മഹാഭാരതം മൂലം/ആദിപർവം/അധ്യായം28

മഹാഭാരതം മൂലം/ആദിപർവം
രചന:വ്യാസൻ
അധ്യായം 28

1 [സ്]
     തതസ് തമിൻ ദ്വിജശ്രേഷ്ഠ സമുദീർണേ തഥാവിധേ
     ഗരുത്മാൻ പക്ഷിരാട് തൂർണം സമ്പ്രാപ്തോ വിബുധാൻ പ്രതി
2 തം ദൃഷ്ട്വാതിബലം ചൈവ പ്രാകമ്പന്ത സമന്തതഃ
     പരസ്പരം ച പ്രത്യഘ്നൻ സർവപ്രഹരണാന്യ് അപി
3 തത്ര ചാസീദ് അമേയാത്മാ വിദ്യുദ് അഗ്നിസമപ്രഭഃ
     ഭൗവനഃ സുമഹാവീര്യഃ സോമസ്യ പരിരക്ഷിതാ
4 സ തേന പതഗേന്ദ്രേണ പക്ഷതുണ്ഡ നഖൈഃ ക്ഷതഃ
     മുഹൂർതം അതുലം യുദ്ധം കൃത്വാ വിനിഹതോ യുധി
5 രജശ് ചോദ്ധൂയ സുമഹത് പക്ഷവാതേന ഖേചരഃ
     കൃത്വാ ലോകാൻ നിരാലോകാംസ് തേന ദേവാൻ അവാകിരത്
6 തേനാവകീർണാ രജസാ ദേവാ മോഹം ഉപാഗമൻ
     ന ചൈനം ദദൃശുശ് ഛന്നാ രജസാമൃത രക്ഷിണഃ
7 ഏവം സംലോഡയാം ആസ ഗരുഡസ് ത്രിദിവാലയം
     പക്ഷതുണ്ഡ പ്രഹാരൈശ് ച ദേവാൻ സ വിദദാര ഹ
8 തതോ ദേവഃ സഹസ്രാക്ഷസ് തൂർണം വായും അചോദയത്
     വിക്ഷിപേമാം രജോ വൃഷ്ടിം തവൈതത് കർമ മാരുത
9 അഥ വായുർ അപോവാഹ തദ് രജസ് തരസാ ബലീ
     തതോ വിതിമിരേ ജാതേ ദേവാഃ ശകുനിം ആർദയൻ
10 നനാദ ചോച്ചൈർ ബലവാൻ മഹാമേഘരവഃ ഖഗഃ
    വധ്യമാനഃ സുരഗണൈഃ സർവഭൂതാനി ഭീഷയൻ
    ഉത്പപാത മഹാവീര്യഃ പക്ഷിരാട് പരവീരഹാ
11 തം ഉത്പത്യാന്തരിക്ഷസ്ഥം ദേവാനാം ഉപരി സ്ഥിതം
    വർമിണോ വിബുധാഃ സർവേ നാനാശസ്ത്രൈർ അവാകിരൻ
12 പട്ടിശൈഃ പരിഘൈഃ ശൂലൈർ ഗദാഭിശ് ച സവാസവാഃ
    ക്ഷുരാന്തൈർ ജ്വലിതൈശ് ചാപി ചക്രൈർ ആദിത്യരൂപിഭിഃ
13 നാനാശസ്ത്രവിസർഗൈശ് ച വധ്യമാനഃ സമന്തതഃ
    കുർവൻ സുതുമുലം യുദ്ധം പക്ഷിരാൺ ന വ്യകമ്പത
14 വിനർദന്ന് ഇവ ചാകാശേ വൈനതേയഃ പ്രതാപവാൻ
    പക്ഷാഭ്യാം ഉരസാ ചൈവ സമന്താദ് വ്യാക്ഷിപത് സുരാൻ
15 തേ വിക്ഷിപ്താസ് തതോ ദേവാഃ പ്രജഗ്മുർ ഗരുഡാർദിതാഃ
    നഖതുണ്ഡ ക്ഷതാശ് ചൈവ സുസ്രുവുഃ ശോണിതം ബഹു
16 സാധ്യാഃ പ്രാചീം സഗന്ധർവാ വസവോ ദക്ഷിണാം ദിശം
    പ്രജഗ്മുഃ സഹിതാ രുദ്രൈഃ പതഗേന്ദ്ര പ്രധർഷിതാഃ
17 ദിശം പ്രതീചീം ആദിത്യാ നാസത്യാ ഉത്തരാം ദിശം
    മുഹുർ മുഹുഃ പ്രേക്ഷമാണാ യുധ്യമാനാ മഹൗജസം
18 അശ്വക്രന്ദേന വീരേണ രേണുകേന ച പക്ഷിണാ
    ക്രഥനേന ച ശൂരേണ തപനേന ച ഖേചരഃ
19 ഉലൂകശ് വസനാഭ്യാം ച നിമേഷേണ ച പക്ഷിണാ
    പ്രരുജേന ച സംയുദ്ധം ചകാര പ്രലിഹേന ച
20 താൻ പക്ഷനഖതുണ്ഡാഗ്രൈർ അഭിനദ് വിനതാസുതഃ
    യുഗാന്തകാലേ സങ്ക്രുദ്ധഃ പിനാകീവ മഹാബലഃ
21 മഹാവീര്യാ മഹോത്സാഹാസ് തേന തേ ബഹുധാ ക്ഷതാഃ
    രേജുർ അഭ്രഘനപ്രഖ്യാ രുധിരൗഘപ്രവർഷിണഃ
22 താൻ കൃത്വാ പതഗശ്രേഷ്ഠഃ സർവാൻ ഉത്ക്രാന്ത ജീവിതാൻ
    അതിക്രാന്തോ ഽമൃതസ്യാർഥേ സർവതോ ഽഗ്നിം അപശ്യത
23 ആവൃണ്വാനം മഹാജ്വാലം അർചിർഭിഃ സർവതോ ഽംബരം
    ദഹന്തം ഇവ തീക്ഷ്ണാംശും ഘോരം വായുസമീരിതം
24 തതോ നവത്യാ നവതീർ മുഖാനാം; കൃത്വാ തരസ്വീ ഗരുഡോ മഹാത്മാ
    നദീഃ സമാപീയ മുഖൈസ് തതസ് തൈഃ; സുശീഘ്രം ആഗമ്യ പുനർ ജവേന
25 ജ്വലന്തം അഗ്നിം തം അമിത്രതാപനഃ; സമാസ്തരത് പത്രരഥോ നദീഭിഃ
    തതഃ പ്രചക്രേ വപുർ അന്യദ് അൽപം; പ്രവേഷ്ടു കാമോ ഽഗ്നിം അഭിപ്രശാമ്യ