മഹാഭാരതം മൂലം/കർണപർവം/അധ്യായം10

മഹാഭാരതം മൂലം/കർണപർവം
രചന:വ്യാസൻ
അധ്യായം10

1 [സ്]
     ശ്രുതകർമാ മഹാരാജ ചിത്രസേനം മഹീപതിം
     ആജഘ്നേ സമരേ ക്രുദ്ധഃ പഞ്ചാശദ്ഭിഃ ശിലീമുഖൈഃ
2 അഭിസാരസ് തു തം രാജാ നവഭിർ നിശിതൈഃ ശരൈഃ
     ശ്രുതകർമാണം ആഹത്യ സൂതം വിവ്യാധ പഞ്ചഭിഃ
3 ശ്രുതകർമാ തതഃ ക്രുദ്ധശ് ചിത്രസേനം ചമൂമുഖേ
     നാരാചേന സുതീക്ഷ്ണേന മർമ ദേശേ സമർദയത്
4 ഏതസ്മിന്ന് അന്തരേ ചൈനം ശ്രുതകീർതിർ മഹായശാഃ
     നവത്യാ ജഗതീ പാലം ഛാദയാം ആസ പത്രിഭിഃ
5 പ്രതിലബ്യ തതഃ സഞ്ജ്ഞാം ചിത്രസേനോ മഹാരഥഃ
     ധനുശ് ചിച്ഛേദ ഭല്ലേന തം ച വിവ്യാധ സപ്തഭിഃ
6 സോ ഽന്യത് കാർമുകം ആദായ വേഗഘ്നം രുക്മഭൂഷണം
     ചിത്രരൂപതരം ചക്രേ ചിത്രസേനം ശരോർമിഭിഃ
7 സ ശരൈശ് ചിത്രിതോ രാജംശ് ചിത്രമാല്യധരോ യുവാ
     യുവേവ സമശോഭത് സ ഗോഷ്ഠീമധ്യേ സ്വലങ്കൃതഃ
8 ശ്രുതകർമാണം അഥ വൈ നാരാചേന സ്തനാന്തരേ
     ബിഭേദ സമരേ ക്രുദ്ധസ് തിഷ്ഠ തിഷ്ഠേതി ചാബ്രവീത്
9 ശ്രുതകർമാപി സമരേ നാരാചേന സമർദിതഃ
     സുസ്രാവ രുധിരം ഭൂരി ഗൗരികാംഭ ഇവാചലഃ
10 തതഃ സ രുധിരാക്താംഗോ രുധിരേണ കൃതച്ഛവിഃ
    രരാജ സമരേ രാജൻ സ പുഷ്പ ഇവ കിംശുകഃ
11 ശ്രുതകർമാ തതോ രാജഞ് ശത്രൂണാം സമഭിദ്രുതഃ
    ശത്രുസംവരണം കൃത്വാ ദ്വിധാ ചിച്ഛേദ കാർമുകം
12 അഥൈനം ഛിന്നധന്വാനം നാരാചാനാം ത്രിഭിഃ ശതൈഃ
    വിവ്യാധ ഭരതശ്രേഷ്ഠ ശ്രുതകർമാ മഹായശാഃ
13 തതോ ഽപരേണ ഭല്ലേന ഭൃശം തീഷ്ക്ണേന സ ത്വരഃ
    ജഹാര സ ശിരസ് ത്രാണം ശിരസ് തസ്യ മഹാത്മനഃ
14 തച്ഛിരോ ന്യപതദ് ഭൂമൗ സുമഹച് ചിത്രവർമണഃ
    യദൃച്ഛയാ യഥാ ചന്ദ്രശ് ച്യുതഃ സ്വർഗാൻ മഹീതലേ
15 രാജാനം നിഹതം ദൃഷ്ട്വാ അഭിസാരം ച മാരിഷ
    അഭ്യദ്രവന്ത വേഗേന ചിത്രസേനസ്യ സൈനികാഃ
16 തതഃ ക്രുദ്ധോ മഹേഷ്വാസസ് തത് സൈന്യം പ്രാദ്രവച് ഛരൈഃ
    അന്തകാലേ യഥാ ക്രുദ്ധഃ സർവഭൂതാനി പ്രേതരാട്
    ദ്രാവയന്ന് ഇഷുഭിസ് തൂർണം ശ്രുതകർമാ വ്യരോചത
17 പ്രതിവിന്ധ്യസ് തതശ് ചിത്രം ഭിത്ത്വാ പഞ്ചഭിർ ആശുഗൈഃ
    സാരഥിം ത്രിഭിർ ആനർച്ഛദ് ധ്വജം ഏകേഷുണാ തതഃ
18 തം ചിത്രോ നവഭിർ ഭല്ലൈർ ബാഹ്വോർ ഉരസി ചാർദയത്
    സ്വർണപുംഖൈഃ ശിലാ ധൗതൈഃ കങ്കബർഹിണ വാജിതൈഃ
19 പ്രതിവിന്ധ്യോ ധനുസ് തസ്യ ഛിത്ത്വാ ഭാരത സായകൈഃ
    പഞ്ചഭിർ നിശിതൈർ ബാണൈർ അഥൈനം സമ്പ്രജഘ്നിവാൻ
20 തതഃ ശക്തിം മഹാരാജ ഹേമദണ്ഡാം ദുരാസദാം
    പ്രാഹിണോത് തവ പുത്രായ ഘോരാം അഗ്നിശിഖാം ഇവ
21 താം ആപതന്തീം സഹസാ ശക്തിം ഉൽകാം ഇവാംബരാത്
    ദ്വിധാ ചിച്ഛേദ സമരേ പ്രതിവിന്ധ്യോ ഹസന്ന് ഇവ
22 സാ പപാത തദാ ഛിന്നാ പ്രതിവിന്ധ്യ ശരൈഃ ശിതൈഃ
    യുഗാന്തേ സർവഭൂതാനി ത്രാസയന്തീ യഥാശനിഃ
23 ശക്തിം താം പ്രഹതാം ദൃഷ്ട്വാ ചിത്രോ ഗൃഹ്യ മഹാഗദാം
    പ്രതിവിന്ധ്യായ ചിക്ഷേപ രുക്മജാലവിഭൂഷിതാം
24 സാ ജഘാന ഹയാംസ് തസ്യ സാരഥിം ച മഹാരണേ
    രഥം പ്രമൃദ്യ വേഗേന ധരണീം അന്വപദ്യത
25 ഏതസ്മിന്ന് ഏവ കാലേ തു രഥാദ് ആപ്ലുത്യ ഭാരത
    ശക്തിം ചിക്ഷേപ ചിത്രായ സ്വർണഘണ്ടാം അലങ്കൃതാം
26 താം ആപതന്തീം ജഗ്രാഹ ചിത്രോ രാജൻ മഹാമനാഃ
    തതസ് താം ഏവ ചിക്ഷേപ പ്രതിവിന്ധ്യായ ഭാരത
27 സമാസാദ്യ രണേ ശൂരം പ്രതിവിന്ധ്യം മഹാപ്രഭാ
    നിർഭിദ്യ ദക്ഷിണം ബാഹും നിപപാത മഹീതലേ
    പതിതാഭാസയച് ചൈവ തം ദേശം അശനിർ യഥാ
28 പ്രതിവിന്ധ്യസ് തതോ രാജംസ് തോമരം ഹേമഭൂഷിതം
    പ്രേഷയാം ആസ സങ്ക്രുദ്ധശ് ചിത്രസ്യ വധകാമ്യയാ
29 സ തസ്യ ദേവാവരണം ഭിത്ത്വാ ഹൃദയം ഏവ ച
    ജഗാമ ധരണീം തൂർണം മഹോരഗ ഇവാശയം
30 സ പപാത തദാ രാജംസ് തോമരേണ സമാഹതഃ
    പ്രസാര്യ വിപുലൗ ബാഹൂ പീനൗ പരിഘസംനിഭൗ
31 ചിത്ര്മ സമ്പ്രേക്ഷ്യ നിഹതം താവകാ രണശോഭിനഃ
    അഭ്യദ്രവന്ത വേഗേന പ്രതിവിന്ധ്യം സമന്തതഃ
32 സൃജന്തോ വിവിധാൻ ബാണാഞ് ശതഘ്നീശ് ച സ കിങ്കിണീഃ
    ത ഏനം ഛാദയാം ആസുഃ സൂര്യം അഭ്രഗണാ ഇവ
33 താൻ അപാസ്യ മഹാബാഹുഃ ശരജാലേന സംയുഗേ
    വ്യദ്രാവയത് തവ ചമൂം വജ്രഹസ്ത ഇവാസുരീം
34 തേ വധ്യമാനാഃ സമരേ താവകാഃ പാണ്ഡവൈർ നൃപ
    വിപ്രകീര്യന്ത സഹസാ വാതനുന്നാ ഘനാ ഇവ
35 വിപ്രദ്രുതേ ബലേ തസ്മിൻ വധ്യമാനേ സമന്തതഃ
    ദ്രൗണിർ ഏകോ ഽഭ്യയാത് തൂർണം ഭീമസേനം മഹാബലം
36 തതഃ സമാഗമോ ഘോരോ ബഭൂവ സഹസാ തയോഃ
    യഥാ ദേവാസുരേ യുദ്ധേ വൃത്രവാസവയോർ അഭൂത്