മഹാഭാരതം മൂലം/ആദിപർവം/അധ്യായം203

മഹാഭാരതം മൂലം/ആദിപർവം
രചന:വ്യാസൻ
അധ്യായം 203

1 [നാരദ]
     തതോ ദേവർഷയഃ സർവേ സിദ്ധാശ് ച പരമർഷയഃ
     ജഗ്മുസ് തദാ പരാം ആർതിം ദൃഷ്ട്വാ കത് കദനം മഹത്
2 തേ ഽഭിജഗ്മുർ ജിതക്രോധാ ജിതാത്മാനോ ജിതേന്ദ്രിയാഃ
     പിതാമഹസ്യ ഭവനം ജഗതഃ കൃപയാ തദാ
3 തതോ ദദൃശുർ ആസീനം സഹ ദേവൈഃ പിതാമഹം
     സിദ്ധൈർ ബ്രഹ്മർഷിഭിശ് ചൈവ സമന്താത് പരിവാരിതം
4 തത്ര ദേവോ മഹാദേവസ് തത്രാഗ്നിർ വായുനാ സഹ
     ചന്ദ്രാദിത്യൗ ച ധർമശ് ച പരമേഷ്ഠീ തഥാ ബുധഃ
5 വൈഖാനസാ വാലഖില്യാ വാനപ്രസ്ഥാ മരീചിപാഃ
     അജാശ് ചൈവാവിമൂഢാശ് ച തേജോ ഗർഭാസ് തപസ്വിനഃ
     ഋഷയഃ സർവ ഏവൈതേ പിതാമഹം ഉപാസതേ
6 തതോ ഽഭിഗമ്യ സഹിതാഃ സർവ ഏവ മഹർഷയഃ
     സുന്ദോപസുന്ദയോഃ കർമ സർവം ഏവ ശശംസിരേ
7 യഥാ കൃതം യഥാ ചൈവ കൃതം യേന ക്രമേണ ച
     ന്യവേദയംസ് തതഃ സർവം അഖിലേന പിതാമഹേ
8 തതോ ദേവഗണാഃ സർവേ തേ ചൈവ പരമർഷയഃ
     തം ഏവാർഥം പുരസ്കൃത്യ പിതാമഹം അചോദയൻ
9 തതഃ പിതാമഹഃ ശ്രുത്വാ സർവേഷാം തദ് വചസ് തദാ
     മുഹൂർതം ഇവ സഞ്ചിന്ത്യ കർതവ്യസ്യ വിനിശ്ചയം
10 തയോർ വധം സമുദ്ദിശ്യ വിശ്വകർമാണം ആഹ്വയത്
    ദൃഷ്ട്വാ ച വിശ്വകർമാണം വ്യാദിദേശ പിതാമഹഃ
    സൃജ്യതാം പ്രാഥനീയേഹ പ്രമദേതി മഹാതപാഃ
11 പിതാമഹം നമസ്കൃത്യ തദ് വാക്യം അഭിനന്ദ്യ ച
    നിർമമേ യോഷിതം ദിവ്യാം ചിന്തയിത്വാ പ്രയത്നതഃ
12 ത്രിഷു ലോകേഷു യത് കിം ചിദ് ഭൂതം സ്ഥാവരജംഗമം
    സമാനയദ് ദർശനീയം തത് തദ് യത്നാത് തതസ് തതഃ
13 കോടിശശ് ചാപി രത്നാനി തസ്യാ ഗാത്രേ ന്യവേശയത്
    താം രത്നസംഘാത മയീം അസൃജദ് ദേവരൂപിണീം
14 സാ പ്രയത്നേന മഹതാ നിർമിതാ വിശ്വകർമണാ
    ത്രിഷു ലോകേഷു നാരീണാം രൂപേണാപ്രതിമാഭവത്
15 ന തസ്യാഃ സൂക്ഷ്മം അപ്യ് അസ്തി യദ് ഗാത്രേ രൂപസമ്പദാ
    ന യുക്തം യത്ര വാ ദൃഷ്ടിർ ന സജ്ജതി നിരീക്ഷതാം
16 സാ വിഗ്രഹവതീവ ശ്രീഃ കാന്ത രൂപാ വപുഷ്മതീ
    ജഹാര സർവഭൂതാനാം ചക്ഷൂംഷി ച മനാംസി ച
17 തിലം തിലം സമാനീയ രത്നാനാം യദ് വിനിർമിതാ
    തിലോത്തമേത്യ് അതസ് തസ്യാ നാമ ചക്രേ പിതാമഹഃ
18 [പിതാമഹ]
    ഗച്ഛ സുന്ദോപസുന്ദാഭ്യാം അസുരാഭ്യാം തിലോത്തമേ
    പ്രാർഥനീയേന രൂപേണ കുരു ഭദ്രേ പ്രലോഭനം
19 ത്വത്കൃതേ ദർശനാദ് ഏവ രൂപസമ്പത് കൃതേന വൈ
    വിരോധഃ സ്യാദ് യഥാ താഭ്യാം അന്യോന്യേന തഥാ കുരു
20 [നാരദ]
    സാ തഥേതി പ്രതിജ്ഞായ നമസ്കൃത്യ പിതാമഹം
    ചകാര മണ്ഡലം തത്ര വിബുധാനാം പ്രദക്ഷിണം
21 പ്രാങ്മുഖോ ഭഗവാൻ ആസ്തേ ദക്ഷിണേന മഹേശ്വരഃ
22 ദേവാശ് ചൈവോത്തരേണാസൻ സർവതസ് ത്വ് ഋഷയോ ഽഭവൻ
    കുർവന്ത്യാ തു തയാ തത്ര മണ്ഡലം തത് പ്രദക്ഷിണം
    ഇന്ദ്രഃ സ്ഥാണുശ് ച ഭഗവാൻ ധൈര്യേണ പ്രത്യവസ്ഥിതൗ
23 ദ്രഷ്ടുകാമസ്യ ചാത്യർഥം ഗതായാഃ പാർശ്വതസ് തദാ
    അന്യദ് അഞ്ചിതപക്ഷ്മാന്തം ദക്ഷിണം നിഃസൃതം മുഖം
24 പൃഷ്ഠതഃ പരിവർതന്ത്യാഃ പശ്ചിമം നിഃസൃതം മുഖം
    ഗതായാശ് ചോത്തരം പാർശ്വം ഉത്തരം നിഃസൃതം മുഖം
25 മഹേന്ദ്രസ്യാപി നേത്രാണാം പാർശ്വതഃ പൃഷ്ഠതോ ഽഗ്രതഃ
    രക്താന്താനാം വിശാലാനാം സഹസ്രം സർവതോ ഽഭവത്
26 ഏവം ചതുർമുഖഃ സ്ഥാണുർ മഹാദേവോ ഽഭവത് പുരാ
    തഥാ സഹസ്രനേത്രശ് ച ബഭൂവ ബലസൂദനഃ
27 തഥാ ദേവ നികായാനാം ഋഷീണാം ചൈവ സർവശഃ
    മുഖാന്യ് അഭിപ്രവർതന്തേ യേന യാതി തിലോത്തമാ
28 തസ്യാ ഗാത്രേ നിപതിതാ തേഷാം ദൃഷ്ടിർ മഹാത്മനാം
    സർവേഷാം ഏവ ഭൂയിഷ്ഠം ഋതേ ദേവം പിതാമഹം
29 ഗച്ഛന്ത്യാസ് തു തദാ ദേവാഃ സർവേ ച പരമർഷയഃ
    കൃതം ഇത്യ് ഏവ തത് കാര്യം മേനിരേ രൂപസമ്പദാ
30 തിലോത്തമായാം തു തദാ ഗതായാം ലോകഭാവനഃ
    സർവാൻ വിസർജയാം ആസ ദേവാൻ ഋഷിഗണാംശ് ച താൻ