹവേ
    അഥ തൗ സായകൈസ് തീക്ഷ്ണൈശ് ഛാദയാം ആസ ദുഃസഹൈഃ
17 അഥാന്യേ ധനുഷീ മൃഷ്ടേ പ്രഗൃഹ്യ ച മഹാശരാൻ
    സാത്യകിം പൂരയന്തൗ തൗ ചേരതുർ ലഘു സുഷ്ഠു ച
18 താഭ്യാം മുക്താ മഹാബാണാഃ കങ്കബർഹിണ വാസസഃ
    ദ്യോതയന്തോ ദിശഃ സർവാഃ സമ്പേതുഃ സ്വർണഭൂഷണാഃ
19 ബാണാന്ധ കാരം അഭവത് തയോ രാജൻ മഹാഹവേ
    അന്യോന്യസ്യ ധനുശ് ചൈവ ചിച്ഛിദുസ് തേ മഹാരഥാഃ
20 തതഃ ക്രുദ്ധോ മഹാരാജ സാത്വതോ യുദ്ധദുർമദഃ
    ധനുർ അന്യത് സമാദായ സ ജ്യം കൃത്വാ ച സംയുഗേ
    ക്ഷുരപ്രേണ സുതീക്ഷ്ണേന അനുവിന്ദ ശിരോ ഽഹരത്
21 തച്ഛിരോ ന്യപതദ് ഭൂമൗ കുണ്ഡലോത്പീഡിതം മഹത്
    ശംബരസ്യ ശിരോ യദ്വൻ നിഹതസ്യ മഹാരണേ
    ശോഷയൻ കേകയാൻ സർവാഞ് ജഗാമാശു വസുന്ധരാം
22 തം ദൃഷ്ട്വാ നിഹതം ശൂരം ഭ്രാതാ തസ്യ മഹാരഥഃ
    സ ജ്യം അന്യദ് ധനുഃ കൃത്വാ ശൈനേയം പ്രത്യവാരയത്
23 സ ശക്ത്യാ സാത്യകിം വിദ്ധ്വാ സ്വർണപുംഖൈഃ ശിലാശിതൈഃ
    നനാദ ബലവൻ നാദം തിഷ്ഠ തിഷ്ഠേതി ചാബ്രവീത്
24 സ സാത്യകിം പുനഃ ക്രുദ്ധഃ കേകയാനാം മഹാരഥഃ
    ശരൈർ അഗ്നിശിഖാകാരൈർ ബാഹ്വോർ ഉരസി ചാർദയത്
25 സ ശരൈഃ ക്ഷതസർവാംഗഃ സാത്വതഃ സത്ത്വകോവിദഃ
    രരാജ സമരേ രാജൻ സ പത്ര ഇവ കിംശുകഃ
26 സാത്യകിഃ സമരേ വിദ്ധഃ കേകയേന മഹാത്മനാ
    കേകയം പഞ്ചവിംശത്യാ വിവ്യാധ പ്രഹസന്ന് ഇവ
27 ശതചന്ദ്ര ചിതേ ഗൃഹ്യ ചർമണീ സുഭുജൗ തു തൗ
    വ്യരോചേതാം മഹാരംഗേ നിസ്ത്രിംശവരധാരിണൗ
    യഥാ ദേവാസുരേ യുദ്ധേ ജംഭ ശക്രൗ മഹാബലൗ
28 മണ്ഡലാനി തതസ് തൗ ച വിചരന്തൗ മഹാരണേ
    അന്യോന്യം അസിഭിസ് തൂർണം സമാജഘ്നതുർ ആഹവേ
29 കേകയസ്യ തതശ് ചർമ ദ്വിധാ ചിച്ഛേദ സാത്വതഃ
    സാത്യകേശ് ച തഥൈവാസൗ ചർമ ചിച്ഛേദ പാർഥിവഃ
30 ചർമ ഛിത്ത്വാ തു കൈകേയസ് താരാഗണശതൈർ വൃതം
    ചചാര മണ്ഡലാന്യ് ഏവ ഗതപ്രത്യാഗതാനി ച
31 തം ചരന്തം മഹാരംഗേ നിസ്ത്രിംശവരധാരിണം
    അപഹസ്തേന ചിച്ഛേദ ശൈനേയസ് ത്വരയാന്വിതഃ
32 സ വർമാ കേകയോ രാജൻ ദ്വിധാ ഛിന്നോ മഹാഹവേ
    നിപപാത മഹേഷ്വാസോ വജ്രനുന്ന ഇവാചലഃ
33 തം നിഹത്യ രണേ ശൂരഃ ശൈനേയോ രഥസത്തമഃ
    യുധാമന്യോ രഥം തൂർണം ആരുരോഹ പരന്തപഃ
34 തതോ ഽന്യം രഥം ആസ്ഥായ വിധിവത് കൽപിതം പുനഃ
    കേകയാനാം മഹത് സൈന്യം വ്യധമത് സാത്യകിഃ ശരൈഃ
35 സാ വധ്യമാനാ സമരേ കേകയസ്യ മഹാചമൂഃ
    തം ഉത്സൃജ്യ രഥം ശത്രും പ്രദുദ്രാവ ദിശോ ദശ