മഹാഭാരതം മൂലം/ആദിപർവം/അധ്യായം4
| ←അധ്യായം3 | മഹാഭാരതം മൂലം/ആദിപർവം രചന: അധ്യായം4 |
അധ്യായം5→ |
1 ലോമഹർഷണ പുത്ര ഉഗ്രശ്രവാഃ സൂതഃ പൗരാണികോ നൈമിഷാരണ്യേ ശൗനകസ്യ കുലപതേർ ദ്വാദശ വാർഷികേ സത്രേ ഋഷീൻ അഭ്യാഗതാൻ ഉപതസ്ഥേ
2 പൗരാണികഃ പുരാണേ കൃതശ്രമഃ സ താൻ കൃതാഞ്ജലിർ ഉവാച
കിം ഭവന്തഃ ശ്രോതും ഇച്ഛന്തി
കിം അഹം ബ്രുവാണീതി
3 തം ഋഷയ ഊചുഃ
പരമം ലോമഹർഷണേ പ്രക്ഷ്യാമസ് ത്വാം വക്ഷ്യസി ച നഃ ശുശ്രൂഷതാം കഥാ യോഗം
തദ് ഭഗവാംസ് തു താവച് ഛൗനകോ ഽഗ്നിശരണം അധ്യാസ്തേ
4 യോ ഽസൗ ദിവ്യാഃ കഥാ വേദ ദേവതാസുരസങ്കഥാഃ
മനുഷ്യോരഗഗന്ധർവകഥാ വേദ സ സർവശഃ
5 സ ചാപ്യ് അസ്മിൻ മഖേ സൗതേ വിദ്വാൻ കുലപതിർ ദ്വിജഃ
ദക്ഷോ ധൃതവ്രതോ ധീമാഞ് ശാസ്ത്രേ ചാരണ്യകേ ഗുരുഃ
6 സത്യവാദീ ശമ പരസ് തപസ്വീ നിയതവ്രതഃ
സർവേഷാം ഏവ നോ മാന്യഃ സ താവത് പ്രതിപാല്യതാം
7 തസ്മിന്ന് അധ്യാസതി ഗുരാവ് ആസനം പരമാർചിതം
തതോ വക്ഷ്യസി യത് ത്വാം സ പ്രക്ഷ്യതി ദ്വിജസത്തമഃ
8 [സൂത]
ഏവം അസ്തു ഗുരൗ തസ്മിന്ന് ഉപവിഷ്ടേ മഹാത്മനി
തേന പൃഷ്ടഃ കഥാഃ പുണ്യാ വക്ഷ്യാമി വിവിധാശ്രയാഃ
9 സോ ഽഥ വിപ്രർഷഭഃ കാര്യം കൃത്വാ സർവം യഥാക്രമം
ദേവാൻ വാഗ്ഭിഃ പിതൄൻ അദ്ഭിസ് തർപയിത്വാജഗാമ ഹ
10 യത്ര ബ്രഹ്മർഷയഃ സിദ്ധാസ് ത ആസീനാ യതവ്രതാഃ
യജ്ഞായതനം ആശ്രിത്യ സൂതപുത്ര പുരഃസരാഃ
11 ഋത്വിക്ഷ്വ് അഥ സദസ്യേഷു സ വൈ ഗൃഹപതിസ് തതഃ
ഉപവിഷ്ടേഷൂപവിഷ്ടഃ ശൗനകോ ഽഥാബ്രവീദ് ഇദം