മഹാഭാരതം മൂലം/കർണപർവം/അധ്യായം3
| ←അധ്യായം2 | മഹാഭാരതം മൂലം/കർണപർവം രചന: അധ്യായം3 |
അധ്യായം4→ |
1 [വൈ]
ഏതച് ഛ്രുത്വാ മഹാരാജ ധൃതരാഷ്ട്രോ ഽംബികാ സുതഃ
ശോകസ്യാന്തം അപശ്യൻ വൈ ഹതം മത്വാ സുയോധനം
വിഹ്വലഃ പതിതോ ഭൂമൗ നഷ്ടചേതാ ഇവ ദ്വിപഃ
2 തസ്മിൻ നിപതിതേ ഭൂമൗ വിഹ്വലേ രാജസത്തമേ
ആർതനാദോ മഹാൻ ആസീത് സ്ത്രീണാം ഭരതസത്തമ
3 സ ശബ്ദഃ പൃഥിവീം സർവാം പൂരയാം ആസ സർവശഃ
ശോകാർണവേ മഹാഘോരേ നിമഗ്നാ ഭരത സ്ത്രിയഃ
4 രാജാനം ച സമാസാദ്യ ഗാന്ധാരീ ഭരതർഷഭ
നിഃസഞ്ജ്ഞാ പതിതാ ഭൂമൗ സർവാണ്യ് അന്തഃപുരാണി ച
5 തതസ് താഃ സഞ്ജയോ രാജൻ സമാശ്വാസയദ് ആതുരാഃ
മുഹ്യമാനാഃ സുബഹുശോ മുഞ്ചന്ത്യോ വാരി നേത്രജം
6 സമാശ്വസ്താഃ സ്ത്രിയസ് താസ് തു വേപമാനാ മുഹുർ മുഹുഃ
കദല്യ ഇവ വാതേന ധൂയമാനാഃ സമന്തതഃ
7 രാജാനം വിദുരശ് ചാപി പ്രജ്ഞാ ചക്ഷുഷം ഈശ്വരം
ആശ്വാസയാം ആസ തദാ സിഞ്ചംസ് തോയേന കൗരവം
8 സ ലബ്ധ്വാ ശനകൈഃ സഞ്ജ്ഞാം താശ് ച ദൃഷ്ട്വാ സ്ത്രിയോ നൃപ
ഉന്മത്ത ഇവ രാജാ സ സ്ഥിതസ് തൂഷ്ണീം വിശാം പതേ
9 തതോ ധ്യാത്വാ ചിരം കാലം നിഃശ്വസംശ് ച പുനഃ പുനഃ
സ്വാൻ പുത്രാൻ ഗർഹയാം ആസ ബഹു മേനേ ച പാണ്ഡവാൻ
10 ഗർഹയിത്വാത്മനോ ബുദ്ധിം ശകുനേഃ സൗബലസ്യ ച
ധ്യാത്വാ ച സുചിരം കാലം വേപമാനോ മുഹുർ മുഹുഃ
11 സംസ്തഭ്യ ച മനോ ഭൂയോ രാജാ ധൈര്യസമന്വിതഃ
പുനർ ഗാവൽഗണിം സൂതം പര്യപൃച്ഛത സഞ്ജയം
12 യത് ത്വയാ കഥിതം വാക്യം ശ്രുതം സഞ്ജയ തൻ മയാ
കച് ചിദ് ദുര്യോധനഃ സൂത ന ഗതോ വൈ യമക്ഷയം
ബ്രൂഹി സഞ്ജയ തത്ത്വേന പുനർ ഉക്താം കഥാം ഇമാം
13 ഏവം ഉക്തോ ഽബ്രവീത് സൂതോ രാജാനം ജനമേജയ
ഹതോ വൈകർതനോ രാജൻ സഹ പുത്രൈർ മഹാരഥൈഃ
ഭ്രാതൃഭിശ് ച മഹേഷ്വാസൈഃ സൂതപുത്രൈസ് തനുത്യജൈഃ
14 ദുഃശാസനശ് ച നിഹതഃ പാണ്ഡവേന യശസ്വിനാ
പീതം ച രുധിരം കോപാദ് ഭീമസേനേന സംയുഗേ