ശ്രീമദ് ഭാഗവതം (മൂലം) / നവമഃ സ്കന്ധഃ (സ്കന്ധം 9) / അദ്ധ്യായം 23

← സ്കന്ധം 9 : അദ്ധ്യായം 22

സ്കന്ധം 9 : അദ്ധ്യായം 24 →

ശ്രീമദ് ഭാഗവതം (മൂലം) / നവമഃ സ്കന്ധഃ (സ്കന്ധം 9) / അദ്ധ്യായം 23

ശ്രീശുക ഉവാച

അനോഃ സഭാനരശ്ചക്ഷുഃ പരോക്ഷശ്ച ത്രയഃ സുതാഃ ।
സഭാനരാത്കാലനരഃ സൃഞ്ജയസ്തത്സുതസ്തതഃ ॥ 1 ॥

ജനമേജയസ്തസ്യ പുത്രോ മഹാശീലോ മഹാമനാഃ ।
ഉശീനരസ്തിതിക്ഷുശ്ച മഹാമനസ ആത്മജൌ ॥ 2 ॥

ശിബിർവ്വനഃ ശമിർദ്ദക്ഷശ്ചത്വാരോശീനരാത്മജാഃ ।
വൃഷാദർഭഃ സുവീരശ്ച മദ്രഃ കൈകേയ ആത്മജാഃ ॥ 3 ॥

ശിബേശ്ചത്വാര ഏവാസംസ്തിതിക്ഷോശ്ച രുഷദ്രഥഃ ।
തതോ ഹേമോഽഥ സുതപാ ബലിഃ സുതപസോഽഭവത് ॥ 4 ॥

അംഗവംഗകലിംഗാദ്യാഃ സുഹ്മപുണ്ഡ്രാന്ധ്രസംജ്ഞിതാഃ ।
ജജ്ഞിരേ ദീർഘതമസോ ബലേഃ ക്ഷേത്രേ മഹീക്ഷിതഃ ॥ 5 ॥

ചക്രുഃ സ്വനാമ്നാ വിഷയാൻ ഷഡിമാൻ പ്രാച്യകാംശ്ച തേ ।
ഖനപാനോഽങ്ഗതോ ജജ്ഞേ തസ്മാദ് ദിവിരഥസ്തതഃ ॥ 6 ॥

സുതോ ധർമ്മരഥോ യസ്യ ജജ്ഞേ ചിത്രരഥോഽപ്രജാഃ ।
രോമപാദ ഇതി ഖ്യാതസ്തസ്മൈ ദശരഥഃ സഖാ ॥ 7 ॥

ശാന്താം സ്വകന്യാം പ്രായച്ഛദൃഷ്യശൃംഗ ഉവാഹ താം ।
ദേവേഽവർഷതി യം രാമാ ആനിന്യുർഹരിണീസുതം ॥ 8 ॥

നാട്യസംഗീതവാദിത്രൈർവിഭ്രമാലിംഗനാർഹണൈഃ ।
സ തു രാജ്ഞോഽനപത്യസ്യ നിരൂപ്യേഷ്ടിം മരുത്വതഃ ॥ 9 ॥

പ്രജാമദാദ് ദശരഥോ യേന ലേഭേഽപ്രജാഃ പ്രജാഃ ।
ചതുരംഗോ രോമപാദാത്പൃഥുലാക്ഷസ്തു തത്സുതഃ ॥ 10 ॥

ബൃഹദ്രഥോ ബൃഹത്കർമ്മാ ബൃഹദ്ഭാനുശ്ച തത്സുതാഃ ।
ആദ്യാദ്ബൃഹൻമനാസ്തസ്മാജ്ജയദ്രഥ ഉദാഹൃതഃ ॥ 11 ॥

വിജയസ്തസ്യ സംഭൂത്യാം തതോ ധൃതിരജായത ।
തതോ ധൃതവ്രതസ്തസ്യ സത്കർമ്മാധിരഥസ്തതഃ ॥ 12 ॥

യോഽസൌ ഗംഗാതടേ ക്രീഡൻ മഞ്ജൂഷാന്തർഗ്ഗതം ശിശും ।
കുന്ത്യാപവിദ്ധം കാനീനമനപത്യോഽകരോത് സുതം ॥ 13 ॥

വൃഷസേനഃ സുതസ്തസ്യ കർണ്ണസ്യ ജഗതീപതേഃ ।
ദ്രുഹ്യോശ്ച തനയോ ബഭ്രുഃ സേതുസ്തസ്യാത്മജസ്തതഃ ॥ 14 ॥

ആരബ്ധസ്തസ്യ ഗാന്ധാരസ്തസ്യ ധർമ്മസ്തതോ ധൃതഃ ।
ധൃതസ്യ ദുർമ്മദസ്തസ്മാത്പ്രചേതാഃ പ്രാചേതസം ശതം ॥ 15 ॥

മ്ലേച്ഛാധിപതയോഽഭൂവന്നുദീചീം ദിശമാശ്രിതാഃ ।
തുർവ്വസോശ്ച സുതോ വഹ്നിർവ്വഹ്നേർഭർഗ്ഗോഽഥ ഭാനുമാൻ ॥ 16 ॥

ത്രിഭാനുസ്തത്സുതോഽസ്യാപി കരന്ധമ ഉദാരധീഃ ।
മരുതസ്തത്സുതോഽപുത്രഃ പുത്രം പൌരവമന്വഭൂത് ॥ 17 ॥

ദുഷ്യന്തഃ സ പുനർഭേജേ സ്വം വംശം രാജ്യകാമുകഃ ।
യയാതേർജ്യേഷ്ഠപുത്രസ്യ യദോർവംശം നരർഷഭ ॥ 18 ॥

വർണ്ണയാമി മഹാപുണ്യം സർവ്വപാപഹരം നൃണാം ।
യദോർവ്വശം നരഃ ശ്രുത്വാ സർവ്വപാപൈഃ പ്രമുച്യതേ ॥ 19 ॥

യത്രാവതീർണ്ണോ ഭഗവാൻ പരമാത്മാ നരാകൃതിഃ ।
യദോഃ സഹസ്രജിത്ക്രോഷ്ടാ നളോ രിപുരിതി ശ്രുതാഃ ॥ 20 ॥

ചത്വാരഃ സൂനവസ്തത്ര ശതജിത്പ്രഥമാത്മജഃ ।
മഹാഹയോ വേണുഹയോ ഹൈഹയശ്ചേതി തത്സുതാഃ ॥ 21 ॥

ധർമ്മസ്തു ഹൈഹയസുതോ നേത്രഃ കുന്തേഃ പിതാ തതഃ ।
സോഹഞ്ജിരഭവത്കുന്തേർമ്മഹിഷ്മാൻ ഭദ്രസേനകഃ ॥ 22 ॥

ദുർമ്മദോ ഭദ്രസേനസ്യ ധനകഃ കൃതവീര്യസൂഃ ।
കൃതാഗ്നിഃ കൃതവർമ്മാ ച കൃതൌജാ ധനകാത്മജാഃ ॥ 23 ॥

അർജ്ജുനഃ കൃതവീര്യസ്യ സപ്തദ്വീപേശ്വരോഽഭവത് ।
ദത്താത്രേയാദ്ധരേരംശാത്പ്രാപ്തയോഗമഹാഗുണഃ ॥ 24 ॥

ന നൂനം കാർത്തവീര്യസ്യ ഗതിം യാസ്യന്തി പാർത്ഥിവാഃ ।
യജ്ഞദാനതപോയോഗശ്രുതവീര്യദയാദിഭിഃ ॥ 25 ॥

പഞ്ചാശീതി സഹസ്രാണി ഹ്യവ്യാഹതബലഃ സമാഃ ।
അനഷ്ടവിത്തസ്മരണോ ബുഭുജേഽക്ഷയ്യഷഡ്വസു ॥ 26 ॥

തസ്യ പുത്രസഹസ്രേഷു പഞ്ചൈവോർവ്വരിതാ മൃധേ ।
ജയധ്വജഃ ശൂരസേനോ വൃഷഭോ മധുരൂർജ്ജിതഃ ॥ 27 ॥

ജയധ്വജാത്താലജംഘസ്തസ്യ പുത്രശതം ത്വഭൂത് ।
ക്ഷത്രം യത്താലജംഘാഖ്യമൌർവതേജോപസംഹൃതം ॥ 28 ॥

തേഷാം ജ്യേഷ്ഠോ വീതിഹോത്രോ വൃഷ്ണിഃ പുത്രോ മധോഃ സ്മൃതഃ ।
തസ്യ പുത്രശതം ത്വാസീദ് വൃഷ്ണിജ്യേഷ്ഠം യതഃ കുലം ॥ 29 ॥

മാധവാ വൃഷ്ണയോ രാജൻ യാദവാശ്ചേതി സംജ്ഞിതാഃ ।
യദുപുത്രസ്യ ച ക്രോഷ്ടോഃ പുത്രോ വൃജിനവാംസ്തതഃ ॥ 30 ॥

ശ്വാഹിസ്തതോ രുശേകുർവൈ തസ്യ ചിത്രരഥസ്തതഃ ।
ശശബിന്ദുർമഹായോഗീ മഹാഭോജോ മഹാനഭൂത് ॥ 31 ॥

ചതുർദ്ദശമഹാരത്നശ്ചക്രവർത്ത്യപരാജിതഃ ।
തസ്യ പത്നീസഹസ്രാണാം ദശാനാം സുമഹായശാഃ ॥ 32 ॥

ദശലക്ഷസഹസ്രാണി പുത്രാണാം താസ്വജീജനത് ।
തേഷാം തു ഷട് പ്രധാനാനാം പൃഥുശ്രവസ ആത്മജഃ ॥ 33 ॥

ധർമ്മോ നാമോശനാ തസ്യ ഹയമേധശതസ്യ യാട് ।
തത്സുതോ രുചകസ്തസ്യ പഞ്ചാസന്നാത്മജാഃ ശൃണു ॥ 34 ॥

പുരുജിദ് രുക്മരുക്മേഷുപൃഥുജ്യാമഘസംജ്ഞിതാഃ ।
ജ്യാമഘസ്ത്വപ്രജോഽപ്യന്യാം ഭാര്യാം ശൈബ്യാപതിർഭയാത് ॥ 35 ॥

നാവിന്ദച്ഛത്രുഭവനാദ്ഭോജ്യാം കന്യാമഹാരഷീത് ।
രഥസ്ഥാം താം നിരീക്ഷ്യാഹ ശൈബ്യാ പതിമമർഷിതാ ॥ 36 ॥

കേയം കുഹക മത് സ്ഥാനം രഥമാരോപിതേതി വൈ ।
സ്നുഷാ തവേത്യഭിഹിതേ സ്മയന്തീ പതിമബ്രവീത് ॥ 37 ॥

അഹം വന്ധ്യാസപത്നീ ച സ്നുഷാ മേ യുജ്യതേ കഥം ।
ജനയിഷ്യസി യം രാജ്ഞി തസ്യേയമുപയുജ്യതേ ॥ 38 ॥

അന്വമോദന്ത തദ് വിശ്വേദേവാഃ പിതര ഏവ ച ।
ശൈബ്യാ ഗർഭമധാത്കാലേ കുമാരം സുഷുവേ ശുഭം ।
സ വിദർഭ ഇതി പ്രോക്ത ഉപയേമേ സ്നുഷാം സതീം ॥ 39 ॥