ഈ താളിൽ തെറ്റുതിരുത്തൽ വായന നടന്നിരിക്കുന്നു
- അദ്ധ്യാരോപിതമായ ജഗത്തിന്റെ
- അപവാദം ഗുരുവരകാരുണ്യാൽ
- ഒരുവണ്ണം പറഞ്ഞേനിതുകൊണ്ടും
- ജീവന്മുക്തി സുശിക്ഷിതമായീടും.
- ഇപ്രകാരമാകുംപോഴജ്ഞാനവു-
- മതുകൊണ്ടുള്ള ബന്ധവുമങ്ങനെ
- ജ്ഞാനവുമതിനാലുള്ള മോക്ഷവും
- നിത്യശുദ്ധനായീടുമാത്മാവിന്നു
- ഒരുകാലവുമില്ലെന്നു തന്നെയാം
- ദൃഢനിശ്ചയം ബ്രഹ്മനിഷ്ഠന്മാർക്കും
- ഇതുതന്നെ ശ്രുതിശിരോവാക്യങ്ങൾ-
- ക്കതിഗൂഢമായുള്ള സിദ്ധാന്തവും.
- ശാസ്ത്രഗർത്തത്തിൽ വീണുരുളുന്നതു
- മാത്രംകൊണ്ടറിയാമോ പരമാർത്ഥം
- നേത്രമുള്ള ഗുരുവരകാരുണ്യാൽ
- ശ്രോത്രം തന്നിലുപദേശം കൂടാതെ.
- പാത്രമെന്നുമപാത്രമെന്നും ചില
- ശാസ്ത്രം കൊണ്ടു പറയുന്നതൊക്കെയും
- ശ്രോത്രിയാണാം ഗുരുവറിഞ്ഞിട്ടല്ലോ
- ശാസ്ത്രസാരമുപദേശിക്കുന്നതും
- ഗുരുശാസ്ത്രമൊഴിഞ്ഞുടനാരിന്നു
- പരമാർത്ഥസ്വരൂപമറിയുന്നു
- ഗുരുപാദശുശ്രൂഷകൊണ്ടുണ്ടാകും
- പരമായുള്ള ശാസ്ത്രവിജ്ഞാനവും.
