മഹാഭാരതം മൂലം/ആദിപർവം/അധ്യായം52

മഹാഭാരതം മൂലം/ആദിപർവം
രചന:വ്യാസൻ
അധ്യായം 52

1 [ഷ്]
     യേ സർപാഃ സർപസത്രേ ഽസ്മിൻ പതിതാ ഹവ്യവാഹനേ
     തേഷാം നാമാനി സർവേഷാം ശ്രോതും ഇച്ഛാമി സൂതജ
2 [സ്]
     സഹസ്രാണി ബഹൂന്യ് അസ്മിൻ പ്രയുതാന്യ് അർബുദാനി ച
     ന ശക്യം പരിസംഖ്യാതും ബഹുത്വാദ് വേദവിത്തമ
3 യഥാ സ്മൃതിതു നാമാനി പന്നഗാനാം നിബോധ മേ
     ഉച്യമാനാനി മുഖ്യാനാം ഹുതാനാം ജാതവേദസി
4 വാസുകേഃ കുലജാംസ് താവത് പ്രധാന്യേന നിബോധ മേ
     നീലരക്താൻ സിതാൻ ഘോരാൻ മഹാകായാൻ വിഷോൽബണാൻ
5 കോടികോ മാനസഃ പൂർണഃ സഹഃ പൗലോ ഹലീസകഃ
     പിച്ഛിലഃ കോണപശ് ചക്രഃ കോണ വേഗഃ പ്രകാലനഃ
6 ഹിരണ്യവാഹഃ ശരണഃ കക്ഷകഃ കാലദന്തകഃ
     ഏതേ വാസുകിജാ നാഗാഃ പ്രവിഷ്ടാ ഹവ്യവാഹനം
7 തക്ഷകസ്യ കുലേ ജാതാൻ പ്രവക്ഷ്യാമി നിബോധ താൻ
     പുച്ഛണ്ഡകോ മണ്ഡലകഃ പിണ്ഡ ഭേത്താ രഭേണകഃ
8 ഉച്ഛിഖഃ സുരസോ ദ്രംഗോ ബലഹേഡോ വിരോഹണഃ
     ശിലീ ശല കരോ മൂകഃ സുകുമാരഃ പ്രവേപനഃ
9 മുദ്ഗരഃ ശശരോമാ ച സുമനാ വേഗവാഹനഃ
     ഏതേ തക്ഷകജാ നാഗാഃ പ്രവിഷ്ടാ ഹവ്യവാഹനം
10 പാരാവതഃ പാരിയാത്രഃ പാണ്ഡരോ ഹരിണഃ കൃശഃ
    വിഹംഗഃ ശരഭോ മോദഃ പ്രമോദഃ സംഹതാംഗദഃ
11 ഐരാവത കുലാദ് ഏതേ പ്രൈവിഷ്ടാ ഹവ്യവാഹനം
    കൗരവ്യ കുലജാൻ നാഗാഞ് ശൃണു മേ ദ്വിജസത്തമ
12 ഐണ്ഡിലഃ കുണ്ഡലോ മുണ്ഡോ വേണി സ്കന്ധഃ കുമാരകഃ
    ബാഹുകഃ ശൃംഗവേഗശ് ച ധൂർതകഃ പാതപാതരൗ
13 ധൃതരാഷ്ട്ര കുലേ ജാതാഞ് ശൃണു നാഗാൻ യഥാതഥം
    കീർത്യമാനാൻ മയാ ബ്രഹ്മൻ വാതവേഗാൻ വിഷോൽബണാൻ
14 ശങ്കുകർണഃ പിംഗലകഃ കുഠാര മുഖമേചകൗ
    പൂർണാംഗദഃ പൂർണമുഖഃ പ്രഹസഃ ശകുനിർ ഹരിഃ
15 ആമാഹഠഃ കോമഠകഃ ശ്വസനോ മാനവോ വടഃ
    ഭൈരവോ മുണ്ഡവേദാംഗഃ പിശംഗശ് ചോദ്ര പാരഗഃ
16 ഋഷഭോ വേഗവാൻ നാമ പിണ്ഡാരക മഹാഹനൂ
    രക്താംഗഃ സർവസാരംഗഃ സമൃദ്ധഃ പാട രാക്ഷസൗ
17 വരാഹകോ വാരണകഃ സുമിത്രശ് ചിത്രവേദകഃ
    പരാശരസ് തരുണകോ മണിസ്കന്ധസ് തഥാരുണിഃ
18 ഇതി നാഗാ മയാ ബ്രഹ്മൻ കീർതിതാഃ കീർതിവർധനാഃ
    പ്രധാന്യേന ബഹുത്വാത് തു ന സർവേ പരികീർതിതാഃ
19 ഏതേഷാം പുത്രപൗത്രാസ് തു പ്രസവസ്യ ച സന്തതിഃ
    ന ശക്യാഃ പരിസംഖ്യാതും യേ ദീപ്തം പാവകം ഗതാഃ
20 സപ്ത ശീർഷാ ദ്വിശീർഷാശ് ച പഞ്ചശീർഷാസ് തഥാപരേ
    കാലാനലവിഷാ ഘോരാ ഹുതാഃ ശതസഹസ്രശഃ
21 മഹാകായാ മഹാവീര്യാഃ ശൈലശൃംഗസമുച്ഛ്രയാഃ
    യോജനായാമ വിസ്താരാ ദ്വിയോജനസമായതാഃ
22 കാമരൂപാഃ കാമഗമാ ദീപ്താനലവിഷോൽബണാഃ
    ദഗ്ധാസ് തത്ര മഹാസത്രേ ബ്രഹ്മദണ്ഡനിപീഡിതാഃ