മഹാഭാരതം മൂലം/ഉദ്യോഗപർവം/അധ്യായം46
| ←അധ്യായം45 | മഹാഭാരതം മൂലം/ഉദ്യോഗപർവം രചന: അധ്യായം46 |
അധ്യായം47→ |
1 [വ്]
ഏവം സനത്സുജാതേന വിദുരേണ ച ധീമതാ
സാർധം കഥയതോ രാജ്ഞഃ സാ വ്യതീയായ ശർവരീ
2 തസ്യാം രജന്യാം വ്യുഷ്ടായാം രാജാനഃ സർവ ഏവ തേ
സഭാം ആവിവിശുർ ഹൃഷ്ടാഃ സൂതസ്യോപദിദൃക്ഷയാ
3 ശുശ്രൂഷമാണാഃ പാർഥാനാം വചോ ധർമാർഥസംഹിതം
ധൃതരാഷ്ട്ര മുഖാഃ സർവേ യയൂ രാജസഭാം ശുഭാം
4 സുധാവദാതാം വിസ്തീർണാം കനകാജിര ഭൂഷിതാം
ചന്ദ്രപ്രഭാം സുരുചിരാം സിക്താം പരമവാരിണാ
5 രുചിരൈർ ആസനൈഃ സ്തീർണാം കാഞ്ചനൈർ ദാരവൈർ അപി
അശ്മസാരമയൈർ ദാന്തൈഃ സ്വാസ്തീർണൈഃ സോത്തരച് ഛദൈഃ
6 ഭീഷ്മോ ദ്രോണഃ കൃപഃ ശല്യഃ കൃതവർമാ ജയദ്രഥഃ
അശ്വത്ഥാമാ വികർണശ് ച സോമദത്തശ് ച ബാഹ്ലികഃ
7 വിദുരശ് ച മഹാപ്രാജ്ഞോ യുയുത്സുശ് ച മഹാരഥഃ
സർവേ ച സഹിതാഃ ശൂരാഃ പാർഥിവാ ഭരതർഷഭ
ധൃതരാഷ്ട്രം പുരസ്കൃത്യ വിവിശുസ് താം സഭാം ശുഭാം
8 ദുഃശാസനശ് ചിത്രസേനഃ ശകുനിശ് ചാപി സൗബലഃ
ദുർമുഖോ ദുഃസഹഃ കർണ ഉലൂകോ ഽഥ വിവിംശതിഃ
9 കുരുരാജം പുരസ്കൃത്യ ദുര്യോധനം അമർഷണം
വിവിശുസ് താം സഭാം രാജൻ സുരാഃ ശക്ര സദോ യഥാ
10 ആവിശദ്ഭിസ് തദാ രാജഞ് ശൂരൈഃ പരിഘബാഹുഭിഃ
ശുശുഭേ സാ സഭാ രാജൻ സിംഹൈർ ഇവ ഗിരേർ ഗുഹാ
11 തേ പ്രവിശ്യ മഹേഷ്വാസാഃ സഭാം സമിതിശോഭനാഃ
ആസനാനി മഹാർഹാണി ഭേജിരേ സൂര്യവർചസഃ
12 ആസനസ്ഥേഷു സർവേഷു തേഷു രാജസു ഭാരത
ദ്വാഃസ്ഥോ നിവേദയാം ആസ സൂതപുത്രം ഉപസ്ഥിതം
13 അയം സ രഥ ആയാതി യോ ഽയാസീത് പാണ്ഡവാൻ പ്രതി
ദൂതോ നസ് തൂർണം ആയാതഃ സൈന്ധവൈഃ സാധു വാഹിഭിഃ
14 ഉപയായ തു സ ക്ഷിപ്രം രഥാത് പ്രസ്കന്ദ്യ കുണ്ഡലീ
പ്രവിവേശ സഭാം പൂർണാം മഹീപാലൈർ മഹാത്മഭിഃ
15 [സമ്ജയ]
പ്രാപ്തോ ഽസ്മി പാണ്ഡവാൻ ഗത്വാ തദ് വിജാനീത കൗരവാഃ
യഥാ വയഃ കുരൂൻ സർവാൻ പ്രതിനന്ദന്തി പാണ്ഡവാഃ
16 അഭിവാദയന്തി വൃദ്ധാംശ് ച വയസ്യാംശ് ച വയസ്യവത്
യൂനശ് ചാഭ്യവദൻ പാർഥാഃ പ്രതിപൂജ്യ യഥാ വയഃ
17 യഥാഹം ധൃതരാഷ്ട്രേണ ശിഷ്ടഃ പൂർവം ഇതോ ഗതഃ
അബ്രുവം പാണ്ഡവാൻ ഗത്വാ തൻ നിബോധത പാർഥിവാഃ