ഈ താളിന്റെ സാധുത തെളിയിക്കപ്പെട്ടതാണ്
ആ മട്ടിൽ മാളികയ്ക്കുള്ളിലുറങ്ങും ത-
ന്നോമനയുണ്ണിതൻ മുന്നിൽ വേഗാൽ 110
ചേരുകയായ് ചെന്നു നന്ദനവാത്സല്യ-
പരവശാകുലൻ ഭാനുമാലി.
VI
അന്നന്മണിയറയാകവേ പൂത്തോരു
കൊന്നപൂന്തോട്ടമായ് മിന്നിനിൽക്കേ
മഞ്ഞനീരാടിന മന്നവൻ തന്മിഴി-
മഞ്ജുളച്ചെന്താർ മലർന്നു മെല്ലെ,
ആഗന്തുകനൊരാൾ, അന്തണൻ, കാല്യത്തിൽ-
ആഗമവിഗ്രഹ, നത്ഭുതാഭൻ,
കാണികൾക്കുപ്പൂ കുളിർപ്പിക്കും ചെന്തീയായ്,
കാഞ്ചനവർണ്ണമാം കർപ്പൂരമായ്, 120
ചേണുറ്റ തൻ പൂർവപുണ്യത്തിൻ സൽഫലം
പാണിയിൽ പക്വമായ് വീണപോലെ,
ആസന്നനായതു കണ്ടെഴുന്നേറ്റെങ്ങ-
ങ്ങാസന, മെങ്ങർഘ്യ, മെങ്ങു പാദ്യം,
എങ്ങുമധുപർക്ക, മെന്നുരചെയ്തുകൊ-
ണ്ടങ്ഗേശ, നാതിഥ്യജാഗരൂകൻ.