ഈ താളിൽ തെറ്റുതിരുത്തൽ വായന നടന്നിരിക്കുന്നു
- ഭേദവാദിക്കസത്യമായ്ത്തോന്നീടും
- ഭേദമില്ലതിനേതുമറിഞ്ഞാലും.
- വിശ്വാസമിതിലൊന്നിലുമില്ലാഞ്ഞാ-
- ലാശ്വസിപ്പതിനില്ല വഴി പിന്നെ.
- ആത്മാനാത്മവിവേകം വരാഞ്ഞാല-
- ങ്ങാത്മജ്ഞാനം വരികയില്ലാർക്കുമേ
- ആത്മാവല്ലാത്തതൊക്കെയനാത്മാവാം
- ആത്മാവേതെന്നറിഞ്ഞാൽ മതിയല്ലോ.
- ഇദം ബുദ്ധി വിഷയമനാത്മാവു-
- മഹംബുദ്ധി വിഷയമാമാത്മാവും
- ഇതുതന്നെയുണർന്നു നോക്കുന്നേരം
- മതിസാക്ഷിയിൽ ചേർന്നു സുഖം വരും.
- ദേഹമാത്മാവാമെങ്കിലിതെന്നുടെ
- ദേഹമെന്നും പറയുന്നതെങ്ങനെ.
- ഇന്ദ്രിയങ്ങളും പ്രാണാദികളഞ്ചും
- ബുദ്ധിയും മനസ്സെന്നിവയൊന്നുമേ
- സത്യമാകിയൊരാത്മാവല്ലോർക്കുമ്പോൾ
- മമതാവിഷയത്വമുണ്ടാകയാൽ
- ഇതിനുള്ളൊരു കാരണമജ്ഞാന-
- മതുമാത്മാവായീടുകയില്ലല്ലോ.
- ജാഗ്രത്സ്വപ്നസുഷുപ്തിയിലൊക്കെയും
- സാക്ഷിയായിട്ടിരിക്കുന്ന ചൈതന്യം
- സാക്ഷാദാത്മസ്വരൂപമതെന്നല്ലോ
- മോക്ഷശാസ്ത്രങ്ങളൊക്കവേ ചൊല്ലുന്നു.
