മഹാഭാരതം മൂലം/ആശ്രമവാസികപർവം/അധ്യായം18
| ←അധ്യായം17 | മഹാഭാരതം മൂലം/ആശ്രമവാസികപർവം രചന: അധ്യായം18 |
അധ്യായം19→ |
1 [അർജ്]
ഭീമ ജ്യേഷ്ഠോ ഗുരുർ മേ ത്വം നാതോ ഽന്യദ് വക്തും ഉത്സഹേ
ധൃതരാഷ്ട്രോ ഹി രാജർഷിഃ സർവഥാ മാനം അർഹതി
2 ന സ്മരന്ത്യ് അപരാദ്ധാനി സ്മരന്തി സുകൃതാനി ച
അസംഭിന്നാർഥ മര്യാദാഃ സാധവഃ പുരുഷോത്തമാഃ
3 ഇദം മദ്വചനാത് ക്ഷത്തഃ കൗരവം ബ്രൂഹി പാർഥിവം
യാവദ് ഇച്ഛതി പുത്രാണാം ദാതും താവദ് ദദാമ്യ് അഹം
4 ഭീഷ്മാദീനാം ച സർവേഷാം സുഹൃദാം ഉപകാരിണാം
മമ കോശാദ് ഇതി വിഭോ മാ ഭൂദ് ഭീമഃ സുദുർമനാഃ
5 [വൈ]
ഇത്യ് ഉക്തേ ധർമരാജസ് തം അർജുനം പ്രത്യപൂജയത്
ഭീമസേനഃ കടാക്ഷേണ വീക്ഷാം ചക്രേ ധനഞ്ജയം
6 തതഃ സ വിദുരം ധീമാൻ വാക്യം ആഹ യുധിഷ്ഠിരഃ
ന ഭീമസേനേ കോപം സ നൃപതിഃ കർതും അർഹതി
7 പരിക്ലിഷ്ടോ ഹി ഭീമോ ഽയം ഹിമവൃഷ്ട്യ് ആതപാദിഭിഃ
ദുഃഖൈർ ബഹുവിധൈർ ധീമാൻ അരണ്യേ വിദിതം തവ
8 കിം തു മദ്വചനാദ് ബ്രൂഹി രാജാനം ഭരതർഷഭം
യദ് യദ് ഇച്ഛസി യാവച് ച ഗൃഹ്യതാം മദ്ഗൃഹാദ് ഇതി
9 യൻ മാത്സര്യം അയം ഭീമഃ കരോതി ഭൃശദുഃഖിതഃ
ന തൻ മനസി കർതവ്യം ഇതി വാച്യഃ സ പാർഥിവഃ
10 യൻ മമാസ്തി ധനം കിം ചിദ് അർജുനസ്യ ച വേശ്മനി
തസ്യ സ്വാമീ മഹാരാജ ഇതി വാച്യഃ സ പാർഥിവഃ
11 ദദാതു രാജാ വിപ്രേഭ്യോ യഥേഷ്ടം ക്രിയതാം വ്യയഃ
പുത്രാണാം സുഹൃദാം ചൈവ ഗച്ഛത്വ് ആനൃണ്യം അദ്യ സഃ
12 ഇദം ചാപി ശരീരം മേ തവായത്തം ജനാധിപ
ധനാനി ചേതി വിദ്ധി ത്വം ക്ഷത്തർ നാസ്ത്യ് അത്ര സംശയഃ