മഹാഭാരതം മൂലം/ആദിപർവം/അധ്യായം29
| ←അധ്യായം28 | മഹാഭാരതം മൂലം/ആദിപർവം രചന: അധ്യായം 29 |
അധ്യായം30→ |
1 [സ്]
ജാംബൂനദമയോ ഭൂത്വാ മരീചിവികചോജ്ജ്വലഃ
പ്രവിവേശ ബലാത് പക്ഷീ വാരിവേഗ ഇവാർണവം
2 സചക്രം ക്ഷുര പര്യന്തം അപശ്യദ് അമൃതാന്തികേ
പരിഭ്രമന്തം അനിശം തീക്ഷ്ണധാരം അയസ്മയം
3 ജ്വലനാർകപ്രഭം ഘോരം ഛേദനം സോമഹാരിണാം
ഘോരരൂപം തദ് അത്യർഥം യന്ത്രം ദേവൈഃ സുനിർമിതം
4 തസ്യാന്തരം സ ദൃഷ്ട്വൈവ പര്യവർതത ഖേചരഃ
അരാന്തരേണാഭ്യപതത് സങ്ക്ഷിപ്യാംഗം ക്ഷണേന ഹ
5 അധശ് ചക്രസ്യ ചൈവാത്ര ദീപ്താനലസമദ്യുതീ
വിദ്യുജ്ജിഹ്വൗ മഹാഘോരൗ ദീപ്താസ്യൗ ദീപ്തലോചനൗ
6 ചക്ഷുർ വിഷൗ മഹാവീര്യൗ നിത്യക്രുദ്ധൗ തരസ്വിനൗ
രക്ഷാർഥം ഏവാമൃതസ്യ ദദർശ ഭുജഗോത്തമൗ
7 സദാ സംരബ്ധ നയനൗ സദാ ചാനിമിഷേക്ഷണൗ
തയോർ ഏകോ ഽപി യം പശ്യേത് സ തൂർണം ഭസ്മസാദ് ഭവേത്
8 തയോശ് ചക്ഷൂംഷി രജസാ സുപർണസ് തൂർണം ആവൃണോത്
അദൃഷ്ടരൂപസ് തൗ ചാപി സർവതഃ പര്യകാലയത്
9 തയോർ അംഗേ സമാക്രമ്യ വൈനതേയോ ഽന്തരിക്ഷഗഃ
ആഛിനത് തരസാ മധ്യേ സോമം അഭ്യദ്രവത് തതഃ
10 സമുത്പാട്യാമൃതം തത് തു വൈനതേയസ് തതോ ബലീ
ഉത്പപാത ജവേനൈവ യന്ത്രം ഉന്മഥ്യ വീര്യവാൻ
11 അപീത്വൈവാമൃതം പക്ഷീ പരിഗൃഹ്യാശു വീര്യവാൻ
അഗച്ഛദ് അപരിശ്രാന്ത ആവാര്യാർക പ്രഭാം ഖഗഃ
12 വിഷ്ണുനാ തു തദാകാശേ വൈനതേയഃ സമേയിവാൻ
തസ്യ നാരായണസ് തുഷ്ടസ് തേനാലൗല്യേന കർമണാ
13 തം ഉവാചാവ്യയോ ദേവോ വരദോ ഽസ്മീതി ഖേചരം
സ വവ്രേ തവ തിഷ്ഠേയം ഉപരീത്യ് അന്തരിക്ഷഗഃ
14 ഉവാച ചൈനം ഭൂയോ ഽപി നാരായണം ഇദം വചഃ
അജരശ് ചാമരശ് ച സ്യാം അമൃതേന വിനാപ്യ് അഹം
15 പ്രതിഗൃഹ്യ വരൗ തൗ ച ഗരുഡോ വിഷ്ണും അബ്രവീത്
ഭവതേ ഽപി വരം ദദ്മി വൃണീതാം ഭഗവാൻ അപി
16 തം വവ്രേ വാഹനം കൃഷ്ണോ ഗരുത്മന്തം മഹാബലം
ധ്വജം ച ചക്രേ ഭഗവാൻ ഉപരി സ്ഥാസ്യസീതി തം
17 അനുപത്യ ഖഗം ത്വ് ഇന്ദ്രോ വജ്രേണാംഗേ ഽഭ്യതാഡയത്
വിഹംഗമം സുരാമിത്രം ഹരന്തം അമൃതം ബലാത്
18 തം ഉവാചേന്ദ്രം ആക്രന്ദേ ഗരുഡഃ പതതാം വരഃ
പ്രഹസഞ് ശ്ലക്ഷ്ണയാ വാചാ തഥാ വജ്രസമാഹതഃ
19 ഋഷേർ മാനം കരിഷ്യാമി വജ്രം യസ്യാസ്ഥി സംഭവം
വജ്രസ്യ ച കരിഷ്യാമി തവ ചൈവ ശതക്രതോ
20 ഏഷ പത്രം ത്യജാമ്യ് ഏകം യസ്യാന്തം നോപലപ്സ്യസേ
ന ഹി വജ്രനിപാതേന രുജാ മേ ഽസ്തി കദാ ചന
21 തത്ര തം സർവഭൂതാനി വിസ്മിതാന്യ് അബ്രുവംസ് തദാ
സുരൂപം പത്രം ആലക്ഷ്യ സുപർണോ ഽയം ഭവത്വ് ഇതി
22 ദൃഷ്ട്വാ തദ് അദ്ഭുതം ചാപി സഹസ്രാക്ഷഃ പുരന്ദരഃ
ഖഗോ മഹദ് ഇദം ഭൂതം ഇതി മത്വാഭ്യഭാഷത
23 ബലം വിജ്ഞാതും ഇച്ഛാമി യത് തേ പരം അനുത്തമം
സഖ്യം ചാനന്തം ഇച്ഛാമി ത്വയാ സഹ ഖഗോത്തമ